YESAYA 6 - Bibilia Kui Mdedie fo Kimochi

Ruwa alaha Yesaya nawe mwikimbi

¹ Kiidi kya maka fulya mangi Uzia alepfa njilewona Mndumii adamie kiidi kya loṟika lo wuitoṟi, luwei huye mnu na iirio huye mnu, na mambo tsa nguwo yake tsikaichuṟa hekalu.

² Huyake kukahoṟokaho maserafi, orio umu nawewode makungo haṟandaṟu; hawi hakashikia kyamu kyake na hawi hakashikia madende na hawi karunduka.

³ Wakalahana, orio umu na odoye wechihamba, “Mwele, Mwele, Mwele, nyio Ruwa Mndumii-Ruwa Sabaoti, masanga haichuo kiṟumi kyake.”

⁴ Na ngiṟi tsikadihina kipfa ulya alaha, mba iya ikaichuo mtsu.

⁵ Nalyo ngahamba, ochia loko kipfa njidekie; kipfa njiwode dumbu liichuo wunyamaṟi, na njikeri kiidi kya wandu wafanyi wunyamaṟi madumbunyi hawo; na meso hako hamewona Mangi, Mndumii menyi Matorito.

⁶ Naho kudi, umu o maserafi walya karundukia alyando nji; nao nawewode okaa lo modo kuwokohu koke aleira alya kitaṟenyi kekoṟia kidaso kaluwada na ipati lya modo,

⁷ kapaya momu yako na okaa lo kanjiwia, “Ambuya okaa lu lopaya momu yapfo, na wukika wopfo womewutoho na wunyamaṟi wopfo womesanjoho.”

⁸ Kyasia ngaicho ṟu lya Mndumii lyechiwesa, “Njidume u na nyiu echihenda handu hadu?” Inyi ngahaluo ngahamba, “Nyi iya nji njiduma inyi.”

⁹ Nao kanjiwia, chenda, uwie wandu-wa, “Engeṟenyi iicho, indi mulamanye; engeṟenyi itukuya, indi mulawone.

¹⁰ Waha mahio ha wandu-wa, nowahe madu hawo, nowahe na meso hawo; kundu walawone kui meso hawo na iicho kui madu hawo, na imanya kui ngoo tsawo, na iwuya wakiṟo.”

¹¹ Na inyi ngawesa, “A nyi mṟasa indi hoi Mndumii?” Nao kanjihaluo, “Nyi mṟasa mṟi ii yechinyamaṟo ilechiwadapfo ma mndu, na mba tsi tsituṟe wandu piu, na oruka lu luwe mrapu;

¹² mṟasa Mndumii nasamiṟe wandu wahende kuleshe mnu, na handu hasame hawefo mnu kiidi kya oruka.

¹³ Manya chandu kutsihae ora lumu kiidi kya ikumi, yechelio mayo da; cha mchihiyo, cha mfuṟuhanje, itsinde liwonyio likamemanyo.” (itsinde lyo nyi mbeu njele ya mawookionyi mahya).