YESAYA 59 - Bibilia Kui Mdedie fo Kimochi

Mwikimbi asesa njonyamaṟo tsa wandu

¹ Ambuya, owoko lo Mndumii luilututu lulemo ikiṟa-pfo; ma kudu koke kulemeri kulechiidima iicho-pfo.

² Indi mawicho hanu hamuletsana na Ruwa onu, na wunyamaṟi wonu wukatewa kaowisha kyamu kyake mulakimbone ma akundi iadanyiapfo.

³ Kipfa mawoko hanu hafanyi ngafu ya samu, na shimnyo shanu shifanyi ngafu ya wukika; madumbu hanu hadedie wongo na njolimi tsanu tsikasiria wuwicho.

⁴ Kuwode mowesa kui wusumhanyipfo, kuwode modeda wulohi-pfo; wakusirie wulya, ideda wongo; wukakapika wukafee wuwicho.

⁵ Wukapaṟa mapoṟe ha njoka membe na ioka ndusu tsa maṟawushi ha mbuhu; icho molya mapoṟe ho nechipfa na ilyo lyechipaṟika lyechiwuta njoka.

⁶ Ndusu tsa maṟawushi tsechiwa maṟao-pfo, manya wechiidima ikushikia na maṟunda hawo ha mawoko-pfo; maṟunda hawo nyi ha madeko; mawuto ha ngafu nyi hai mawokonyi hawo.

⁷ Madende hawo hai maangu idichia mawicho na ihekia mteeṟa wapusuo samu ilawode mti; makusaṟo hawo nyi mawicho; wukiwa na inyamaṟika shawono kiidi kya njia tsawo njinene.

⁸ Kilya kelaho nyi ofoṟo wakiichi-pfo, kuwode mwanduye fo wusumhanyi kiidi kyawopfo; waṟeheṟie njia tsa odetso; orio motsiosha awode ofoṟo-pfo.

Wandu wahamba njonyamaṟo tsawo

⁹ Kipfa kya ikyo, mwanduye fo wusumhanyi fui aleshe naso, ma kudo wusumhanyi wolukoyapfo; luwei iwedia saa ate meema fukashinga; luweiwedia ngela, indi luichumia meema rambatanyi.

¹⁰ Lukaeri iwada-wada omombolu cha kipfupfuṟe, luiwada-wada cha wandu walawode meso; luikapa mtulia kiheri kya mfiri cha ili kuwode mtima fo ngamenyi; kiidi kya walya wang'anyi kui mbihu lui cha wapfu.

¹¹ So lose luiringona cha rumu; lui fowenyi cha mbeta, luiweda mwanduye fo lohi kyaindi kuwode-pfo; na okiṟo indi lui haleshe naso.

¹² Kipfa madeko hadu haengeṟeka na ifo oshangunyi lopfo, na manyamaṟo hadu hakawa wuṟingishi huye yadu; kipfa luwode madeko lukakaa naho, mawicho hadu lomehamanya;

¹³ kiidi kya madeko na, lukadeda kui orikiki na inyamaṟa, lukakusaṟa madedo ha wongo na ihawuta mrimenyi.

¹⁴ Mwanduye fomehaluka fukahenda nduma, na wukiilohi wuhoṟoki haleshe mnu, kipfa lohi ihalukie njia njilandari na wuhoṟotsu wochiidima iidapfo.

Ruwa akuteseheṟa ikiṟa wandu wake

¹⁵ Ee, lohi idekie piu, ichu adeye wuwicho nafananyi na mowado shidenyi; nao Mndumii kawona isho kasuo kipfa kulawode mwanduye fo lohi.

¹⁶ Kawona ke kuwode mndu, kawuya kaṟihio kipfa kulawode moterewa; kyasia, owoko loke amonyi nyilo lulemwendie okiṟo mdohu foke.

¹⁷ Kaweṟaa maṟao ha kiṟache hawe hake, wunyenyi kawuhaluo ikonya lyake.

¹⁸ Kiṟinganyi na mawuto hawo nyi wudo echiwataa.

¹⁹ Nahong'u wechiowuo rina lya Mndumii wuka ora lo kiukanyi, na kiṟumi kyake wokia ora lo ngamenyi; kipfa nechicha cha mṟinga fui iosha mfongo fupuika, futsindiko nyi mṟufu fo Mndumii.

²⁰ Na mkiṟi nechicha Sioni, ko kiidi kya mbonyi tsako ifu nyifo mkundana foko,

²¹ Mndumii ahamba, “Mumuyo foko fui huye yapfo na madedo hako hai dumbunyi lyapfo, hechiwuka dumbunyi lyapfo ma dumbunyi lya wana wapfo, ma dumbunyi lya wachuku wapfo-pfo, Mndumii ahamba, wokia inu itane mlungana.”