YESAYA 58 - Bibilia Kui Mdedie fo Kimochi

Ikuotoya lya lohi

¹ Mndumii-Ruwa ahamba, “Poṟohoṟa ma kulade. Iria ṟu cha mokapa iranda; Ongoya wandu wako deko lyawo, na mba ya Yakobo wunyamaṟi wowo.”

² Kyaindi wekenjishiha orio mkonu; wakundi imanya njia tsako; cha wandu wa mkambo fuwutie wusumhanyi, welechida wuwawaso wo Ruwa owo, wakundi mawawaso ha wusumhanyi; wekechihio ikaa afui na Ruwa.

³ Wekehamba, “Lomekuotoya kyaindi uwonyi pfo. Lowelisa mbihu yadu wukiwa, indi uambuyapfo. Manyenyi, mkonu fo ikuotoya muishiha sia tsanu muwenyi, na ilemeṟa iwo weṟunda konu wose.

⁴ Ambuyenyi nyo mukeri ikuotoya kundu mulimbane na iloyana, na ikapana nzina ya wuwicho. Mukuotoya mkonu fu fo inu na muirie ṟu lyanu huye.

⁵ Ngesa ikuotoya lya mbaṟi i njiwesambuṟie? Ngesa nyi mndu ikulisa wukiwa wo mbihu foke? Nyi ihongomitsa mdo cha iṟa lya msuki, na ikuwaṟahiya nguwo tsa masaṟa na ifu? Ngesa nochihamba nyi ikuotoya na Mndumii naweidikia?

⁶ Ngesa inyi njilewawasa ke ikuotoya njikundi nyi ileheṟuo walya wapfungiṟie wuwicho wowo na mhanda yawo ianguṟo, walya wai wapfunge wapfunguyo, muwewuta shi shicha shose ko walya wai wawonyie?

⁷ Ngesa chi iinenga wawodo nyi njaa kando, walya wai wakiwa waendo na kanyi? Mndu ai kitaṟe, naṟiko nguwo; ma kulaowie mndu o samu yapfo?

⁸ Na lyondi sa yapfo yechiwaa cha ngamenyi na oru lopfo lochicha oweṟe, na wusumhanyi wopfo wochikusongoya; kiṟumi kya Mndumii kechikuosha nduma na ikuringa.

⁹ Nochilaha, na Mndumii nechikuidikia; nofihiṟa nao nakuhaluo, ‘Nyi iya njii.’ Kokoya ochiwuta mhanda fulakae kiidi kyapfo, manya ilesha kimnyo, ma ideda mawicho;

¹⁰ na kokoya oinenga ulya awodo nyi njaa kando na iwihiṟia moo walya wai walise wukiwa; kyasia sa yapfo yechiwaa kiidi kya mema; na iwushiwushi lyapfo lyechiwa mfiri wyoo.

¹¹ Nao Mndumii nechikusongoya mafiri hose; nechikuinenga kando handu halawode mṟinga, na iinenga mafuo hapfo pfinya, nochiwa cha dema linose, na soka ilekeumia.

¹² Wandu wapfo wechiwika mba handu haile; nochiwika kiidi kya njotende tsa kuwoka; na iyo nochilaho, ‘Aichu mosungusia handu hawundukie; na mowihiṟa handu hekaa.’”

Wueri woindia Sabato

¹³ “Kokoya oilacha mawuto hapfo ulatahache Sabato, ulawute na ikaa wuseṟeṟinyi mkonu foko Mwele; kolaha sabato mkonu fo sia, na mkonu Mwele fo Mndumii fuwode wuindi, kofuṟumisha, kulakioshese mahio hapfo kumonyi;

¹⁴ nahong'u ochikuchihiṟa ko Mndumii; njechikudosa itane handu hakuirie; njechikudamiṟa kyooṟenyi kya Yakobo ndeopfo; kipfa nyi dumbu lya Mndumii lyahamba isho.”