YESAYA 57 - Bibilia Kui Mdedie fo Kimochi

Iwawaso lya wuindi wo sanamu

¹ Mndu o wusumhanyi nekedeka, kuwode mowika isho mrimenyipfo, wandu wecha wekewutoho, kuwode mokusaṟa ke ichu awode wusumhanyi nawutoho nalakoyane na mawicho.

² O nekeida kiidi kya ofoṟo; wo wekechihiyo kiidi kya shitaṟa shawo, orio umu kakuidia kiidi kya wuhoṟotsu woke.

³ “Kyaindi nyo tikirienyi hafui, nyo wana wa mndu msawi, oshari lo wuṟuhui na wumeluki.

⁴ Mukeri italuo u? Nyiu muimwasamia na isomuo njolimi tsanu? Ngesa nyo chi wana wa odetso oshari lo wongo;

⁵ nyo mukeri iatsa lango tsanu kiidi kya mashidi, na wanda ya mashidi hawode maṟa mawiri; nyo mokewaha wana mapichinyi na ngaṟahamba tsa maho?

⁶ Ohawi lopfo lui kiidi kya pichi lya maho mapaṟepaṟe ikyo nolewona kui kuṟu kuhya; noleletsia kidaso kya mṟinga kowewika na mwano fo mso; ngesa njiwekutsia na isho uletana?

⁷ Nolewika kitaṟa kyapfo huye ya fumvu lileshe mnu; kohenda idasia-pfo.

⁸ Numa ya mongo na shiwango wangonyi nowikieho ngumbuo yapfo; kipfa noshukuye moo fopfo kipfa kya ungi, chi kipfa kyako uledoya huyepfo; nolelandaṟa kitaṟa kyapfo, na iyo kowika mkundana nawo; nolekunda kitaṟa kyapfo lilya ulekiwona.

⁹ Nolehendia mangi na mafuda ha opfudano, koengeṟa opfaamo lopfo, koduma wangochi wapfo kuleshe, kokunyiiṟa itane ko waṟumu.

¹⁰ Kolehela kipfa kya wuleshe wo njia yapfo; indi kulahambe, ke kuwode mkusiriepfo; koengeṟio pfinya kikatewa kulaluo.

¹¹ Kake nyiu ulemwowuo kakuowesha itane ohamba wongo, ma kulanjikumbuo inyi ma injiwika mrimenyi? Ngesa inyi njiletsia wokia kacha, ma kulanjiowuo?

¹² Inyi njechihamba wukiilohi wopfo, na mawuto hapfo helechiwa kindo.

¹³ Ilyindi ochifuha, wakukiṟe iwo ulesanyia; indi otanu lochiwaduo; iomoyo lienyi lechiwaduo kuleshe; kyaindi ichu anjikusirie nechioṟa oruka, na fumvu lyako liele likuwiie kyoṟa kyake.

Isaṟia lya Ruwa

¹⁴ Nao nechihamba: “Wikenyi! Wikenyi! Sungusienyi njia, Irenyi orio kiima kyose, Kiidi kya njia ya wandu wako.”

¹⁵ Kipfa ichu ai huye amng'anyishe, mokaa mlungana; ichu amlahe Mwele nahamba adi, “Njekekaa handu hakuirie, haele, hamu na ichu akunyiiṟie mrima na idumbuya, kundu njiṟutse ngoo tsa walya wakunyiiṟie na mrima ya walya waledumbuya.”

¹⁶ Kipfa njilechihodana na wandu mkonu yose, ma njechikaa na nyashi mkonu yosepfo; kipfa mrima foko fuwechiuma oshangunyi loko, na iwo njilewumba.

¹⁷ Kipfa kya wuwicho wo ilanga lyake njilewado nyi nyashi, ngamkapa; ngaowisha kyamu kyako, ngarihinyika; nao kawehenda na okachu loke, kaosha makusaṟo ha mrima foke amonyi.

¹⁸ Ngamewona wulalu njia tsake; Inyi njechimchiṟa; njechimsongoya na imbihiṟia moo, hamu na iwo wawei imkapia shilio.

¹⁹ Inyi njechiwainenga ofoṟo, ofoṟo ko walya wai hafui na walya wai kuleshe, Mndumii ahamba; “Na Inyi njechimchiṟa.”

²⁰ Indi wawicho wafananyi na ipalyipalyi lifuṟungukie; kipfa lilechiidima itsia, na mṟinga folyo nyi fuichuo odoko na mbosha.

²¹ “Kuwode ofoṟo ko wawichopfo;” Ruwa oko ahamba.