YESAYA 56 - Bibilia Kui Mdedie fo Kimochi

Wose walaho

¹ Mndumii nahamba adi, “Anduonyi kya wusumhanyi, kipfa okiṟo loko lui hafui, na wusumhanyi woko idambuyo ko wandu wose.

² Nanga ichu mowuta isho, na mndu ulya mowada mawawaso hako chandu kii kidede kya mkonu fo sabato alatehie ho ma ndambu imu, ichu aringie mawoko hake halawute wunyamaṟi.”

³ Mhenu ekeoshana na Mndumii alahambe, nyi kya lohi Mndumii nechinjiletsana na wandu wake; ma mnzenge nalahambe “Inyi nyi ikidi liumu.”

⁴ Kipfa Mndumii nyi awia adi manzenge, iwo wekeindia mfiri fo sabato tsako na isambuṟa shilya njishikundi na iwada mnu mkundana foko;

⁵ njechiinenga iwa kanyi koko na ngumbuo shiṟihenyi shako wawade rina na orio kii kicha kota iwada wana wa womi na wa waka, rina lyawo lechikaa mlungana lilechiwa ihadimo.

⁶ Wahenu walya waweosha Mndumii kundu wamṟundie na ikunda rina lya Mndumii, iwa waṟundi wake, orio mowuta kisumhanyie sabato nalaifanyitse na iwada mnu mkundana foko;

⁷ manya iwo njechiwaembeṟa kiidi kya ifumvu lyako liele, na iwachihiṟa kiidi kya mba yako ya wuhendeli wo shiterewo. Shidaso na shiano shemaya modonyi shechiidikio ipfo kitaṟenyi kedasia; kyamba mba yako yelaho nyi mba yeterewia masanga hose.

⁸ Mndumii-Ruwa, mosanyia wandu wose wai wafune kiidi kya Israeli nahamba, “Hamu na isho njechimsanyia na wengi ngoseṟa ya iwo wawei wake wawasanyie.”

Wasongoru wa Israeli wawonyio owingo

⁹ Nyo mando ha nuka nchonyi, Nanyo mando ha mtsudu.

¹⁰ Waringi wake nchonyi mulye wandu wako; shipfupfuṟe, wose piu wawuṟie wuṟango; wose nyi shite shii pipi nyi weidima idedapfo; wekelodia ndodo, wekelaa, wakundi mado na ihombia.

¹¹ Shite sho shiwode wuumu, shekeihudapfo, na iwo nyi walisi walechiidima imanya idedo; wose piu wahalukie kihadi, waoshe njia tsawo wawenyi, orio umu kui kiira kyake, wuka njora tsose.

¹² Wekehamba, “Njonyi luhende ishiha mvinyo, Na luwenyo mnu wari! Ngama yewa cha inu, luchihiyo lya wueṟa.”