YESAYA 54 - Bibilia Kui Mdedie fo Kimochi

Ikunda lya Ruwa ko Waisraeli

¹ “Keimba iyo ui mhumba, iyo ulalemefee mkoku; iria ṟu lyapfo noimbe, kapa ngululu, iyo kulawode mawawio; kipfa wana wake ichu aledeo nyi wafoi kota ichu amwalike,” Mndumii ahamba.

² “Engeṟa handu ochiwika hema lyapfo, waale nguwo tsa handu hekoyana; kulawaime, engeṟa wuleshe wo shiwoho shapfo; kundu shiwanze shidi sha hema lyapfo.

³ Kipfa nochiichuo ora lo kulyo na kumoso na oshari lopfo lochiitoṟia wandu wa mkambo; na ihaluo mṟi iya ilawewode mndu iwade wandu wafoi.

⁴ Kulaowuo; kulatisiki; kulaowuo na isokio nyi fowa; kipfa ulechitaluka; kipfa nochihadima sonu tsa uwanake wopfo, ma shirumo sha wukusu wopfo ochishikumbuo-sepfo.

⁵ Kipfa ichu alekuumba nyio mii opfo; Mndumii menyi Matoṟito nyilyo rina lyake; na Mwele o Israeli nyio mkiṟa opfo; O nyi echilaho nyi Ruwa o wuyana wose.

⁶ Kipfa Mndumii nakulaha cha mndu mka amde na irihinyisho mrimenyi, cha mndu mka mkoho adeo, Ruwa opfo ahamba.

⁷ “Kiheri kitutu njilekuda; kyaindi kui osaṟio lung'anyi njechikusanyia.

⁸ Kipfa kya nyashi ya msanjika njechiṟika kyamu kyako kioweṟe sa kitutu; kyaindi kui isaṟia lyako lilasia njechikueka, Mndumii mkiṟi opfo ahamba.

⁹ Kyamba mbonyi i yafanana na mfu fulya fo Noe; kipfa njilelya nyamu ke njechikapa-se oruka kui mṟingapfo, na wudo ngalya nyamu ke njechikuwadia nyashi ma ikupomiapfo.

¹⁰ Kipfa mafumvu hechiteshuka, na shitoṟomoso shiwewutoho; kyaindi wucha woko wochiwuto kopfo-pfo, ma mkundana foko fo ofoṟo fochiwutoho pfo; nyi Mndumii chu mokusaṟia ahamba.”

Yerusalemu njihya

¹¹ “Iyo umlise wukiwa, kowedao nyi kiwiri-wiri, ulekewa ilemba-lemba ambuya njechiwika maho ha fana njicha na otende kui maho ha wuhuru wung'anyi.

¹² Na inyi njechiwika mnaṟa ya fana ya kimande, na mongo ya alimasi, na mṟasa yapfo yose maho hachihiṟie.

¹³ Wana wapfo wose wechilosho nyi Mndumii; na ofoṟo lo wana wapfo lochifo.

¹⁴ Nochiwanga kiidi kya kiilohi; nochikaa haleshe na iwonyio, kulechiowuo; wuowu wochikaa kuleshe wulechikusembelia.

¹⁵ Kechiidimika wakusanze kimu; indi chi kui chila yakopfo. Wandu wose wechikusanza kipfa kyapfo wo wechiomboka kipfa kyapfo.

¹⁶ Ambuya inyi njilewumba mnganya ekeṟufuṟia modo fo makaa, katsana shisha kui iṟunda lyake; na inyi ndewewumba monyamaṟa kundu nanyamaṟe.

¹⁷ Orio kisha kechiteseheṟo huye yapfo kechiawukia-pfo, na orio olimi lochideda kyapfo nochiluanduya madeko. Iki nyi kyooṟa kya waṟundi wa Ruwa, na wusumhanyi wuwukie koko inyi, nyi wudo Mndumii ahamba.”