YESAYA 53 - Bibilia Kui Mdedie fo Kimochi

¹ “Nyiu aleidikia mbonyi tsilya luleende? Na owoko lo Ruwa nyiu amtambaṟuye?

² Kipfa nawei cha iṟa lilehetsi, Cha mri fui handu hahadutsu; Awode wumba lichapfo; Ma fana yemlanga awodepfo.

³ Nataluke kaweleho nyi wandu; Mndu aichuo fowa, aichi ikuinadia; Kawewa motewa wandu waṟike shamu shawo. Naletaluka nalawono ma cha kindo.

⁴ Nyio aleduo ngapo tsadu Kawekudika na mawawio hadu; Lukaakusaṟa ke nawemkape, Ee da, nawemkape nyi Ruwa na iliso wukiwa.

⁵ Kimnengie kakapo ado nyi njonyamaṟo tsadu, Kawemamiṟo kipfa kyadu, Mwaanduye fulya fuweluwaṟi so fukakaa huyake.

⁶ Luwerahanyikie lose cha machondi, Orio umu nawehalukie ora loke, Na Mndumii nawemdikie o njonyamaṟo tsadu so lose.

⁷ Nalewonyio indi kakunyiiṟa, Ma aletambaṟuo dumbu lyake-pfo; Cha ichondi lyidao kishinjionyi, Ili menyi o lyo alioda; Lohi aletambaṟuo dumbu lyake-pfo.

⁸ Kui iwonyio na ianduyo walembada, Nyiu echiidima ionguo kyake? Nalewuto kiidi kya wandu wa isanga; Kakapo kipfa kya madeko ha wandu wako.

⁹ Wakambika ṟungunyi hamu na wawicho. Kawepfa kimu na wasuṟi, Awewutie kiwicho pfo, Awehambie kindo na dumbu lyake pfo.

¹⁰ Kikachihiṟa Mndumii, kamlisa wukiwa, karihinyika; Ilindi echihaluo moo foke kidaso kya wunyamaṟi, nechiwona wa oshari loke, nawade moo mleshe. Shilya Mndumii akundi shechihoya owokonyi loke.

¹¹ Nechiwona kilimu kya wukiwa woke nachihiyo. Kui wuṟango wo mṟundi oko ai na wusumhanyi. Nawehaluo wafoi wenyi wusumhanyi, Nao naweduo mawicho hawo.

¹² Ko ikyo njechimhawia mooko foke hamu na wanene, Nawehawa shicheye shidenyi hamu na walya wai mbahanyi, Kipfa nalereka moo foke itane opfu, Katalio kimu na wadeko. Nalekudika manyamaṟo ha wandu wafoi Na iterewia wadeko.”