YESAYA 52 - Bibilia Kui Mdedie fo Kimochi

Mndumii nechikiṟa Yerusalemu

¹ Kure, kure, kuṟike pfinya, Iyo Sioni! Ṟaa nguwo tsapfo njicha, Ee Yerusalemu, mṟi Mwele. Kyamba wulalu kuwode momu Fo mndu alamdine ma afanyi ngafu Echiida na ipfo mṟinyipfo.

² Kutakuta kiluli kikuwode na iyo nokure, nodamie, iyo Yerusalemu; Dambuo shipfungo sha nzingo yapfo, Iyo mana o Sioni umpfunge.

³ Kipfa Mndumii nahamba adi, “Mulekumbo wulya; nanyo mochikiṟo kulawode fesa.”

⁴ Kipfa Mndumii-Ruwa nahamba adi, “Wandu wako ilyi mboko walesoka na Misri kundu wakaepfo wai wahenu; na Mwashuru kawawonyia kulawode kitewe.”

⁵ Kyasia, wulalu nkiki njiwuta iya, Mndumii ahamba, “Kokoya wandu wako waledao wulya? Iwo waiwaitoṟia, wafahia, Mndumii ahamba, rina lyako lirumo mfiri puti.

⁶ Koikyo wandu wako wechimanya Rina lyako; kipfa wechimanya mkonu fulya ke nyi inyi njideda; ambuya nyi inyi.”

⁷ Chandu hai mecha mafumvuhu Madende ha ichu arie mbonyi njicha, Ichu aionguo ofoṟo, Arie mbonyi njicha ko shindo shicha, Ichu aionguo ofoṟo na Okiṟo, Aiwia Sioni, “Ruwa opfo naikolonyia!”

⁸ Ṟu lya waringi wapfo, Wairia maṟu hawo waimba kimu; Kipfa wechiwona riso kui riso, Chandu Mndumii awuya awuka Sioni.

⁹ Irienyi maṟu ha sia, imbenyi kimu, Nyo Yerusalemu handu hawei wukiwa; Kipfa Mndumii nawihiṟia moo wandu wake, Naashuo Yerusalemu naladao wusingenyi.

¹⁰ Mndumii natambaṟuye owoko loke luele Oshangunyi lo wandu wa mkambo fose; Na oruka lose, Lochiwona okiio lo Ruwa odu.

¹¹ “Hendenyi konu, hendenyi konu, wukenyi ipfo, mulapaaye kindo kifanyi; wukenyi kiidi kyake; muwe waele nyo mukeri iduo shihia sha Mndumii.

¹² Kipfa mulechiwuka owinyi, ma mulechidicha, kipfa Mndumii nyi echimusongoya; na Ruwa o Israeli nechimuosha numa; namuringe.

Mṟundi o Mndumii-Ruwa

¹³ “Ambuya mṟundi oko nechiwuta na wuṟango, nechiṟumisho, na iirio huye, nao nechikaa huye mnu.

¹⁴ Chandu wafoi waleṟihisho, (kyamu kyake kiwenyamaṟikie mnu kota mndu oose, na wumba lyake kota mndu o wandu),

¹⁵ nyi wudo echiṟihisha mamiingi; wamangi wechitsia sau; kipfa shindo walawawie wechishiwona; na mbonyi walalemetsiicho wechitsimanya.”