YESAYA 51 - Bibilia Kui Mdedie fo Kimochi

Madedo ha sia ko Sioni

¹ “Njiadanyienyi, nyo muishiha kilya kisumuhanyi; nyo mui ishiha Mndumii; ambuyeni iṟaṟa lilya mulewutoho kui ilitsana, na ṟungu lilya mulewutoho kui ilisuma.

² Ambuyenyi Abrahamu, wandeyanu, na Sara momufee; kipfa lilya awei umu tupu njilemlaha, ngambikia ona, ngamhaluo wafoi.

³ Kipfa Mndumii nawihiṟia mṟi fo Sioni moo; nahaluo nuka ya msanga ikawa cha mdemi fo Edeni, na pata cha dema licha lya Mndumii; seko na sia shechiwono kiidi kyake, iana na ṟu lyeimba.

⁴ “Njiadanyienyi inyi, nyo wandu wako, njiadanyienyi wa mkambo foko; kipfa wuwawaso wuwukie koko, na inyi njechisiṟa moo mwanduye foko, fuwe sa ya wandu.

⁵ Wulohi woko wui hafui, okiṟo loko lui pang'a, na mawoko hako hechianduya njoshari tsa wandu; oruka luilutengetie nyi mṟinga lochitirima, lochikusiria owoko loko.

⁶ Irienyi meso huye ruwehu, mwambuye oruka wanda; kipfa ngina yechideka cha mtsu, oruka lochiwa masaṟa cha nguwo na iwo waipfo wechipfa, indi ofoṟo loko lochiwa lo mlungana, na wulohi woko wochiwutoho pfo.

⁷ “Njiadanyienyi nyo wewuta sha wusumhanyi, wandu wawode chila yako mrimenyi yawo, mulaowuo shirumo sha wandu, ma mularihinyike imina lyawo.

⁸ Kipfa ngama yechiwalya cha ili ilya nguwo, na fusa yechiwalya cha ili ilya njonyi; indi wulohi woko wochikaa mlungana, na okiṟo loko lochidungana shishari shose.”

⁹ Kure, kure, karishia! Ee, owoko lo Mndumii. Kure cha shiheri shilya sha mboko, kiidi kya shishari shilya sha kacha.

¹⁰ Chi iyo kulemanya-manya Rahabu? Kuletocha njoka iya? Chi iyo kulehadutsa ipalyipalyi, Na mṟinga fo oṟoo lung'anyi; Kulewika njoṟoo tsa nduwa tsiwe njia, Kundu wandu wakiṟe waideho?

¹¹ Iwo wai wakiṟe nyi Mndumii wechiwuya, wechishika Sioni, wechiimba; sia ya mlungana yechiwa huya mdo yawo; Fowa na iluo shechidicha.

¹² “Inyi, ee, inyi njekewihiṟia moo; iyo nyiu itane oowuo mndu echipfa, na mndu echiwa cha maṟa?

¹³ Kohadima Mndumii, ichu alekuwika iyo, aleala ngina na iweha otende lo oruka; na iyo koowuo mfiri puti kipfa kya nyashi ya ichu mowonyia, ili akuṟeheṟie inyamaṟa; nyashi yake yewonyia yeeku?

¹⁴ Ichu alesamiṟo na ikumbo kipfungonyi nyechipfunguyo owinyi; ma echipfa nasotsio rinenyi-pfo, ma kelya kyake kechipechuka-pfo.

¹⁵ Kipfa inyi nyi Mndumii-Ruwa opfo, njekefoha ipalyipalyi, masinanu halyo hakaṟuṟuma.

¹⁶ Mndumii menyi Matoṟito nyilyo rina lyake. Ambuya ngawika madedo hako dumbunyi lyapfo, na inyi ngakuwika shia ria lya owoko loko, kundu njiwanze ngina na oruka luwade pfinya, na iwia Sioni ‘Nyo nyi wandu wako.’”

Mtsitsioni fo wukiwa wo Yerusalemu

¹⁷ Kure, kure, hoṟoka, iyo Yerusalemu! Iyo ulenyo owokonyi lo Mndumii, Kitela kya kirahu kenango, Kokinyo kokimarisa.

¹⁸ Kuwode ma umu mokusongoyapfo Kiidi kya wana wose ulefee, Kuwode ma umu mokuwada kuwokopfo, Kiidi kya wana wose kulewadosa.

¹⁹ Shindo shi shiwi shakuhoya; Nyiu echiidima isokyo nyi fowa kyapfo? Uwodo nyi fowa na inyamaṟika, njaa na oshu. Njiidima njida ikukarisha?

²⁰ Wana wapfo wauma, Walee mbai ya njia njilandari tsose, Cha mtonyi odehonyi; Iichuo nyashi ya Mndumii-Ruwa, Kiṟache kya Ruwa opfo.

²¹ Kyasia, kipfa kya isho, uadanyie idedo li, iyo uleliso wukiwa, na inango, indi chi mvinyo pfo;

²² Mndumii, Mndumii opfo na Ruwa opfo, ichu modeda handu ha wandu wake nahamba adi, “Ambuya ngawuta kirahu kilya kenangio owokonyi lopfo, na kirahu kilya kiichuo nyashi yako ochikinyooya-se-pfo;

²³ njechikidambikia watuuri wapfo; iwo walekuwia hongoma kundu so luide; itane ohaluo mhongo fopfo fuwe njia ya madende ya iwo weida-ho.”