YESAYA 5 - Bibilia Kui Mdedie fo Kimochi

Kiimbo kya dema lya msabibu

¹ Njikundi iimba kiimbo ko mkunde oko, kiimbo kirianyi na idema lyake lya msabibu. Mkunde oko nawewode dema lyake lya msabibu, Handu hakuirie kokeṟaa mnu;

² Kasuma mfongo kaṟingichia riti, Katola pfo maho kulya demenyi, Kawaaya pfo mbeu njicha tsa msabibu, Kawika mnaṟa fo ringa kiidi kya mdemi, Kasuma na kiwaha kekamia, Kakusira ke msabibu fulya fuwechiṟaa. Ate fukawika ndunda tsa nduo.

³ Na wulalu, nyo wandu wa Yerusalemu, nanyo wa Yuda, dumbuonyi, ngamuterewa, kiidi kyako na dema lyako lya msabibu

⁴ Ngesa, nyi iṟunda liki liwewaṟi litanyio dema li lilalewuto? Kyasia ili mbekusaṟie liwechiṟaa msabibu njicha likawika nduo nyiki?

⁵ Kyakusia, wulalu njimuwia, chando njechitana mdemi fo msabibu; njechisanja kilya keshikia nafo fochilio; njiwewunduo na omombo lokyo, nalo lochichumochumo;

⁶ na inyi njechilinyamaṟa; kuwode modema ma isisapfo, lyechialutsa mbeche na msha; nyi njechiima mapuchi halalekie mvuo inose ho.

⁷ Kipfa mdemi fo msabibu, fo Mndumii menyi Matorito nyi mba ya Israeli na wandu wa Yuda, ni njana yake sa ncha, kalanga iwona mwanduye fo lohi, ate nalewona iwonyia; kalanga iwona lohi, ate kaicho kilio.

Mawuto mawicho wandu waiwuta

⁸ Ochia lo walya waiengeṟa mba numa ya mba na iwika dema hafui na dema, kulawonoho handu, nanyo kimuwaṟi ikaa handu hamu muwenyi orukenyi.

⁹ Mndumii menyi Matoṟito nadeda madunyi hako, “Nyi kya lohi mamba hafoi hechiwa wukiwa, ye da, mamba hang'anyi, mecha, hechituṟa wandu.

¹⁰ Kipfa dema lya msabibu lishikie eka ikumi lyechiwuta kienga kitutu kishikie chupa imu, na mowaaya ndunda tsishikie idewe limu nechisambuo pakuṟi imu.”

¹¹ Ochia lo walya walawa ikure ngamenyi kilawo, waoshe wunanzi; wakatsinda pfo mfiri puti itane kio makidi hawi, itane wari woaka cha modo kiidi kyawo.

¹² Kuwode-pfo, shinanda na shilya sha ndusu na mtoṟiṟo, na mtingo na mvinyo, isho shose shii kiidi kya mfuho yawo; kyaindi waiambuya iṟunda lya Ruwa pfo, ma ikusaṟa mawuto ha mawoko hake.

¹³ Kui kipfa ikyo wandu wako wawaduo wapfungo, kipfa kya ituṟa wuṟango na wulaanyi; na wandu wawo wawode kiṟumi wawodo nyi njaa, na wengi wawo wawodo nyi nyoda ing'anyi.

¹⁴ Ko ikyo ko waṟumu koengeṟa lango lyake, kuasami kukaeṟa; na kiṟumi kyawo, na mfoeṟa fowo na kifahio kyawo, na ulya mochihiyo kiidi kyawo, nekesoka kaolokiapfo.

¹⁵ Na mndu mfari kahongomitso, na mndu ang'anyi kasuka na meso ha walya wekudosa hakasotso.

¹⁶ Indi Mndumii menyi Matorito ameṟumisho, kiidi kya mwanduye, na Ruwa-chu Mwele namwilishe kiidi kya wulohi.

¹⁷ Nyi lyondi shidahina sha machondi, shechilya maṟa hasho shishenyi, kiidi kya mṟi iya iledeo ilawode mndu ikasamo, wahenu wechilyapfo kando.

¹⁸ Ochia lo walya wekuruo wunyamaṟi na ndusu tsa wukika, na wunyamaṟi na ndusu cha tsa magari.

¹⁹ Wahamba, owinyi kambiṟa iṟunda lyake kundu mliwone; naende mbonyi tsake ichu ai Mwele o Israeli, kundu luliwone.

²⁰ Ochia lo walya wehamba ke wuwicho nyi wui wucha, na wucha nyi wuwicho; wewika mema handu ha saa, na saa handu ha mema, wewika uwawo handu ha mlodo, na mlodo handu ha uwawo.

²¹ Ochia lo walya wenyi wulaanyi ipfo mesonyi hawo wawenyi, na wenyi wuṟango ipfo mahionyi hawo wawenyi.

²² Ochia lo walya wakutana waapfinya kui inyo mvinyo, wandu wasoṟo wawode pfinya, yelongalonga mṟinga fonanza,

²³ nyi walekia menge ili watsutsuma, na ichu awinga wamfurunjia ikuwonia kilya kisumhanyi.

²⁴ Ko ikyo chandu olewo lo modo lokerumatsa mashaku maumu, na natsi yaoloka modonyi na wudo rina lyawo lyechiwa owicho, na kiwaṟo kyawo kiwiwito huye nyi otanu cha kiluli; kipfa waleha iwawaso lya Mndumii menyi Matorito, na ipiṟa idedo lya ichu Mwele o Israeli.

²⁵ Nkyo kimaduma nyashi ya Ruwa yechiakia oshari loke nahende iluhoṟoya owoko loke, nalukape itane mafumvu hechidedema, mnying'a yalyo ilae njienyi tsa mṟinyi cha kyala kya mambuṟo; Hamu na isho nyashi yake ilehalukia haleshepfo, indi owoko loke luluhoṟuo itane wulalu.

²⁶ Nao nechidosa bendeṟa kipfa kya mkambo wokia aleshe Nao nechikapa mṟoṟi wokia mtsitsioni fo oruka, Ambuya wechicha owinyi owinyi wechidicha.

²⁷ Kiidi kyawo kuwode molehela ma ikapa mtulia pfo, Kuwode mohombia ma ilaa mado pfo; Manya okowa lo shitsi shawo lochilolomapfo, Manya ngowa tsa shadu shawo tsedumbuka pfo;

²⁸ Mfi yawo injohi, na wuda tsawo tsinjileme; mbahachu tsa frasi tsawo tsi njiumu cha maho; Oṟo tsa magari hawo tsi cha otanu luapfinya;

²⁹ Iringona lyawo lyechifanana na lya mwiso; Wechiringona cha maalea ha mwiso; Ee, wechiringona na iduo wapfungo, Na iwaduo na ihenda kipuo, Kulechiwoneka mowakiṟa.

³⁰ Wo wechiringona huyawo mkonu fo Cha idihina lya ipalyipalyi; Na mndu kaambuya oruka, nechiwona meema na wukiwa, Na ngela yechiwa mema kiidi kya mapuchi hake.