YESAYA 49 - Bibilia Kui Mdedie fo Kimochi

Israeli: saa ya wandu wa mkambo

¹ Njiadanyienyi, nyo njoruka tsitengetie nyi mṟinga, dehenyi madu nyo njoshari tsa wandu mui kuleshe mnu; Mndumii nalenjilaha wokia wusunyi; wokia wusunyi wo wama oko kanjisenda rina lyako.

² Nao kahaluo dumbu lyako cha oshu luohi; kanjishikia na kiṟinje kya owoko loke; kanjihaluo mfi fumnuo; kiidi kya shaha yake kanjiṟika;

³ Kanjiwia, “Iyo nyi mṟundi oko, Israeli, kiidi kyapfo njechiṟumisho.”

⁴ Indi ngahamba, “Njilekuwinyisha wulya, njileṟunda kui pfinya tsako wulya kulawode kiira;” kyaindi mwanduye foko fui na Mndumii, na wueri woko wui na Ruwa oko.

⁵ Na wulalu Mndumii nahamba adi, ichu alenjiwumba wokia wusunyi njiwe mṟundi oke, kundu njimwendie-se Yakobo, na Israeli wakusanyie oshangunyi loke-se; (kipfa inyi njilewona Kiṟumi oshangunyi lo Mndumii, na Ruwa kawa pfinya tsako;)

⁶ yee, nahamba adi, “Nyi idedo litutu mnu iyo iwa mṟundi oko kundu noire oshari lo Yakobo, na iwihiṟa wandu wa Israeli wawei wateseheṟe; kake njechikuwuta uwe saa ya wandu wa mkambo, nowe okiṟo mtano mtsitsioni fo wuyana.”

⁷ Mndumii mkiṟi o Israeli, Mwele oke, nawia adi ichu ammine nyi wandu; ichu asuikie ko oshari lu lo wandu; ichu ai mṟundi o iwa waitoṟie; “Wamangi wechiwona, wechihoṟoka; wanene nawo wechipfira ndi; kipfa kya Mndumii ai mhendeli, Mwele o Israeli alekusambuṟa.”

Yerusalemu yasungusio wuhya

⁸ Mndumii nahamba adi, “Mkonu fuwei mṟeheṟe njilekuhaluo, mkonu fo okiṟo njilekutarama, na inyi njechikuringa, njechikuwuta uwe mkundano fo wandu wa, kundu noire oruka lu na iinengia walya wawaṟi okiṟo lowo walya wawei wakiwa;

⁹ iwia wapfungo hendenyi na iwo wai meemenyi kuloṟenyi. Wechilya kiidi kya njia, na huya maṟaṟa wechiwona maṟa.

¹⁰ Wechiwado nyi njaa ma nyodapfo; wechiwona ngumia ma mbaṟipfo kipfa ichu mowasaṟia nechiwateteṟa.

¹¹ Na inyi njechihaluo mafumvu hako hose hawe njia, na njia tsako tsing'anyi tsechiwada kiṟumi tsose.

¹² Ambuya iwa wose waicha wawuka kuleshe; ora lo mtsudu na wengi ora lo kyukanyi na wengi oruka lo Sinimu.”

¹³ Imbenyi nyo ngina; chihiyo, iyo oruka; Irienyi maṟu heimba, nyo mafumvu; Kipfa Mndumii nalesaṟya wandu wake, Nao nechiwaichio wukiwa walya waletuuro.

¹⁴ Kyaindi Sioni nyi alehamba, “Mndumii nanjida, Mndumii nanjihadimie.

¹⁵ Ngesa mndu mka nechiidima ihadima mana oke aionga, alechisaṟia mana o wusu woke?” Ee, iwa wechiidima ihadima, kyaindi Inyi njechiidima ikuda na ikuhadima iyo-pfo.

¹⁶ Ambuya njikapie ofano lopfo mahinyi hako, na mawanda hapfo hai oshangunyi loko kitsitsi.

¹⁷ Wana wapfo wakambiṟa owinyi ikuchea iwo wekenyamaṟa, walya walekutana wufafa naawo, wechiwuka kopfo.

¹⁸ Iria meso hapfo noambuye njora tsose, iwo wose wakeri ikusaya wakucheye. So Ruwa ai na moo nochiṟaa shiwukie konu shi shicha, cha mana mshiki ahenda walinyi amṟike necha.

¹⁹ Kipfa kui mbonyi tsa handu hapfo hawelolomi, na handu kulawekekao nyi mndu, na oruka lopfo luwenyamaṟikie, nyi kya lohi lochisisia lulechishika ma wenyi-ho; na walya walekutuura wechikaa haleshe.

²⁰ Wana walya kulesoko wechideda madunyi hapfo wehamba, “Handu-ha hai hasise kunjishikie-pfo, njineenga handu njiidime ikaa ang'u njisehiya njikae necha.”

²¹ Nalyo uwoke ikuwesa, “Nyiu alenjifeeye wana-wa na inyi njiichi ke walya njilefee walepfa, na inyi njimonyi njilesamiṟo ngawa moṟahaṟaha ipfo na ipfo? Nyiu aleende iwa? Ambuya njiledeo njimonyi; iwa nyiku wawei?”

²² Mndumii-Ruwa nahamba adi, “Ambuya njechiiria owoko loko huye ya mkambo fo wandu na iwairia bendeṟa yako; nawo waende wana wapfo shipetenyi shawo na wana wapfo wa kika makosohu hawo.

²³ Wamangi wechiwa wandee wapfo welela, na wakamangi wawo, wamayo wapfo welela; wechihongoma na iho wanda na kyamu oshangunyi lopfo, wakombe kiluli kii madendenyi hapfo, na iyo nomanye ke inyi nyi Mndumii, na walya wenjiwedia wechisonu-pfo.

²⁴ “Ngesa ichu ai mbahanyi nechiwa isoka shilya awadie shidenyi ang'u mamiingi fowo fui mpfunge fochikia fuda?

²⁵ Ee, Mndumii nahamba ke manya mamiingi foke fumpfunge fo ichu ai ngohoda fochiwuto mawokonyi hake, na iwa walewado wapfungo wechiashuka wose; kipfa inyi njechianduo na ichu moanduo na iyo, inyi njechiendie wana wapfo okiṟo.

²⁶ Iwo wekekuwonyia njechiwarutsa nyama tsawo wawenyi, nawo wechinango kui samu yawo wawenyi wainyo, cha mvinyo fo kipfuo; wandu wose wamanye ke inyi nyi mkiṟa opfo njii Mndumii menyi Matoṟito o Yakobo.”