YESAYA 48 - Bibilia Kui Mdedie fo Kimochi

Ruwa aonguo mbonyi tsechicha

¹ Adanyienyi isho wandu wa mba ya Yakobo, mokelaho kui rina lya Israeli, muwukie mṟingenyi fo Yuda; mkelya nyamu kui rina lya Mndumii na isenda rina lya Ruwa o Israeli, indi chi kui lohi-pfo na chi sungusihu-pfo.

² Kipfa mokekulaha nyi wenyi mṟi Mwele, moketaramo nyi Ruwa o Israeli; Mndumii menyi Matoṟito nyi lyo rina lyake.

³ Inyi njileonguo mbonyi tsa kacha wokia mboko; yee, tsilewuka dumbunyi lyako, ngahamanya; ngawewuta naho hakawoneka oweṟe nalo.

⁴ Kipfa njilemanya ke iyo nyi uwode mtolo, na nzingo yapfo nyi ya menya, na kyaanda kyapfo cha aṟeṟa;

⁵ kyasia njilekuloṟa wokia kacha; ma mbonyi tsi tsilamehoya njilekuloṟa; kundu ulahambe ke sanamu yako yawuta ishi; sanamu yako yepacha, na sanamu yako yesalaṟa, yo yawawasa.

⁶ Noicho ishi; ambuya ishi shose; nanyo ngesa mochishionguo? Ngakuloṟa mbonyi njihya wokia kiheri ki, yee, mbonyi tsiwei njiṟike kulatsiichi.

⁷ Tsileumbo wulalu, ma chi wokia kacha-pfo; ma lulameshikia mkonufu uleicho mbonyi tsi-pfo; ulashike ihamba, ambuya, mbetsiichi.

⁸ Lohi uleichopfo; lohi uweichipfo; yee, wokia kacha kudu kopfo kuleṟuhukapfo; kipfa njiweichi ke iyo nokeṟunda na mtambo ifoi, na iyo kolaho nyi mdeko wokia kuifeo kopfo;

⁹ Kipfa kya rina lyako njechiilacha nyashi yako, na kipfa kyapfo njechikwima, kundu njiṟumisho, njilawone njekuarisia wanda.

¹⁰ Ambuya ngakusanja, kyaindi chi cha fesa pfo; ngakusambuṟa kiidi kya ngumia ya matuuro.

¹¹ Kipfa kya mrima foko inyi njechiwuta ishi; ngesa rina lyako lifanyitso? Kuwode sa njechimnenga kiṟumi kyako-pfo.

Koreshi msambuṟe o Ruwa

¹² “Njiadanyia inyi, iyo Yakobo; na Israeli, njilekulaha; inyi nyio mboki na mwawutsi.

¹³ Nyi lohi owoko loko lulewika otende lo wuyana, na owoko loko lo kulyo luleala ngina; ili mandi njeketsilaha tsekehoṟoka tsose handu hamu.

¹⁴ Kusanzenyi, nyo mose, muicho; nyiu kiidi kyawo aleonguo ishi? Mndumii namkunda; nechiinutsia shose chandu akunda ko Babeli, na owoko loke lochikaa huye ya Wakalidayo.

¹⁵ Inyi, yee, inyi, ngadeda; yee ngamlaha; ngamwende, nao nechiiṟimiṟa njia yake.

¹⁶ Njisembelienyi, adanyienyi ishi; wokia mawookionyi njilededa kiṟika-pfo; wokia shiipfo inyi njiipfo; na wulalu Mndumii-Ruwa nanjiduma, na mrima foke.”

Mahiyo ha Ruwa ko wandu wake

¹⁷ Mndumii, mkiṟa opfo, Mwele o Israeli, nahamba adi, “Inyi nyi Mndumii, Ruwa opfo, njekekulosha kundu uwone kiira; njikekusongoya kiidi kya njia ikuwaṟi iosha.

¹⁸ Samanya, uwechiadanyia mawawaso hako, nyi lyo mandi ofoṟo lopfo luwechiwa cha meda fo mṟinga, na wulohi wopfo cha masinanu ha ipalyipalyi;

¹⁹ Kake, oshari lopfo luwechifo cha msanga, na iwo walewuka wusunyi wopfo cha mbeṟeheke tsake, rina lyake lyechiwa ihadimapfo, ma iwuto oshangunyi loko.”

²⁰ Wulalu wukenyi Babeli, Dichenyi muwuke ko Wakalidayo; Onguo kui maṟu heimba, onguonyi ishi, Hambenyi mtano mtsitsioni fo oruka, muhambe, “Mndumii amekiṟa mṟundi oke, Yakobo.”

²¹ Walewado nyi nyoda kulya nuka-pfo; Kawuta mṟinga ihohu kipfa kyawo; Karandauo iṟaṟa, mṟinga fukawukaho ko pfinya.

²² Kuwode ofoṟo ko wawichopfo, “Mndumii ahamba.”