YESAYA 47 - Bibilia Kui Mdedie fo Kimochi

Mwanduye fo Babeli

¹ Na wulalu soka nodamie kilulinyi, iyo mkeha, mana o kika o Babeli; damia wanda kulawode loṟika lo wuitoṟi, iyo mana o waka o Wakalidayo; kipfa ochilahose nyi ui mrendekelipfo mokunda sia.

² Duo iseo, nose mso, Kuatuo oṟo yapfo, kuatuo maṟao hapfo; Shukuo kudende kopfo; Ida kiidi kya meda ya mṟinga.

³ Kitaṟe kyapfo kechishukuyo, Ee, sonu yapfo yechiwono. Njechitaa kiṟache; njiidikie mndu ose pfo.

⁴ Mkiṟa odu, Mndumii menyi Matoṟito nyilyo rina yake, Mwele o Israeli.

⁵ Tsia sau, ida na ipfo memenyi, Iyo mana o kika o Wakalidayo; Kipfa ochilaho se nyi mka-mangi-pfo.

⁶ Njiwesuuye wandu wako, ngafanyitsa ngafu kyoṟa kyako ngawawika mawokonyi hapfo; iyo ulewasaṟia-pfo; noledika wameekuṟio lyapfo, lilemeri mnu.

⁷ Kohamba, “Inyi njechiwa mkeku mlungana;” ma kudo isho kuleshiwika mrimenyi fopfo-pfo, manya ulekumbuo ifurumia lya shindo sho-pfo.

⁸ “Kyasia, wulalu, adanyia ishi, iyo ukundi useṟeṟi, okekuwona ke nyi uwode mkuachie ui kipuo, iyo okededa mrimenyi fopfo ke; ‘Inyi nyio inyi, kulawode ungi shila na inyi njechidamia cha mkusu-pfo, manya njechiidima ipfiio nyi wanapfo.’

⁹ Kyaindi nomanye ke ishi shechikuhoya oweṟe lumu, mfiri fumu nopfio nyi wana na icheyo nyi wukusu; shechikuhoya mkonu mteṟie, wusawi wopfo ma wuwechifo na wuhanga wopfo wukang'ana.

¹⁰ Kipfa nokusirie mawicho hapfo, nohambie, ‘Kuwode anjiwonyipfo;’ wulaanyi wopfo na wuṟango wopfo, wokudetsa na iyo kohamba mrimenyi fopfo, ‘Inyi nyio inyi kulawode ungi shile na inyi.’

¹¹ Kipfa kya ikyo wuwicho wochikuhoya; kulechimanya mandi wochisia; na ndenga yechikuchea ulechiidima ikushowa, na isukio nyi moo lyechikuchea oweṟe lumu kulakusirie.

¹² Hoṟoka wulalu na wuhanga wopfo, na mfoeṟa fo wusawi wopfo, uwekuwinyishie nawo wokia uwanakenyi wopfo; kofia nochiidima iwona kiira, kofia nochiidima iwinza.

¹³ Norohiyo kipfa kya mfoeṟa fo mondu yapfo; kyasia wahoṟoke iwo waichi shiheri, weambuya nyenyeri, wehamba shisuku orio meri shindo sha merifo, wakukiṟe na shindo shechikuhoya.

¹⁴ Ambuya, wechiwa cha mashaku maumu; modo fochiwarumatsa, wechiidima ikukiṟa na olewo lo modopfo; fochiwa okaa looda modopfo, ma modo fokaa kufuipfo.

¹⁵ Nyi wudo mbonyitso tsechiwa itso ulekulisa natso wukiwa; walya walekapa mbucha na iyo wokia uwanake wopfo wo nyi wechiṟaha-ṟaha kuleshe na iyo, orio mndu kechihenda koke, kulechiwada mndu mokukiṟa.”