YESAYA 46 - Bibilia Kui Mdedie fo Kimochi

¹ Beli naho wanda, Nebo nahongoma; sanamu tsawo tsii huye ya mando hai na moo, na huye ya mbe; shindo shilya muwekeri ishiduo kunu na kunu, mukaṟahaṟaha nasho shiwei mhanda, mhanda folemeṟa indo lyekudika lileheli.

² Wahongoma wakakuhongomitsa wose handu hamu; waleidima ikuwuta mhandapfo, indi wo wawenyi wahendie ipfungo.

³ Njiadanyienyi, lanye mba ya Yakobo, nyo mui mtsuhaṟo fo mba ya Israeli, muledao nyi inyi wuka wusunyi muleiro wokia mui wusunyi;

⁴ mṟasa wuku wonu inyi nyio, mṟasa kiheri kyanu kya mhasa njechimuduo; njileṟunda, na inyi njechiduo; ee, njechiduo na ikiṟa.

⁵ Mochinjifananyitsa nau, na injiṟinganyitsa nao, na injihoṟotsa nao, kundu luṟingane?

⁶ Wandu wepusuo sahabu iwuka mfukonyi yawo na iwika fesa huye ya kihia kehesha wuhuru, wakaduo wanganya wa sahabu na iwawika iṟundenyi lya wunganya wakatsana ruwa; wakahoneria na iho wanda na kyamu.

⁷ Wekemduo makosohu hawo, wakaweduo sanamu yo wakaihoṟotsa; yechiidima iteshukaho ma ndambu imupfo; kokoya ailaha yeidikiapfo, kipfa yekeichopfo, ma kudo yechiidima imkiṟa kiidi kya ngataṟa tsakepfo.

⁸ Kumbuonyi isho, mukuloṟe ke mui wasoṟo, wianenyi ishi nyo mokedeko;

⁹ kumbuonyi mbonyi tsa mboko; kipfa inyi nyi Ruwa kulawode ungi; Inyi nyi Ruwa kuwode ai cha inyi pfo,

¹⁰ ekeedia wokia mawookionyi mṟasa mtsitsioni, kuwode kilewutika ang'u kiwutikie kilai nyi ikunda lyakopfo, ngahamba chila yako yechiafukia na inyi njeṟunda kilya ngakunda.

¹¹ Ngalaha ndehe njiwawo iche ora lo ngamenyi, mndu o chila yako nawuke oruka lo kuleshe; ee ngadeda na inyi njechikuṟundia; njilangie na inyi njechiṟunda.

¹² Njiadanyienyi nyo muwode ngoo njitumuhari, mui haleshe na wukiilohi;

¹³ Inyi njiende wukiilohi woko hafui wochikaa haleshepfo, okiṟo loko lochikeleopfo; inyi njechiwika okiṟo loko ipfo ko Sioni kipfa kya Israeli wuitoṟi woko.