YESAYA 45 - Bibilia Kui Mdedie fo Kimochi

Mndumii-Ruwa asambuṟa Koreshi

¹ Ishi nyisho Mndumii aiwia Koreshi ichu amshimbuo, ichu njilewada owoko loke lo kulyo, kundu natoromishe mkambo fo wandu oshangunyi loke, inyi njechidedemisha wamangi kundu njihaluo mongo yawo pang'a, kulechishingo ma fumu.

² Njechihenda kusonguo njisaye handu halai hecha; njechifunja-funja mongo ya aṟeṟa, na idumbuo-dumbuo matima ha menya;

³ njechikuinenga shisa sha memenyi na masaa hamaṟike handu ha kisekenyi, kundu nomanye ke inyi nyi Mndumii, njekekulaha kui rina lyapfo, Ee, Ruwa o Israeli.

⁴ Kipfa kya Yakobo mṟundi oko na Israeli msambuṟe oko, ngakulaha kui rina lyapfo; ngakuinenga rina lya wusuṟi, ma chandu ulanjiichi.

⁵ Inyi nyi Mndumii ma kuwode ungipfo; ngoseṟa yako kuwode Ruwapfo; njechikupfunga na okowa ma chandu ulawenjiichi,

⁶ kundu wamanye wokia kilawo mnengeṟi fukundi ido, na mnengeṟi fuolokie, kulawode ungi cha inyi; Inyi nyi Mndumii, kulawode ungi.

⁷ Inyi njilewumba saa, na kio naawo; inyi njekesanza wandu, na iwutaho wuwicho; Inyi nyi Mndumii njekewuta isho shose.

⁸ Ombokenyi, nyo ngina wuka huye, Mapuchi haletse wulohi; Oruka luṟuhuke luende okiṟo, Nalo luwute wulohi shidosane, Inyi Mndumii, njilewika ishi.

Wuidimi wung'anyi wo Ruwa

⁹ Ochia lo ichu molimbana na momuumba, kyoho kimu kiidi kya shoho sha oruka. A lohi teri iwese icho aiwumba, “Nkiki ukeri iwuta?” Ang'u iṟunda lyapfo. Awode mawoko?

¹⁰ Ochia lo ichu mowia ndee, “Nkili ulenjifee?” Ang'u wama nkili ulenjiende wuyana?

¹¹ Mndumii, Mwele o Israeli na ichu ale Muumba nahamba adi, “Njiwesenyi mbonyi tsa shindo shekaa shiche; na mawoko hako; ee njiwesenyi.

¹² Inyi njilewumba wuyana, ngawika mndu mowuitoṟia; Inyi njimonyi na mawoko hako da, njileala ngina, na iwawasa Matoṟito hayo hose.

¹³ Inyi njilemuira kiidi kya wulohi, inyi njechihoṟotsa njia tsake tsose; njechiwika mṟi foko, nao nalekie wandu wako walesamiṟo, kulawode itaa fesa ma iinengo kindo kya nnga,” Mndumii menyi Matorito ahamba.

¹⁴ Mndumii nahamba adi, “Iṟunda lya Misri, na shindo sha mbucha sha Kushi, na Waseba, wandu waleshe, wechikuchea, nawo wechiwa wapfo; wechikuosha; wechicha wai wapfunge nyi shiwoho sha menya; wo nyi wechioloka wanda oshangunyi lopfo, wechikuterewa, wehamba, ‘Nyi lohi Ruwa ai kiidi kyapfo; ma kuwode-se ungipfo, kuwode Ruwa ungi sepfo.’”

¹⁵ Nyi lohi iyo nyi Ruwa ulya ekeṟika mbihu fopfo, Hoi Ruwa o Israeli mkiṟa.

¹⁶ Wechisonu, ee wechieṟewe, wose piu; walya wesungusia sanamu wechiwado nyi wuowu wung'anyi mnu.

¹⁷ Kyaindi Israeli wechikiṟo nyi Mndumii kui okiṟo lo mlungana; nyo mochisonu, ma isukio nyi moo-pfo, kipfa Mndumii nyi ai nanyo mlungana na mlungana.

¹⁸ Kipfa Mndumii ichu alewumba ruwehu nahamba ke o nyio Ruwa; nyio alewumba wuyana; nyio alewuwanza; alewumba wawe wulyapfo, nalewumba kundu wandu wakae kiidi kyawo; Inyi nyi Mndumii kuwode ungipfo.

¹⁹ Njilededa kui kiṟika, handu ha memenyipfo; njilewia oshari lo Yakobo; Njishihenyi wulya pfo; Inyi Mndumii njideda lohi; njideda mbonyi tsa osaaṟe.

Mndumii o wuyana na sanamu tsa Babeli

²⁰ Sanzenyi muche; na itikiria hafui, nyo wa mkambo fulekiṟo; wawode wuṟango walya weduo sanamu ya ikidi lipachepfo; nyi weketerewa ruwa alechiidima ikiṟa.

²¹ Onguonyi mbonyi, hambenyi oloho; ee da! Wadenyi chila kimu; nyiu aleloṟa ishi wokia mboko? Nyiu aleonguo mbonyi oo mawookionyi? Chi inyi Mndumii? Manya kulawode Ruwa kota inyi; Ruwa menyi wulohi, mkiṟa; kulawode ungi ngoseṟa yako.

²² Njiambuyenyi inyi mukiṟo, nyo njora tsose tsa wuyana; kipfa inyi nyi Ruwa kulawode ungi.

²³ Ngalya nyamu yako inyi, idedo lyi liwukie dumbunyi lyako kiidi kya wulohi, manya lyechiwuyapfo, ke oshangunyi loko orio ndi ikuleme, na olimi lulye nyamu.

²⁴ Umu nechinjiwia ko Mndumii amonyi, kuwode wulohi na pfinya; ee wandu wechihenda koke, na wose walemsuuya wachiṟeenze.

²⁵ Kiidi kya Mndumii oshari lose lo Israeli wechiinengo wulohi na kiṟumi.