YESAYA 44 - Bibilia Kui Mdedie fo Kimochi

Mndumii-Ruwa nyio Ruwa amonyi

¹ Adanyia wulalu iyo Yakobo mṟundi oko; na Israeli njilekusambuṟa.

² Mndumii-Ruwa chu alekuwika na ikuwumba wuka wusunyi, ichu echikutarama nahamba adi, “Kulaowuo iyo Yakobo mṟundi oko, na iyo, Yeshuruni njilekusambuṟa.

³ Kipfa njechiletsia mṟinga foko mdohu ko ichu amwangari na shimeda handu hahadutsu; njechipusuya Mumuyo foko huye ya oshari lopfo, na ona loko ko iwo ochiwafee,

⁴ wo wechicha wawuka maṟenyi, cha maṟa hai kufui na mfongo fo mṟinga.

⁵ Umu nechihamba, ‘Inyi nyi o Mndumii na ungi nechikulaha kui rina lya Yakobo’ na ungi naṟehie owokohu loke, ‘Ko Mndumii’ na ikulaha ko rina lya Yakobo.’”

⁶ Mndumii, Mangi o Israeli, mkiṟa opfo, Mndumii menyi Matoṟito nahamba adi, “Inyi nyi Mawokioonyi na Inyi nyi moinutsia; ngoseṟa yako kuwodepfo ma kuwode Ruwa ungipfo.

⁷ Nao nyiu echilaha na ionguo ishi, na injiṟeheṟia wokia njilewika wandu wa mbooko? Na mbonyi tsechicha na iwoneka, waonguo kyatso.

⁸ Mulaowuo, mulawuko madima; ngesa njileonguo na iloṟa ishi wokia mbooko? Nanyo nyi wangochi wako. Ngesa kuwode Ruwa ngoseṟa yako? Nkya lohi kuwode Iṟaṟa-pfo; inyi njiichi ungipfo.”

Wutondo woindia sanamu

⁹ Wepacha sanamu wose nyi wulya; ma mbonyi tsawo tsiwachihiṟie tsechitarama kindopfo; ma wangochi wake wawonyipfo ma waichi-pfo; kundu waṟeenze.

¹⁰ Nyiu alemetsana ruwa umu ang'u kasalaṟa sanamu ilechitarama kindo?

¹¹ Ambuya, wanawamae wechihoyo nyi sonu; na waaria, wo nyi wandu; wakuumbie handu hamu, wahoṟoke; wechiowuo na iwado nyi sonu wose handu hamu.

¹² Mnganya nyeketsana soka, nyekeṟunda kwi modo fo okaa, kasungusia sanamu kechikapa na kiria, nekeṟunda kui owoko loke; ee da, kaweicho njaa, pfinya yake ikasokia, kokoya alanyo mṟinga kauma.

¹³ Mwaria mopacha mashidi nekehoṟotsa orusu; katarucha na kalamu ya mada; kaiṟeheṟa na kihia kepacha, kawada na shihia shilya sha uwaria woke, kawika ofano lo mndu, ofano lucha mnu, kundu lukae kanyi koke.

¹⁴ O nekeshiha mashidi mecha mawanzi na halya ha wuhuru wung'anyi hamu na mashidi ha ngeṟenyi; kawaaya hengi hakaoṟa ili mvuo yanosa.

¹⁵ Heketarama mndu kui ngu kiteno kimu kaoda modo; kaatsa modo, kakoṟa mkate, yee kafuhaluo ruwa, kafuindia; nekesungusia sanamu yepacha, kaiterewa.

¹⁶ Ora lumu nekerumatsa; ora lungi kalya nyama; kakoṟa kelya kekoṟo kaihuda, kaoda modo kahamba, “Wai ngaoda modo, ngawona modo;”

¹⁷ kienga kiledeoho kikasungusia ruwa, sanamu yake yepacha, yeketerewo na iindia, kaiterewa kahamba, “Unjikiṟe, kipfa iyo ui ruwa oko.”

¹⁸ Waichi manya ikusaṟapfo; kipfa nawashingie meso walawone na mrima yawo walaidime imanya.

¹⁹ Kuwode ma mndu awikie mrimenyi, ma kuwode wuṟango; ma imanya ihamba, “Njirumatsie kenga modonyi ngakoṟa mkate huya makaa; ngakoṟa nyama ngailya, a inyi ngoseṟa njihaluo kiwe kiwi kiwicho? Ale njiṟingishie na iindia itsuwa lya ikidi?

²⁰ Nekelya ifu; mrima fulelembo fulemdetsa, nalaidime ikiṟa sha mrima foke, na ihamba kiidi kya mrima foke nalaidime ihamba, ‘Sanamu i njiwode kunu mawokonyi hako chi Ruwa pfo.’”

Mndumii-Ruwa, echihadima Waisraeli-pfo

²¹ Kumbuo ishi iyo Yakobo; na iyo Israeli, kipfa iyo nyi mṟundi oko njilekuumba; nyi mṟundi oko; Iyo Israeli ochiwa ihadimopfo.

²² Njilesanja madeko hapfo cha ipuchi linene, na wunyamaṟi wopfo cha ipuchi; wuya na koko; kipfa njilekukiṟa.

²³ Imbenyi nyo ngina kipfa Mndumii amekuwutia isho; Fahiyenyi nyo mapichi ha oruka; Iriyenyi maṟu ha shiimbo nyo mafumvu; Na iyo ngeṟa na orio ikidi kiidi kyapfo. Kipfa Mndumii akiṟa Yakobo, Nao nechikuṟumisha kiidi kya Israeli.

²⁴ Mndumii ai mkiṟa opfo nyio alekuumba wusunyi, o nahamba adi; “Inyi nyi Mndumii njeketana shindo shose; njialie ngina yose, ngamanyika orukenyi, nyiu ai na inyi?

²⁵ Njekenyamaṟa shichano sha wewuta wongo, na ihaluo wahanga wawade oṟuṟe; njekewihiṟa walaanyi na numa, ngahaluo wuṟango wowo wutondo;

²⁶ Njekewanza idedo lya mṟundi oko; ngaweshitsa chila ya wadume wako; njekewia mṟi fo Yerusalemu ke nochiwada wandu kiidi kyapfo na mṟi ya Yuda, yechiwiko na inyi njisungusie handu halya hawundukie;

²⁷ inyi njekewia ipalyipalyi, mṟinga fusoṟowie na inyi njiumiṟe meda yapfo;

²⁸ inyi njekewia Koreshi, mlisi oko na icho mowuta shilya njikundi; mṟasa nadedie Yerusalemu, nochiwiko; na hekalu lyo, otende lopfo lochiwiko.”