YESAYA 43 - Bibilia Kui Mdedie fo Kimochi

Ruwa awika kyasa kekiṟa wandu wake

¹ Na wulalu, Mndumii-Ruwa alemuumba nyo wana wa Yakobo, kamuheluo muwe wandu welaho Waisraeli nahamba adi, “Manya kulaowuo; ngakulaha na imulaha kui rina lyako nyo nyi wandu wako.

² Koida kiidi kya mfu fo mṟinga njii nanyo; koida kiidi kya meda ifoi yechikuoweshapfo; kiidi kya modo, ochisenekia pfo manya olewo lo modo lochikukoṟapfo.

³ Kipfa inyi nyi Mndumii-Ruwa opfo; njii Mwele kopfo iyo Israeli, mkiṟa opfo, ngawuta Misri iwe njoko na Kushi hamu na Seba kipfa kyapfo.

⁴ Nyi uwekeri o wuhuru wung'anyi oshangunyi loko, na awode kiṟumi, na inyi ngakukunda; kipfa kya ikyo njechiwuta wandu kipfa kyapfo na oshari lo wandu kipfa kya moo fopfo.

⁵ Manya kulaowuo; kipfa njii hamu na iyo; njechikuendie oshari lopfo wuka ora lo ngamenyi mṟasa ora lo kiukanyi;

⁶ njiwie mtsudu wuta; na iyo nuka, kulaime; njiendienyi wana wako wawuka kuleshe na wana wako wawaka wawuka mtsitsioni fo oruka.

⁷ Orio umu amlahe kui rina lyako, njilemuumba kipfa kya kiṟumi kyako; inyi njilemuumba; ee da, inyi njilemtana.”

Israeli nyi mwongochi o Mndumii-Ruwa

⁸ Ende shipfupfuṟe wawode meso, na wawode madu indi walekeicho.

⁹ Wasanyio handu hamu wandu wose wa mkambo ya wandu, nyiu kiidi kyawo echiidima ionguo idedo lyi, na iluwia mbonyi tsa kacha? Waende waṟingishi wawo, kokoya wawode wusumhanyi; ang'u waicho wahambe, “Ikyo nyi lohi.”

¹⁰ “Nyo nyi waṟingishi wako, Mndumii ahamba, na waṟundi njilemsambuṟa, ‘Kundu mumanye, na injiidikia, na imanya ke nyio inyi; kuwewode Ruwa ungi aweipfo ma echikaa nakaepfo shile nyio inyi. Ruwa o mlungana na mlungana.

¹¹ Inyi ee da, inyi nyi Mndumii ngoseṟa yako kuwode ungi pfo.

¹² Ngahamba shilya shechikaa shihoye, kuwewode ruwa mhenu kiidi kyanupfo; kui kipfa ikyo nyo nyi waṟingishi wako, Mndumii ahamba, na inyi nyi Ruwa.

¹³ Wokia mkonufu fo inu, nyi inyi; ma kuwode msa echiidima ikiṟa kiidi kya owoko lokopfo; inyi njechiṟunda, nyiu echiidima injiima?’”

Ikiṟo wuka Babeli

¹⁴ Mndumii, mkiṟa onu, Mwele o Israeli nahamba adi, “Kipfa kyanu, kulya Babeli ngadikapfo ndumi, njechiwakapa waṟahe-ṟahe. Wakalidayo wo waiwachihiye kipfa kya shisha sha mṟingenyi wechikapa shilio.

¹⁵ “Inyi nyi Mndumii Mwele onu, mowumba Israeli, mangi yanu.”

¹⁶ Mndumii nahamba adi, “Ichu mowika njia kiidi kya ipalyipalyi na heida kiidi kya mṟinga fuwode pfinya;

¹⁷ kiheri njilekapa wandu wa mbahanyi wawode magari ha shida na frasi; ngawaarisia wanda wechiidima kindopfo, wakaruma cha kimui.

¹⁸ ‘Lekenyi, mulakumbuo mbonyi tsa kuwoka ma ikusaṟa kya shindo sha kacha.

¹⁹ Ambuyenyi, njechiwuta idedo lihya, wulalu kudi; ngesa mochilimanya? Njechiwika njia kundu ko nuka ya msanga, na meda kundu kuhoye olele.

²⁰ Mando hai na moo henjiindia mapaara na nyaha da; kipfa ngahainenga mṟinga kiidi kya nuka ya msanga, na meda kundu kuhoye olele, kundu njirutse wandu wako, wasambuṟe wako;

²¹ walya njilewaumba kipfa kyako njimonyi kundu wahambe kiṟumi kyako.’”

Wunyamaṟi wo Israeli

²² “Indi iyo Yakobo ulenjiindiapfo, nyi ulesuṟa macha na inyi iyo Israeli.

²³ Ulenjiendie machondi hedasapfo; manya mwaano yapfo-pfo. Njilekulisiṟa wukiwa kipfa kya shiinengo-pfo, ma ikutuura kya ipfaamiṟa pfo.

²⁴ Kiṟihishie-se mulenjihuṟia mafuda hepfaama necha kui fesa na mafuda ha shidaso shemaya modonyipfo. Kindo mulewona kicha-kicha ho nyi injilemeṟa na wunyamaṟi wonu na injituura na mawicho hanu.

²⁵ Indi nyi inyi njekehooṟia wunyamaṟi, na madeko hapfo kipfa kyako njimonyi ma njechikumbuo-se wunyamaṟi wopfo-pfo.

²⁶ ‘Njiwia kokoya nowode kitewe na inyi, njo luwiane, hamba mbonyi tsapfo uwone kilya kyapfo kisumhanyi.

²⁷ Wasahuyo o kuwoka nalenyamaṟa, walya wesaya mbonyi wakanjileha.

²⁸ Ko ikyo ngaleha walya weṟundia halya haele, ngasehia Yakobo nakapo kishikie, ngaweleka Israeli narumo.’”