YESAYA 42 - Bibilia Kui Mdedie fo Kimochi

Mṟundi o Ruwa

¹ Ambuya mṟundi oko njimhoṟotsie; msambuṟe oko, ichu mrima foko fuifuchihiṟe nyio; njiwikie Mumuyo foko huyake; nyio echianduya wandu wa mkambo.

² Echifihiṟa ma ifahia-pfo, ma ṟu lyake lyechiichio kiidi kya njia tsing'anyipfo.

³ Iwale lyipaṟikie echilifunjapfo, ma kimui kikenga echikirumishapfo; nechianduo kya lohi.

⁴ Echilehela ma ihutsa machapfo, mṟasa nawike mwaanduye wuyanenyi na njoruka tsii mṟingenyi tsiwedie wuwawaso woke.

Saa ya wandu wa mkambo

⁵ Ruwa Mndumii nadeda, ichu aleumba ruwehu, na itsiala; ichu alela oruka na shilimu shake, ichu ainengie wandu mṟufu wai huyako; ichu moinengia Mumuyo iwo wai kiidi kyake.

⁶ Inyi Mndumii ngakulaha kiidi kya wulohi, na inyi njechikuwada na kuwoko, na ikuringa, na ikuwuta uwe njoko na saa ya wandu wa mkambo;

⁷ iambuṟa meso ha shipfupfuṟe, ipfunguo wai wapfunge, iwuta walya wawedamie meemenyi mbenyi ya wapfungo.

⁸ Inyi nyi Mndumii, nlyo rina lyako; na wuitoṟi woko njechiinenga mndu ungi pfo, manya njechiinenga wandu kiṟumi kyako iwo wai cha sanamu pfo.

⁹ Ambuya mbonyi tsa kuwoka tsametsitsa, inyi njikeri ionguo mbonyi njihya; tsilamecha njimuwia chando kechiwa.

Kiimbo keadapfuma Ruwa

¹⁰ Imbienyi Mndumii kiimbo kihya, Kiṟumi kyake wuka mawookyonyi ha oruka: Nyo mkeri isokia ipalyipalyinyi, na shose shiipfo, na hai hahadutsu kiidi kya mṟinga na wose waipfo.

¹¹ Nuka ya msanga na mṟi yawo iirie maṟu hawo. Shihongo sha Kedari; hamu na walya wa Sela, waimbe, na ifahia wai owerihu lo mafumvu.

¹² Waichike Mndumii, na ionguo kiṟumi kyake kiidi kya oruka luikutengetie nyi mṟinga.

¹³ Mndumii nechikuloṟa cha mbahanyi; Nechiambuya woṟisa cha mndu o shida. Nechifuha, ee, nechifahia; Nechiwutia wakituwa wake mbonyi tsiṟihishie.

Ruwa awika kyasa ketarama wandu wake

¹⁴ “Mfiri ifoi njiwetsie sau; njiwetsie, ngakuima; wulalu njechifahia cha mndu mka ai kufui na iinengo mkoku; njechisumukia na idosa mosiro.

¹⁵ Njechinyamaṟa mafumvu na shitoṟomoso, njechiumiṟa shose shikeri ido; njechihadutsa meda yose, na nduwa tsose tsa mṟinga kulechiwada mṟinga manta.

¹⁶ Njechiende shipfupfuṟe wacheye njia walaiichi; okondo walaluichi nyipfo njechiwateteṟa; njechihaluo meema fuwe saa oshangunyi lowo; na handu haolokie njechiichuṟa isho shose njechishiwuta, manya njechimudapfo.

¹⁷ Wechiwihiṟo numa, wechitaluka iwo wakusirie sanamu tsa maho, na iwia sanamu tsa maho ha wuhuru, nyo nyi ruwa odu”

Waisraeli nyi shipfupfuṟe na pipi

¹⁸ “Adanyienyi nyo mupfiie madu; wonenyi nyo shipfupfuṟe.

¹⁹ Nyiu ai kipfupfuṟe, shile mṟundi oko? Ang'u mpfu madu, cha ulya njimdumie? Nyiu ai kipfupfuṟe shile nyi ulya awode ofoṟo? Ee, kipfupfuṟe, cha mṟundi o Mndumii?

²⁰ Nyi uwonyi shindo shifoi, kyaindi uwikie mrimenyi fopfo-pfo; madu hake hatambaṟukie, indi haichuo kindopfo.”

²¹ Mndumii kachihiṟo, nyi kipfa kya wusumhanyi woke, iichika wuwawaso, na iwung'anyisha.

²² Kyaindi wandu-wa nyi wandu waiwe na iwado shidenyi; wose wa waombotse marinenyi, wawaṟike mbenyi ya wapfungo; wawa nyama nlase, kuwode mowakiṟa pfo; wawado shidenyi, kuwode ma mohamba wihiṟa-pfo.

²³ Nyiu kiidi kyanu echideha kudu koke naadanyie isho? Echiadanyia na iadanyia maheri hecha?

²⁴ Nyiu aleduo Yakobo nawe mpfungo, alewika Israeli mawokonyi ha wasoki? Chi Mndumii? Ulya lulemdekio, kipfa lulaleosha njia tsake na mawawaso hake.

²⁵ Kipfa kya isho kaletsa nyashi yake huyadu, na pfinya ya shida; ikaatsa modo fukamṟingichia njora tsose, ma nalamanye, fukamrumatsa, ma isho nalashiwike mrimenyi foke.