YESAYA 41 - Bibilia Kui Mdedie fo Kimochi

Ruwa awika kyasa Kyetarama Israeli

¹ “Tsienyi sau oshangunyi loko, nyo oruka lui kiidi kya mṟinga, na wandu wa mkambo wawone pfinya njihya; wache na hafui wadede lukumbuhanane kimu kui mwaanduye.

² Nyiu aleira umu awukie ora lo ngamenyi, ichu ai kiidi kya wusumhanyi amlahie madendenyi hake? Amnengie wandu wa mkambo oshangunyi loke, na imshimbuo huya wamangi; nawawuta wawe cha kiluli kui oshu loke, cha muulu fulewiwito nyi wuda woke.

³ Awalatia, aida kipuo kiidi kya njia alalemeichume na odende loke.

⁴ Nyiu ichu aleṟunda na itana kindo-ki, molaha marika wuka mawookionyi? Inyi Mndumii, o kuwoka na mfurumi, inyi nyio.

⁵ “Njoruka kiidi kya mṟinga tsilewona, tsikaowuo; mtsitsioni ya oruka tsilededema kipfa kya wuowu; Wandu wose wakakusanza, wakacha.

⁶ Wakataramana, orio mndu na odoe, orio mndu kawia odoye; Karishia!”

⁷ Mopacha mashidi kawia motsana sahabu; na ichu momamachiṟa na kiria kawia ichu moṟufuṟia natambahane owinyi, kechiṟumisha iṟunda lyelunga, kechihamba, “Iyi iṟunda icha;” nao kaiwanza na msumari ilalekie.

⁸ “Na iyo Israel mṟundi oko; Yakobo njilekusambuṟa; oshari lo Abrahamu, mbuya yako;

⁹ iyo njilekuwada wuka masiionyi ha oruka, na ikulaha wuka ipfo na ipfo, njechikuwia, iyo nyi ui mṟundi oko, njilekusambuṟa manya njilekukumbapfo;

¹⁰ Ma kulaowuo; kipfa inyi njii hamu na iyo; kulawado nyi makangao, kipfa inyi nyi Ruwa opfo; njechikuwika pfinya, ee, njechikutarama, ee, njechikuwada na owoko loko lo kulyo lo wusumhanyi woko.

¹¹ “Ambuya, wose walewona nyashi yako wechitsia na iowuo; wandu wairekiana na iyo wechiwa wulya na isaramaya.

¹² Nochiwashiha ma ochiwona walya waikapana na iyopfo, wechiwa kindopfo; wechiwa cha kindo kilechiwa; walya waleira shida huyapfo.

¹³ Kipfa inyi Mndumii, Ruwa opfo, njechikuwada owoko lopfo lo kulyo, njechikuwia, kulaowuo; inyi njechikutarama.

¹⁴ “Ulaowuo, Yakobo nyi ishinu, nanyo wandu wa Israeli, inyi njechimutarama, Mndumii ahamba, na mkiṟa opfo nyi Mwele o Israeli

¹⁵ Ambuya njechikuhaluo kihia kihya kiohi kekama, kiwode maheho; nochisisa mafumvu, na ihasa, mṟasa mafumvu na shitoṟomoso shawa makanjo.

¹⁶ Nochiwaela nawo wadao nyi otanu; otanu sa lwapfinya lochiwarahanyitsa; na iyo nochichihiṟo nyi Mndumii, nochikuṟumisha kiidi kya Mwele o Israeli.

¹⁷ “Mkiwa na ulya ahuṟi washiha mṟinga, ma kudo kuwodepfo; njolimi tsawo tsinjihadutsu kipfa kya wuangari; inyi Mndumii njechiwaicho, inyi Ruwa o Israeli kya lohi njechiwadapfo.

¹⁸ Njechiṟuhusuo shimeda sha mṟinga shitoromosohu na soka mapichinyi; njechihaluo nuka ya msanga iwe nduwa ya mṟinga, na handu hahadutsu kuwe shimeda sha mṟinga.

¹⁹ Ambuya njechidonga mashidi mecha kundu kui nuka ya msanga, na kundu kuhoye olele kulekealuka kindo kuwe mdemi mcha;

²⁰ kundu wawone na imanya, wakusaṟe handu hamu, ke owoko lo Mndumii nlo luletana ludi. Mwele o Israeli nyio aleumba.

Mndumii-Ruwa amina maruwa ha wongo

²¹ “Wulalu, endenyi madedo hanu Mndumii ahamba; endenyi makusaṟo hanu ha pfinya, mangi o Yakobo ahamba.”

²² Waonguo na ilumanyishia chando shechiwa; waluloṟe mbonyi tsa kacha, nyi mbonyi tsiha luidime itsiwika mrimenyi, lumanye na mtsitsioni fosho; ang'u waludambuye shilya shechikaa shiche.

²³ Luwienyi chandu shechiwa, naso luidikie ke nyo nyi ruwa; ee da, wutenyi mecha ang'u mawicho, lukuheshe, luwone kimu.

²⁴ Ambuyenyi, nyo chi kindopfo, ma maṟunda hanu naho chi kindopfo; mowasambuṟa nyo nyi awuta mawicho hawichuṟie.

²⁵ Ngahoṟotsa mndu wuka mtsudu, nao nacha; woka ora lo ngamenyi nacha mosenda rina lyako; nechichea wachili cha mndu aipochapocha odoko, na cha mndu aiumba shihia sha teri.

²⁶ Nyiu ichu aongoye mbonyi wokia mboko, kundu lumanye? Wokia kacha luhambe, O nyi asumhanyi? Ee, kuwode-ho ma umu alelumanyishia-pfo; kuwode ma umu aleluloṟapfo; kuwode ma umu aleicho madedo hanupfo.

²⁷ Inyi njimonyi njechiwia Sioni, Ambuya iwa nyiwo; na inyi njiinenge Yerusalemu moende mbonyi njicha.

²⁸ Ma ngaambuya kuwode mndu kiidi kya iwa echiidima iwa mchili-pfo, echiidima iweso naweidima ihaluo idedopfo.

²⁹ Ambuya, wose nyi mai na mai; maṟunda hawo chi kindopfo; sanamu tsawo nyi otanu na kifahio.