YESAYA 40 - Bibilia Kui Mdedie fo Kimochi

Mkusirie fo ichiṟo kiidi kya Yerusalemu

¹ Wihiṟienyi wandu moo, wihiṟienyi wandu moo, wandu wako, Ruwa onu ahamba.

² Hambenyi na mrima fo Yerusalemu, wienyi mṟi fo kui ṟu ling'anyi ke shida yake yamesia, wuwicho woke womedeo; kipfa naleambilia ko owoko lo Mndumii ngapo ngeria kawi ko kipfa kya wunyamaṟi woke wose.

³ “Adanyienyi, nyi ṟu la mndu moedya kundu ko nuka, Achikienyi njia ya Mndumii, Teseheṟienyi Mndumii-Ruwa njia, Hoṟotsenyi njia ing'anyi ya Mndumii odu ipfo nuka ya msanga.

⁴ Orio pichi lyechiichuṟo, Na orio fumvu na kitoṟomoso kechisotso; Handu ha mlemeko kochihoṟotso, Na handu hairaharaha ikochisungusio kulechiraha.

⁵ Na Wuitoṟi wo Mndumii wochiwono, Na wose wenyi mbihu wechiwona kimu; kipfa nyi dumbu lya Mndumii lyadeda ishi.”

⁶ Adanyia, nyi ṟu lya mndu aihamba, “Onguo!” Ngawesa, “Njionguo-ki?” Wose wenyi mbihu nyi maṟa; Na wuhendeli woke wose nyi cha kiwaṟo kya pichinyi.

⁷ Maṟa hauma, naiaṟawuka; Kipfa mṟufu fo Mndumii foida huyasho. Wandu wai cha maṟa lang'u

⁸ Maṟa hauma, kiwaṟo kyaaṟawuka, Indi idedo lya Ruwa lyechikaa mlungana.

⁹ Iyo uiongoya Sioni ndumi njicha, Do huya fumvu lileshe; Iyo uiongoya Yerusalemu ndumi njicha, Deda na ṟu ling'anyi; Deda na ṟu lyapfo, kulaowuo; Wia mṟi ya Yuda, “Ambuyenyi, Ruwa onu.”

¹⁰ “Ambuyenyi, Mndumii-Ruwa nakeri icha cha mbahanyi, na owoko loke nlo lochimnenga wuitoṟi. Ambuyenyi, wueri woke wui nao, Na wunene wui hamu nao.

¹¹ Nechilisa po lyake cha mlisi, Nawesanyia machondi hake mawokonyi hake; Nawaduo kipetehu kyake. Na iwo waionza nechiwaduo kyomboho.”

Ruwa o Israeli awode mfananopfo

¹² Nyiu alemehesha mṟinga na mahi ha owoko loke, na ihesha ruwehu na kihesha shindo, na iwada kiluli mboṟikonyi, na ihesha mafumvu na kihia kehesha na shitoṟomoso ngesa?

¹³ Nyiu alesongoya mumuyo fo Mndumii, na imlosha kipfa awei mnjama oke.

¹⁴ Nyiu alechila nau, nyiu alemduo kisomionyi, nyiu alemlosha chandu echianduo na imloṟa wulaanyi hamu na imlosha wuṟango?

¹⁵ Ambuya, wandu wa mkambo nyi kimu na itacha lyikeri ipipenyi, weketalo ke kiluli kii kihienyi kehesha; apaa, nekeira nduwa tsesumo tsa mṟinga cha kindo kitutu mnu nakamu.

¹⁶ Lebanoni ishikie ko-ngu-pfo, na shuma shishikie ko-kidaso-pfo.

¹⁷ Wandu wa mkambo wakawa cha walai kindo oshangunyi loke; wai waitale cha kindo kya maai na wulya kilawode kiira.

¹⁸ Wulalu nyo mochiṟinganyisha Ruwa na kiki? Ang'u nafanane na waki?

¹⁹ Afanannyi na sanamu pfo, kipfa sanamu yekesalaṟo nyi mwaaria umu, na mnganya o sahabu nekeiwika handu, nao kawetsanaho mshe ya fesa.

²⁰ Ulya ai mkiwa mnu echiidima iwuta mwaano fo mbaṟi ii, nekesambuṟa ikidi lilakepuo, kashiha mwaaria kalihoṟotsa kalipacha kalihaluo sanamu ileidima ikupayapaya.

²¹ Ngesa muweichi? Muleicho? Mulewio wokia mbooko? Muweichi wokia otende lo wuyana lulamewiko?

²² Nyio ekedamia huya oṟo ya wuyana na iwo wekekaa kiidi kyake wekefanana na ndatari; nyio ekeala ruwehu cha kitambaa, na ioṟowuo cha ihema lyedamilia,

²³ Nyio ekewuta wanene na ilacha wedumbuo mondu ya wandu wa wuyana.

²⁴ Ma walewaayapfo; walewiko terinyi cha mbeupfo; ee itsinde lyawo lilewika mri kiidi kya teri pfo. Kake nawaifilia tupu, wakanaa, otanu lo kiwiri-wiri lowaṟukuta cha mashokola maumu.

²⁵ “Mochinjifananyitsa nau, kundu luhiane?” Nahamba ichu ai Mwele.

²⁶ “Irienyi meso hanu huye, muwone; nyiu aleumba ishi; akeende mbahanyi ichekeṟo lyawo ko itala; nekelaha wose kui marina; kui wunene na wuidimi woke, na kipfa nyi mndu awode pfinya tsake, kuwode ilai handu hakepfo.”

²⁷ Nkili uihamba, iyo Yakobo, nkili uideda iyo Israeli, “Njia yako injiṟike Mndumii nalaiwone, na mwanduye foko fuidie Ruwa oko nalafuambuye?”

²⁸ Ngesa iyo kulemanya? Kuleicho? Oo Ruwa o mlungana, Mndumii, mowumba mtsitsioni fo wuyana, ekeuma, ma ilehela-pfo; wuṟango woke wochiwa isonjokoṟapfo.

²⁹ Nekeinenga pfinya iwo wauma, nekeengeṟia pfinya ichu alawode pfinya.

³⁰ Ee da! Wanake wa womi wechilehela na ioloka.

³¹ Kyaindi iwa wewedia Mudumii wechiinengo pfinya njihya; wechido huye na makungo cha mbeṟo; wechiwika mteṟa, ma walechilehela; wechichumia na madende, walechiuma.