YESAYA 39 - Bibilia Kui Mdedie fo Kimochi

Wadume wawuka Babeli

¹ Maheri-ho Merodaki - baladani, mana o Baladani, mangi o Babeli, naleduma paruo na shindo sha nnga ko Hezekia; kipfa naleicho ke nawei mrohie, na wulalu nalechia.

² Hezekia kachihiyo kyawo, kawaloṟa mba yake na shindo sha wuhuru, fesa na sahabu, na upfudano, na mafuda ha wuhuru wung'anyi na mba yose iwode shisha sha shida, na shindo shose shileidimika iwoneka kiidi kya kisa kyake; kuwewode kindo ma kimu kiwei kanyi koke ma kiidi kya wumangi woke alalewaloṟa-pfo.

³ Naalyo Yesaya mwikimbi kahendia mangi Hezekia kambia, “Wandu-wa walehamba kiki? Nawo nku wawukie wakacha na kopfo?” Hezekia kahamba, “Wawukie oruka lo kuleshe, wakacha wawuka Babeli.”

⁴ Nao kambesa, “Nkiki wawona kiidi kya mba yapfo? Hezekia kamhaluo, wawona shindo shose shi kunu kanyi koko; kuwode kindo ma kimu ma kisa kyako njilalewaloṟa-pfo.”

⁵ Nalyo Yesaya kawia Hezekia, kyasia, wulalu adanyia idedo lya Mndumii menyi Matorito.

⁶ “Ambuya kukeri icha mkonu fumu shindo shose sha mba yapfo na shindo shishiwike kisa nyi ndeo shechidao shose mṟasa Babeli, kuwode kindo ma kimu kechideo-pfo,” Mndumii ahamba.

⁷ Na kiidi kya wana wapfo iwo maata-ho uwafeye wawukie kopfo, wechiwaduo kuleshe; nawo wechiwa manzenge kiidi kya mba ya mangi o Babeli.

⁸ Naalyo Hezekia kahaluo Yesaya kambia, “Idedo lyi lya Mndumii alelideda nyi licha.” Kake kambia, “Kipfa kochikaa pfo ofoṟo na lohi kiidi kya mkonu yako inyi.”