YESAYA 38 - Bibilia Kui Mdedie fo Kimochi

Mangi Hezekia aluo

¹ Maheri naho Hezekia kaluo mnu, kufui naipfa; na mwikimbi Yesaya mana o Amozi, kahenda ko mangi, kambia, Mndumii nahamba adi, “Sungusia mbonyi tsa mba yapfo; kipfa na kikaki nochipfa ochikiapfo.”

² Kyasia Hezekia kakuindutsa kaambuya mahandenyi katerewa Mndumii,

³ kahamba, “Hoi Mndumii kumbuo wo ishi ngakuterewa, njilechumia njienyi tsisumhanyi, ngawewa mhendeli na mrima fukusirie kopfo njechiwuta mecha oshangunyi lopfo.” Hezekia kafihiṟa mnu mnu.

⁴ Kikashika idedo lya Mndumii likachea Yesaya, lyehamba,

⁵ “Henda uwie Hezekia Mndumii-Ruwa o Dawidi ndeo, nahamba adi, ‘Inyi njileicho shiterewo shapfo, ngawewona na mchenyeṟe yapfo; ambuya njechiengeṟa mkonu yapfo handu ha maka ikumi na itanu (15) ngoseṟa.

⁶ Na inyi njechikukiṟa iyo na mṟi fu, na owoko lo mangi ya Ashuru, na inyi njechiringa mṟi fu.

⁷ Idedolyi lyiwe kichano kopfo, kiwukie ko Mndumii, ke Mndumii nechiinutsia kindoki akideda.

⁸ Ambuya njechiwihiṟa kiṟinje makamba ikumi nduma, kilya kilesoka huya ngasi ya ilewiko nyi Ahazi. Kiṟinje kilya kikawuya nduma makamba ikumi.’”

⁹ Iha nyiho maṟeho ha Hezekia, mangi ya Yuda, lilya mandi aweluo, kawuya ichia ndaṟe iya iwembode.

¹⁰ “Njilehamba, kiheri kilya kya iwanga lyako njechiida kichuminyi kya waṟumu; Njileimo mtsuhaṟo fo maka yako.

¹¹ Njilehamba, njechiwona Mndumii pfo, kiidi kya oruka lo wenyi moo; njechiwona mndu o wanduse hamu na iwo wekaa wuyaneni.

¹² Kidembo kyako kikiwuteho kyose, kikadao cha hema lya mlisi; Ngalema ohendo loko cha mopfuma nguo, nechinjiwaha nanjikumbe haleshe hamu na kitaṟa kepfumia. Wokia mfiri mṟasa kio wenjimarisa.

¹³ Njiletirisia mṟasa ngamenyi cha mwiso; nafunja mafuo hako hose. Wokia mfiri mṟasa kio wenjimarisa.

¹⁴ Njifihiṟa cha mbeta, Ngasokio nyi mfowa cha mbeta; meso hako hakadao njeambuya huye; hoi Mndumii, njilewonyio, wa mkaṟa oko!

¹⁵ Njihambe ki? Oo nadedie na inyi, nao amonyi nawutie isho; njechihenda kimbuho maka yako yose, Kipfa kya isukio nyi moo.

¹⁶ Hoi Mndumii, Kipfa kya mbonyi tso wandu wekekaa na moo; Na moo fo mrima foko fui kiidi kya isho; Koikyo unjikiṟe na injiwihiṟia moo.

¹⁷ Ambuya; njiwekuinadye mnu kipfa kya ofoṟo loko; Kyaindi kipfa kya injikunda nolenjikiṟa na rina lyesaramaya; Kipfa nolekumba njonyamaṟo tsako tsose nduma yapfo.

¹⁸ Kipfa ko waṟumu kochiidima ikuṟumishapfo, Opfu lochiidima ikung'anyisha pfo, Walya wesokia rinenyi wechiidima ikusiria wulohi wopfo-pfo.

¹⁹ Ai na moo, ee da, ai na moo, nyio echikuṟumisha cha inyi inu; Wande nechimanyishia wana wulohi wopfo.

²⁰ Mndumii nakuṟeheṟie injineenga okiṟo. Kyasia, kui shinanda lochiimba shiimbo shako, Mfiri yose ya moo mbenyi ya Mndumii.”

²¹ Kipfa Yesaya nahamba, “Waduo mkate ya mkuyu wawike huye ya ode, nao nyi echichia.”

²² Kake Hezekia nyi awehambie, nyi kichano kiki kinjiloṟe ke njechikaa njido njiide mbenyi ya Mndumii?