YESAYA 37 - Bibilia Kui Mdedie fo Kimochi

Mangi ashiha mbonyi ko mwikimbi Yesaya

¹ Kyasia mangi Hezekia kekiicho ado, karanduo nguwo tsake, kaṟaa nguwo tsa masaṟa na makunyia, kaida na mbenyi ya Mndumii.

² Kaduma Eliakimu, ichu awe mohoṟokia mba yake, na Shebna mṟehi, na wameeku wa wakohanyi, nawo waṟee masaṟa na makunyia wahende ko Yesaya mwikimbi mana o Amosi.

³ Wakambia, “Hezekia nahamba adi, mkonu fu nyi mkonu fo kiwi, na sonu, na shirumo; kipfa wana washikie ifeo, ma kuwode pfinya tsewafee pfo;

⁴ Kofia Mndumii-Ruwa opfo nechiidima iicho madedo ha mnenechu o shida, iha aledumo nyi mangi o Ashuru, mndumii oke, kundu narume Ruwa menyi moo, na Mndumii, Ruwa opfo, nechidedia madedoho alehaicho; kyasia, wika kiterewo kyapfo kipfa kya mtsuhaṟo fuletsuhaa.”

⁵ Kyasia waṟundi wa mangi Hezekia wakahenda ko Yesaya.

⁶ Yesaya kawawia, henda wienyi mndumii onu madedo ha; Mndumii nahamba adi, “Kulaowesho nyi madedo halya kulehaicho, halya waṟundi wa mangi o Ashuru walenjiruma.

⁷ Ambuya njechiwika mumuyo kiidi kyake, nao nechiicho ndirimo, nawuye mṟasa orukenyi loke amonyi, na inyi njechimwolotsa na oshu orukenyi loke amonyi.”

Waashuru waowesha-se

⁸ Kyasia mnene ulya o shida kawuya, kakoya mangi iya ya Ashuru nakeri ikapana na Libna; kipfa naleicho ke nakure-ho, kadaho Lakishi.

⁹ Nao naleicho mbonyi tsa Tirhaka, mangi ya Kushi ke nakure kundu nakapane na iyo; nao kekiicho ado kaduma ndumi ko Hezekia kehamba,

¹⁰ “Wienyi Hezekia, mangi ya Yuda, madedo ha, mochihamba, ‘Nalakulembe Ruwa opfo ichu umkusirie, kehamba, Yerusalemu yechishio mawokonyi ha mangi ya Ashuru-pfo.’

¹¹ Ambuya omeicho mbonyi tsa shindo shose, chandu wamangi wa Ashuru walewutia njoruka tsose, kechitsiarisia wanda, ngesa iyo nochikia?

¹² Ngesa maruwa ha wandu wa mkambo iwo wandee wako walewaarisia wanda walewakiṟa? Gozani, na Harani, na Resefu, na wana wa Adini wawekeri kiidi kya Telasari?

¹³ Ooku mangi ya Hamathi, na mangi ya Arpadi, na mangi o mṟi fo Sefarvaimu, fo Hena na fo Iva?”

¹⁴ Kyasia Hezekia kaambia paruo ko walya awewadumiye, kaisoma; kiidima Hezekia kakure kado kahenda mbenyi ya Mndumii, katambaṟuo paruo iya oshangunyi lo Mndumii.

¹⁵ Hezekia katerewa Ruwa kahamba,

¹⁶ “Hoi Mndumii menyi Matorito, Ruwa o Israeli, ukeri huya makerubi, iyo da iyo kumonyi nyi iyo Ruwa o wamangi wose wa wuyana. Nyi iyo ulewika ruwehu na oruka.

¹⁷ Deha kudu kopfo, Mndumii uadanyie; tambaṟuo meso hapfo, Mndumii, uwone, ukeicho madedo ha Senakeribu aledika kundu narume Ruwa menyi moo.

¹⁸ Nyi kya lohi, Mndumii, wamangi wa Ashuru walenyamaṟa njoruka tsose, na madema hawo,

¹⁹ na ikoṟa maruwa hawo modonyi; kipfa iwo wawei maruwapfo, indi nyi waiwawike kui mawoko ha wandu; wawei mashidi na maho nyikyo kitewe wakawanyamaṟa.

²⁰ Kyasia wulalu Mndumii, Ruwa odu ulukiṟe na owoko loke, wamangi wose wa wuyana waidime imanya ke iyo nyi iyo Mndumii, iyo kumonyi tupu.”

Ndumi ya Yesaya ko Mangi

²¹ Naalyo Yesaya mana o Amozi kaduma ndumi ko Hezekia kechihamba, “Mndumii-Ruwa o Israeli nahamba adi wai, ‘Kyamba omenjiterewa kipfa kya Senakeribu, mangi ya Ashuru le,

²² kidedo Ruwa adeda kiidi kya mbonyi tsake nyi iki, mana mkeha Sioni nakumina, kakuisalucha mnu; mana mkeha Yerusalemu nasingitsa mdo foke huyapfo.

²³ Nyiu ulemsutsa na imruma? Noiria ṟu lyapfo kou, na iiriya meso hapfo huye? Nko Mwele o Israeli.

²⁴ Nosutsa Mndumii ko waṟundi wapfo, ko kipfa nohamba, kui mfoeṟa fo magari hako njidoye shitoṟomosohu sha mafumvu, mṟasa handu ha mba ha Lebanoni; na inyi njechimanya mashidi hake maleshe ha meresi, na maopanyi halya mecha, na inyi njechiida na handu hake hakuirie, hai haleshe mnu, ngeṟenyi kundu kuwode mdemi foṟaa mnu.

²⁵ Ngasuma nduwa nganyo mṟinga, na kui ndifo tsa madende hako, meda yose ya Misri ikaumia.

²⁶ ‘Ngesa uleicho? Nyi inyi njilewuta isho shose wokia kacha, wokia mṟamna ngawewuta ngainutsya wulalu, shiwe nyi iṟunda lyapfo lyenyamaṟa mṟi iya iwode mfiṟiha, iwe mrapu na orumatso.

²⁷ Nkyo kitewe wenyi mṟi walawade pfinya wakawuko madima, na ieṟewe, wakawa cha machuwo ha patenyi, cha njana tsa maṟa, cha maṟa hai kai, cha mdemi fo ngano ilamewiṟa.

²⁸ Kyaindi njikuichi idamia lyapfo, iwuka lyapfo, na iwuya lyapfo; na irihinyika lyapfo ulenjirihinyikia.

²⁹ Na kipfa kya irihinyika lyapfo, na kipfa kya makusaṟo hapfo hafoi halenjikoya hakaida na madunyi hako, ambuya njechiwika kalapu yako kiidi kya mbuo yapfo na kimenya kya frasi dumbunyi lyapfo, na inyi njechikuwihiṟa na njia iya iya uleichea.’

³⁰ ‘Na kopfo kichano nyi iki; maka-fu mochilya shelya shidoye shienyi mulashiwaaye; na maka fo kawi mochilya shilimu sha mbeu yasho; na maka fo kaṟaṟu wayenyi mbeu, msambuo; waayenyi msabibu kiidi kya madema, mlye ndunda tsa msabibu yo.

³¹ Na walya wakiṟe wechitsuhaa, wa mba ya Yuda, wechiengeṟeka na ifo chandu ikidi lyekewuta mri ifoi terinyi na ikumbia ndunda huye.

³² Kipfa kiidi kya Yerusalemu kochiwoneka wechitsuhaa, na walya wechikia kiidi kya fumvu lya Sioni; nyi pfinya ya Mndumii menyi Matoṟito yechiinutsya ishi.’

³³ ‘Kyasia Mndumii nahamba adi kiidi kya mbonyi tsa mangi o Ashuru, “Oo echiida kiidi kya mṟifu-pfo ihesha mfi iya, manya echicha na ngawo-pfo, manya iwika mfiṟiha.

³⁴ Njia iya alecha nayo, nayo echiwuya nayo, ambuya, echiida na mṟinyipfo;’ Mndumii ahamba.

³⁵ ‘Inyi njechiringa mṟifu, njifukiṟe kipfa kyako njimonyi, na kipfa kya Dawidi, mṟundi oko.’”

³⁶ Kyasia malaika o Mndumii kakure, kawaha wandu shiku ihana na makumi nyanya na watanu (185) handu kuwei cha handu hesia moo ko Waashuru, ngamenyi kiheri walekure otuko, ate iwo wose wawei mnying'a.

³⁷ Naaho Senakeribu, mangi ya Ashuru kakure kahenda piu, kashika Niniwe kakaapfo.

³⁸ Kikashika kiheri awei iindia ruwa lyake lyelaho Nisroki, Adrameleki na Shareza, wana wake, wakambaha na oshu; wakadichia oruka lo Ararati; nao Esar-hadoni, mana oke, kawada wumangi kachilia handu hake.