YESAYA 34 - Bibilia Kui Mdedie fo Kimochi

Mndumii-Ruwa nechihoṟuo wakituwa wake

¹ Tikirienyi, nyo mkambo fo wandu, muidime iicho; adanyienyi, nyo njoshari tsa wandu; wuyana wuicho, na ikyo kiwuichuṟie, oruka na shose shekewuto nyi lo.

² Kipfa Mndumii nasuo na iwado nyi nyashi huya wandu wa mkambo wose, na nyashi njiwawo huya mamiingi fo wamesa wake wose; nawarumatsie piu, nawawutie wahende ishinjo.

³ Wandu wake wai wawaahe waiwakumbe nja, na mdao fo mnying'a yawo fochido huye, na mafumvu hechisalaṟo nyi samu yawo.

⁴ Na itoṟito lyose lya ruwehu lyechipaṟatsano, na ngina yechioṟowio na ilemolemo cha njonyi, na itoṟito lyawo lyose lyechinaa cha iṟa lya msabibu ili lyanaa na iaṟawuka, na chandu iṟa lya msinepfu lyekenaa na iaṟawuka.

⁵ Kipfa oshu loko lunyooe na ihuda ruwehu; ambuya lochisokia Edomu, na huye ya wandu wa oseso loko, kundu waanduyo.

⁶ Oshu lo Mndumii luihutsu samu, lonuo kui wunoru, kui samu ya shidahina-sha-machondi na mburu, kui mafuda ha shiho tsa masuwa; kipfa Mndumii nawode kidaso ipfo Bozra, na ishinja ling'anyi kiidi kya oruka lo Edomu.

⁷ Na siṟo tsechisoka nawo, na tsilya tsedema hamu na mapung'a, na oruka lochinanzo nyi samu, na kiluli kyalo kechinuo, kipfa kya shindo sha wuhuru.

⁸ Kipfa nyi kiheri kya kiṟache kya Mndumii maka fotao kundu wakapanyie Sioni.

⁹ Shimeda shawo shechiilacho shiwe lami, na kiluli kihaluke kiwe kibiriti na teri yechihaluka iwe lami ya modo.

¹⁰ Yechirumisho mfiri manya kiopfo, mtsu foyo fochido huye mlungana; wokia kishari mṟasa kishari kochiwada fowa; kochiwada mndu echiida kiidi kyakepfo - mlungana na mlungana.

¹¹ Makudukudu na makuru nyiho hechiikolonyia, naho oruka lukae lui mrapu.

¹² Wechiwuya ilahiya wanene wawo wumangi, indi wechiwakoya pfo.

¹³ Osha lochido kanyi kowo, mbawa na mbeche kiidi kya mfiriha yake; naho kochiwa kanyi ko mapaara na, kiwaṟo kya nyaha.

¹⁴ Malehe ha nuka hechikoyana na shisii, na kyoṟo kechilaha odoe; eeda, mnene o waṟufu nechicha nashihe handu hesiamoo hai hecha.

¹⁵ Ipfo ikudukudu lyechiwikiapfo mapoṟe na ihalaaya shilea shikamepaṟo, lisanyie shialeasho handu hamu wanda ya maṟishe; napfo nyi kochikuumbiapfo mbeṟo.

¹⁶ Ambuyenyi kitapunyi kya Mndumii musome; kuwode manya umu o iwo echiwuṟika-ho pfo, kuwode motuṟa odoepfo; kipfa dumbu lyako lyawawasa, na ngoo yako ikawasanyia.

¹⁷ Nao nyi alewakapia kuṟu kuhya, na owoko loke naluhawie ko kiwoho; wechiitoria itane mlungana, wechikaa kiidi kyake kishari na kishari.