YESAYA 30 - Bibilia Kui Mdedie fo Kimochi

Mkundano fo wulya na Wamisri

¹ “Ochia lo wana wanyamaṟi; Mndumii ahamba; wakundi madedo ha chile indi chi koko inyipfo; wakushikia indi chi kui mumuyo fokopfo; kundu waengeṟe wunyamaṟi huye ya wunyamaṟi;

² wahenda wechisokia Misri manya walenjiwesa kindopfo; nyi kundu wakuṟike pfinya, pfinya tsa Farao, tsechiwa sonu yanu, na ikusiria ria lya Misri.

³ Kyasia, pfinya tsa Farao tsechiwa sonu yanu, na ikusiria ria lya Misri lyechiwa iangalala lyanu.

⁴ Kipfa wanene wake wakeri Soani, na walya wai wadume wake washikie Hanesi.

⁵ Wose wechiwadia sonu wandu welechiidima iwatarama, walawode kindo ma kiira, indi nyi sonu na iterengio.

⁶ Otambahaluo lo mando hai na moo ha Negebu, Makidi hawi ha oruka lo wukiwa na waale, Kokewukapfo mwiso ika na mwiso isoṟo, Njoka na njoka ya modo yerunduka; Wekeduo masaa hawo makosohu ha nzoi njikoho, Na shisa shawo huye ya sisi ya ngamia, Wahende ko wandu walechiwatarama kindo.

⁷ Kipfa Misri yekewatarama wulya, kulawode kiira, kwi kipfa ikyo ngalaha, Rahabu adamie katsia sau.”

Wandu walemeri iidikia

⁸ Wulalu, henda, ṟehia idedo li ihohu mesonyi hawo, tarucha kiidi kya kitapu kundu kiwe nyi ngumbuo maheri hakeri icha, kundu kiwe nyi kiṟingishyo mlungana na mlungana.

⁹ Kipfa wandu wa nyi wandu wa omino, wana wehamba wongo, wana walakundi iwada chile ya Mndumii;

¹⁰ Wekewia walya waloṟi, mulawone; na waikimbi, ma mulaikimbe kindo kii lohi, luwienyi madedo mahoo, onguonyi madedo helemba;

¹¹ wukenyi kiidi kya wulohi, halukenyi muuke okondonyi; haluonyi Mwele o Israeli natsitse oshangunyi lonu.

¹² Kyasia kipfa kya isho Mwele o Israeli nahamba adi, “Kipfa kya imina idedo lyi na ikusiria mbonyi tsa mlemeko na wuminyi, na ikuwada na isho;

¹³ Nahong'u wuwicho-wu wochiwa konu cha handu halya hawundukie, kukuṟeheṟie iomboka kuwukie omombohu luleshe, na ifunjika koke kocha peṟeseng'u na limu.”

¹⁴ Nao nyi echifunja cha kihia kya teri chandu kekefunjo, alechikisaṟia, kiledeoho ma kyoho kishikie iende modo rikonyi ma idahya mṟinga nduwenyi.

¹⁵ Kipfa Mndumii-Ruwa, Mwele o Israeli nahamba adi, “Kui iwuya na ifuda mochikiṟo; pfinya tsanu tsechiwa itsia na iwedia; indi mlaidikie.

¹⁶ Indi nyo mlehamba ote, kipfa lochidoya frasi ludiche; kyasia nyi lohi, mochidicha; ngoseṟa, so lochidoya mando hedicha owinyi, na walya wemwosha wechiwa waangu iwikia mteṟa.

¹⁷ Kiku kimu (1,000) wechidicha wadedio nyi mndu umu; kui idedio nyi watanu mochidicha; mṟasa mochideo cha ndichi ihoṟotsu huya kitoṟomoso, na bendeṟa huya kifumvu.”

Kiheri kya okiṟo

¹⁸ Kui kipfa kya isho Mndumii nechiweda, kundu namusaṟie, na kui kipfa kya isho nechiṟumisho kundu namsaṟie, kipfa Mndumii nyi Ruwa o mwanduye; nanga wose wekemmbeda.

¹⁹ Kipfa wandu wechikaa kiidi kya Sioni ipfo Yerusalemu; iyo ochifihiṟa-sepfo; kui kii lohi nechikuwonyia isaṟia ling'anyi kipfa kya ṟu lya kiliyo kyapfo; kaicho nlyo echikuhaluo.

²⁰ Ma chandu Mndumii aimuinenga shelya sha wukiwa na mringa fo fowa, indi walosha wapfo wechiṟikopfo, kipfa meso hapfo hechiwona walosha wapfo;

²¹ na madu hapfo hechiicho idedo nduma yapfo lyechihamba, njia nyio ii, ioshenyi; mkahaluka ihenda owoko lo kumoso.

²² Nanyo nyi mochifanyitsa kipfinyiko kya sanamu tsanu tsa fesa, na mawala ha sanamu tsanu tsa sahabu tsi tsisalaṟe; nochitsikumba kuleshe cha kindo kifanyi ngafu; nochihamba, kure uwuke iya.

²³ Nao nyi echiolotsa mvuo ikape huya mbeu, kundu nowaaye kiidi kya oruka-lu; nochiwona na mkate fo kilimu kya oruka lu, nalo lochiṟaa na iichuo; mandiho shuma shapfo shechiliso handu hang'anyi ngoseṟa.

²⁴ Mbe hamu na mahache ha nzoi halya hekedema hechilya kelya kidio, kelya kya masae kii kiele na ipalu.

²⁵ Na huye ya orio fumvu lileshe, na orio kitoṟomoso, kochiwada meda na shimeda sha mṟinga, kiidi kya mkonu iya yeshinja ing'anyi yechiolotsa shitaanyo.

²⁶ Saa ya meri yechiwa cha saa ya mnengeṟi, sa ya mnengeṟi yechiengeṟeka ka mfungade, cha saa ya mkonu mfungade, kiidi kya mkonu fulya Mndumii echipfunga ngapo tsilya tsa wandu wake, na ichiṟa itiinga lya ngapo tso.

Ruwa nechikapa oruka lo Ashuru

²⁷ Ambuya rina lya Mndumii liicha liwuka kuleshe mnu; liaka kui nyashi yake, kui mtsu funga'nyi fuida huye; dumbu lyake liichuo nyashi, na olimi loke nyi modo fo orumatso;

²⁸ na mṟufu foke nyi kimeda kya mfu fo mṟinga fushikie nzingonyi, iela wandu wa mkambo na ipalu lya mkika, na kilya keindutsa frasi kekedetsa kechiwa kiidi kya njohundu tsa wandu.

²⁹ Mochiwada kiimbo cha kiheri kya kio, cha mbuka tsa mfuho Mwele, mochiwada sia ya mrima, cha mndu aihenda na mtoṟiṟo kiidi kya fumvu lya Mndumii ai iṟaṟa lya Israeli.

³⁰ Nao Mndumii nechitewa wandu waicho ṟu lyake lya wuitoṟi, nao nechiwaloṟa chandu owoko loke lokesoka, na nyashi yake ing'anyi, na olewo lo modo furumatsa, hamu na mkuma, na otanu sa lwapfinya, na mvuo ya manzaho hechelela.

³¹ Kipfa kui ṟu lya Mndumii, Mwashuri nechifunjika-funjika ichu mokapa na iṟiinga.

³² Na orio ngapo ya olio lui luwawase ilu Mndumii echiluwika huye yake, lyechiwa hamu na mangalili na shinanda, na handu kuwode ngapano yededemesha nechikapana nawo.

³³ Kipfa Tofethi injiṟeheṟe wokia kacha, ee, injiteseheṟe ko mangi-cho; naihaluye ing'anyi, ihenda wanda mnu; handu hake hekoṟia nyi modo na ngu tsifoi; mṟufu fo Mndumii, cha modo fo kibiriti, fokeatso.