YESAYA 3 - Bibilia Kui Mdedie fo Kimochi

Kipfulupfulu Yerusalemu

¹ Kipfa, ambuya, Mndumii, Mndumii o Matorito, nechisoka Yerusalemu na Yuda kikusirio kyawo, kikusirio kya kando, na kikusirio kyose kya mṟinga;

² Nechiwuta wandu wa ngoru na mbahanyi, mletsi na mwikimbi, mlashi na meku;

³ msongoru o ichekeṟo lya wandu makumi hatanu (50), na wandu wawode kiṟumi, na mowesa mbonyi, menyi wuaria wo shindo shiliwe, na mhanga aichi iṟunda mnu.

⁴ Inyi njechiinenga wana wuikolonyi, wana watutu wechiwaitoṟia.

⁵ Wandu wechiwonyio, orio mndu na odoye, mndu na wamṟasa oke; mana nechikushela oshangunyi lo ndeye, na wandu wafari wechimina wanene wawo.

⁶ Ili mndu echiwada mana o mae, mbenyi ya ndee kechihamba, “Iyo nowode nguo; lusongoye so; Iya handu haolokie owoko lopfo luire ho.”

⁷ Nahong'u mkonu fulya nechiira ṟu lyake, kechihamba, “Inyi chi mkiṟa o wandu pfo, kipfa kiidi kya mba yako kuwode kandopfo, ma maṟaopfo, Mulanjihaluo njiwe msongoru onu-pfo.”

⁸ Kipfa Yerusalemu yamewunduyo, Yuda wakaoloka, kipfa madedo hawo na mawuto hawo, hai kihadi na Mndumii mṟasa hasuiṟa meso ha Mndumii.

⁹ Shamu shawo shiṟingishie kilya wawutie, wakashukuo wunyamaṟi wowo cha Sodoma, ma walaiṟika. Ochia lo wanduwo, kipfa wakuendie urumatso lo mbihu yawo wo wawenyi.

¹⁰ Wienyi wenyi wusumhanyi ke wechiwa nanga, kipfa wechilya ndunda tsa mawuto hawo.

¹¹ Ochia lo mndu mbicho; nyashi ya woaka yechikaa koke, kipfa nechiambia wueri wo mawoko hake.

¹² Kiidi kya mbonyi tsa wandu wako, wana nyiwo wechiwawonyia, na waka nyi wo wechiwaitoṟia. Lanye wandu wako, wemusongoya wamudekesha, wanyamaṟa njia yapfo.

Mndumii-Ruwa ahoṟuo wandu wake

¹³ Mndumii nahoṟoka kundu nakuwute owingonyi, nahoṟoka kundu naanduye wandu wake.

¹⁴ Mndumii nechikaa kiidi kya yaanduya, meku na wanene wa wandu wake; Nyi nyo mulelya mdemi fo msabibu; shilya mulewada sha mesa aisho shii ipfo mbenyi tsanu.

¹⁵ Ili lyahamba ki, nyo iwonyia wandu wako, na ipoṟipotsa shamu sha wakiwa? Njiwesa Inyi Mndumii menyi Matoṟito.

Wuwawaso ko waka wa Yerusalemu

¹⁶ Mndumii kahamba-se, kipfa kya mana o waka o Sioni chi umupfo, wawode orikiki, na ihenda na nzingo njiumu, na meso haichuo lango, wechumia wokushela, na ikapa shichengeṟe sha madende hawo;

¹⁷ Kyasia, koikyo Mndumii nechikapa wana wa waka wa Sioni, kui okuru lo njododo, na Mndumii nechishikuo sonu tsawo.

¹⁸ Mandiho Mndumii nechiwasoka wucha wo shichengeṟe shawo, na mba tsawo;

¹⁹ na rachi tsa madunyi na shitoti, na oṟo tsawo;

²⁰ na orio mṟaaye fokuchopa na mafuda hepfaama ha orio mbaṟi;

²¹ na rachi na shipuli,

²² Maṟao ha mfiri mnene na shilya shihendesanyi naho nyi mtandio na shela;

²³ na shilola shitutu, na nguo tsa katanyi na kitambaa kya mdonyi keṟao nyi wasoṟo hamu na oṟo.

²⁴ Nakyo kechiwa miilachiko; handu ha mafuda hepfaama mecha, kochiwada mdao; na hando ha mkanda mcha, kiwoho; handu ha njui tsinjioke necha, ohaa; na handu ha nguo yeṟaa ya huye nyi nguo tsa masaṟa; na ngoru tsa modo kiidi kya mbihu.

²⁵ Wasoṟo wapfo wechiwoho na oshu, na mbahanyi wanu wechipfa shidenyi.

²⁶ Shichumi shake shechifihiṟa na ikapa kilio; na mṟi fochiwa cha mndu mka asoko orio kindo kyake awode, adamie kilulinyi.