YESAYA 29 - Bibilia Kui Mdedie fo Kimochi

Ndumi ko Yerusalemu

¹ Ochia lo Arieli , Mangi Dawidi nalewikaho handu hake hesia moo kiidi kyake; engeṟenyi maka numa ya maka; mkonu mnene iwuye kiheri kyayo,

² nlyo njechisuiṟa Arieli; kochiwada kifuhiyo; nao nechiwa koko cha Arieli.

³ Na inyi njechiwika ṟuko huye yapfo njora tsose, nyi njechikutengetia kuwode omombo, njechiikara mfiṟiha fukutengetie.

⁴ Na iyo nochisotso, na iyo nochideda uwuka wanda ya oruka, na madedo hapfo hechiwuka kilulinyi; ṟu lyapfo lyechiwa cha mndu awodo nyi mṟufu fo ngafu lyechiwuka wanda, mdedie fopfo foweweda wuka kilulinyi.

⁵ Indi mfoeṟa fo wakituwa wapfo fochiwa cha kiluli kisise, na mfoeṟa fo walya waoweshie fochiwa cha mafila haida; yee kioweṟe faa.

⁶ Nao nechicheyo nyi Mndumii menyi Matoṟito kui ikuṟuṟuma, na kiding'ashi, na ṟu ling'anyi, owira sa lwapfinya, olewo lo modo forumatsa.

⁷ Na mfoeṟa fo wandu wa mkambo wekapana na Arieli, wose wekapana nao na omombo loke, na walya wemsuiṟa, wechiwa cha ndodo, na mawonesio ha kio.

⁸ Na ngoseṟa kechiwa cha mndu awodo nyi njaa ili alodia ke nailya; indi kakure mbihu foke fuwode kindopfo; kimu na mndu amwangari kalodia ke nainyo mṟinga, indi kakure, kaangalala; nyi wudo kechiwa ili wandu wa mkambo wekuteseheṟa iende shida huya fumvu lya Sioni.

Iwedia icha lya mkonu fo ifurumia

⁹ Tirimenyi muṟihio; oshenyi wuseṟeṟi wonu na iwa shipfupfuṟe; wai wananzi manya chi kui mvinyopfo; wai ruika chi kipfa kya kenanzapfo.

¹⁰ Kipfa Mndumii namupusuya mrima fo mado, kawikia meso hanu iwushi-wushi, nawo nyi waikimbi, nashikie mdo yanu, na walya wewona.

¹¹ Na shiwoneso shose shikawa cha madedo ha kitapunyi hamakape ofano, wandu wekekiinengia mndu awode wuṟango wechihamba, “Kesoma kindo ki.” Nao kahamba, “Njechiidimapfo kipfa kikikape ofano.”

¹² Numa kitapu ki kikainengio mndu kindo ki, nao kahamba, “Inyi njiwode wuṟango pfo.”

¹³ Mndumii kahamba, “Kipfa wanduwa wekecha injiindia na madumbu hawo kyaindi mrima yawo ilekanyi na Inyi, na wuindi na wucha wowo nyi mloshie ya kiwandu.

¹⁴ Kui kipfa ikyo, Inyi njechiwuta ṟiho kiidi kya wanduwa, maṟunda hang'anyi na shichano; na wuṟango wo waṟango wochideka.”

Owedi lo maheri hefurumia

¹⁵ Ochia lo walya weketambahana iṟika Mndumii mawuto hawo na makusaṟo hawo ha memenyi, nawo wekehamba, “Nacho aluwonyi? Nacho aluichi?”

¹⁶ Nyo nyi mupfihisuo mbonyi; na kya lohi mowumba shindo na teri natalo o nyi teri? Kindo kikiwumbe kidede na ulya mokiwumba, kikarie iwesa kitewe njilawumbo wuliwe na wuliwe, ang'u kihambe, ichu alenjiwumba awode wuṟango pfo?”

Iilachika ling'anyi

¹⁷ Ale-wo chi kioweṟe sa kifui, kitsihee na Lebanoni lihaluke dema licha liwode mboṟa na kando, na dema lilya lyikeṟaa lihaluke ngeṟa?

¹⁸ Na kiidi kya mkonu fo wapfu madu wechiicho madedo ha kitapu kyo, na meso ha wapfu, hechiwona kiidi kya mema na ipfo kipfupfuṟenyi kyawo.

¹⁹ Walya wakunyiiṟie wo wechiengeṟa sia yawo kiidi kya Mndumii, na wakiwa kiidi kya wandu wechichihiyo kiidi kya Mwele o Israeli.

²⁰ Kipfa ulya aoweshie amerumatso, na ulya ekemina ametsitsa, na walya wose wawewedia mawicho wakumbo kuleshe;

²¹ iwo wekewona mndu nadeko kiidi kya idedo, na ideha ichu moikimba na ipfunda mongonyi, na ihalutsa ichu o wusumhanyi kui kindo kilawaṟi.

²² Kyasia Mndumii chu alekiṟa Abrahamu nahamba adi, “Kiidi kya mbonyi tsa mba ya Yakobo, Yakobo echisingida wulalu pfo, ma oshangu loke lochiilachika fanapfo.

²³ Indi ilyi echiwona wana wake wakeri iṟunda lya mawoko hako kiidi kyake, wo wechitana rina lyako liele. Ee da, wechiilisha Mwele o Yakobo, nawo wechiindia Ruwa o Israeli.

²⁴ Na iwo wedeko mrimenyi yawo wechimanya, na iwo wenunuwa wechikulosha kisomiyo.”