YESAYA 28 - Bibilia Kui Mdedie fo Kimochi

Wuwawaso ko mangi ora lo mtsudu

¹ Ochia lo oṟo ya orikiki lo wananzi wa Efraimu, na kiwaṟo kya wucha wo wuitoṟi woke wuinaa, likeri mdohu fo pichi lidoye necha lya iwo walelemo nyi mvinyo.

² Ambuya Mndumii nawode umu ai mkahari, menyi pfinya; cha masinanu ha mvuo ya maho, isinanu lyenyamaṟa na otanu lurie mṟinga fui mfu fung'anyi, nyi wudo echikumba wanda kui owoko.

³ Oṟo lo orikiki lo wananzi wa Efraimu yechichumochumo na madende

⁴ na kiwaṟo kya wucha wo wuitoṟi woke wuinaa, likeri mdohu fo pichi lidoye necha lyechiwa cha mkuyu fulesonguo iwiṟa kiheri kilaweshikie, mndu katsiwona nechitowuo na itsilya oweṟe lumu.

⁵ Mkonufo Ruwa menyi Matoṟito nyechiwa ambo ya kiṟumi; cha kilemba kikicha ko wandu wake iwo watsuhae wai na moo.

⁶ Na walya weanduo mondu iinenga pfinya waringi wa mṟi.

Yesaya na waikimbi wananzi wa Yuda

⁷ Ma kudo, iwa nawo wadeko kui mvinyo, wadekie kui kenanza; mkohanyi na mwikimbi wadekie kui wunanzi, wai wameṟe nyi mvinyo, wadekie kui kenanza; wekedeko shiwonesioni, wakakapa mtulia kiidi kya mwanduye.

⁸ Kipfa mesa tsose tsiichuo odaiko na ngafu, kuwode hecha ma hamupfo.

⁹ Nechilosha u wuṟango? Nechiwia u oloho? Ngesa, nyi walya waimo maruwa walewuto maweenyi?

¹⁰ Kipfa nyi iwawaso huya iwawaso, iwawaso huya iwawaso; mdumbuye huya mdumbuye, kunu kitutu na kunu kitutu.

¹¹ Ote, kui madumbu ha wandu wahenu, na kui kishomo kingi;

¹² alewawia, ii nyiyo sia yanu, inengenyi sia ichu amrohie; kunu nyipfo isia moo; indi walekunda iichopfo.

¹³ Kui kipfa ikyo idedo lya Mndumii kowo lyechiwa kudi, iwawaso huya iwawaso, iwawaso huya iwawaso; mdumbuye huya mdumbuye, mdumbuye huya mdumbuye; kunu kitutu na kunu kitutu; kundu wahende na ioloka nduma, na ifunjo, na iwado na idao.

Iho lya ndumba Sioni

¹⁴ Kyasia wulalu, adanyienyi idedo lya Mndumii nyo wenyi wupiṟi nyo mokeitoṟia wandu wa wakeri kiidi kya Yerusalemu.

¹⁵ Kipfa mohamba, lolya mma na opfu, loidikiana na ko waṟumu; ngapo ing'anyi cha mfu yechiida yechilukooyapfo; kipfa madedo hadu ha wongo hawa opanga loowa na kidichionyi kyadu madedonyi halai lohi;

¹⁶ kipfa kya isho Mndumii-Ruwa nahamba adi, “Ambuya ngawika iho kiidi kya Sioni, liwe otende, iho lii liheshe, iho lya ndumbenyi liwode wuhuru, otende lukahari lulechisingida; mwidiki echidima-dimapfo.

¹⁷ Inyi njechianduo ke nyikyo mdumbuye, na wulohi iwa kipiṟinyi kya orusu (kelaho ni timazi ang'u biringi;) na mvuo ya maho yechiduo kuleshe madedo ho ha wongo na mṟinga fochinyamaṟa handu heowa.

¹⁸ Na mma fonu mulewikiana na opfu fochifurunjika, na chandu muleidikyana na ko waṟumu kechiwapfo; ngapo ing'anyi cha mfu ili yechiida, nlyondi nyo mochichumo nyiyo.

¹⁹ Orio handu lyechiida lyechimuduo. Kipfa lyechiida otuko numa ya otuko, kiheri kya mfiri na kiheri kya kio; na imanya mbonyi iya kechiwa ṟiho tupu.

²⁰ Kipfa kitaṟa kilya kifui mndu alechiidima ikuhoṟwoho, na nguwo iya yekushikia injifafa mndu echiidima iicho mado pfo.”

²¹ Kipfa Mndumii nechikure cha fumvu lya Perasimu nechiichuo nyashi cha pichinyi lya Gibeoni, naidime iṟunda lyake, iṟunda lyake lya ṟiho; na iinutsia mawuto hake, mawuto hake ha kiṟiha.

²² Na wulalu, manya mulawe wandu waminyi, shipfungo shanu shilawoneke shechiumiṟo; kipfa njileicho ko Mndumii, Mndumii menyi Matoṟito, mbonyi ya mwanduye yechiinutsio, nayo injiṟeheṟe, yechihoya wuyana wose.

Wulaanyi wo Ruwa

²³ Dehenyi madu, adanyienyi ṟu lyako, adanyienyi muicho idedo lyako.

²⁴ Ale, modema nekedema kitsitsi kundu nawaye? Nekefunja msengo na iwilawila?

²⁵ Kamemarisa ikapakapa teri yake-le, ekeṟeheṟa soko na iweda kiheri kewaya, na mbeu ya Ngano kui mbaṟi yatso na ikumba kulya terinyi chandu kiwaṟi?

²⁶ Kipfa Ruwa oke nambawasia necha na imlosha.

²⁷ Kipfa soko tsilya tsekekapokapo na kihia kiohipfo ma oṟo ya igari yakeitso ipfo na ipfo huya mhanda ang'u soko tsingi kui mbaṟi yatso-pfo, indi soko tsekekapo-kapo na shidi shisise cha malio natso tsikapaṟika necha.

²⁸ Nganu ya mkate yekeseo, yo chi yekapo-kapo mfiri yose pfo na chandu oṟo ya igari yekeidaho yekewuta necha

²⁹ Isho shose shiwukie ko Mndumii menyi Matoṟito, awode chile tsa kiṟiha, aidie wose kui wulaanyi.