YESAYA 27 - Bibilia Kui Mdedie fo Kimochi

¹ Kiidi kya mfiri fo Mndumii, kui oshu loke luohi, lung'anyi, lui na pfinya, nechihoṟwo nalo lewiatani, njoka iya njiangu, na lewiatani , njoka iya yekekuoṟowia-oṟowia; nao nyi echiwaha molimo fulya fokekaa ipalyipalyinyi.

² Mkonu fo; “Imbenyi mdemi fo msabibu,

³ Inyi Mndumii njiliringa, Njechililetsia mṟinga orio kiheri, Kulache mndu molinyamaṟa, Kio na mfiri njechiliringa.

⁴ Njiwode nyashi kiidi kyako-pfo; Kima mbeche na msha shiwekeri kusonguo koko le, Njiwekupfunga kya shida, Njiweirumatsa yose handu hamu.

⁵ Ang'u nawade pfinya tsako, Nashihe ofoṟo koko; Ee da, nashihe ofoṟo koko.”

⁶ Mfiri ikeri icha Yakobo nechikapa mri; Israeli nawaṟe shiwaṟo na ialuka; Nawo waichuṟe ndunda wuyanenyi kose.

⁷ A ngesa nalemkapa cha ngapo ya iwo walemkapa, ang'u nalewaha chandu walewoho iwo walewoho nyio?

⁸ Nolemhoṟwo da, lilya kulemfuna; komuela na otanu sa lwapfinya kiidi kya mkonu fo otanu lo ora lo ngamenyi.

⁹ Kyasia wuwicho wo Yakobo wochiilisho wudo, na itso nyitso ndunda tsose tsembuta wunyamaṟi woke; ilyi echihaluo maho hose ha rasioni hawe cha maho maili hamapaṟe-paṟe, mṟasa mbuo na sanamu tsa mnengeṟi tsechihoṟoka-sepfo.

¹⁰ Kipfa mṟi fuwode omombo fukeri fuenyi, handu kuledeo mrapu cha nuka, mpfo kundu echilisa mahache, na mpfo kundu echilaa, na ilya maṟamba hake.

¹¹ Maṟamba hakauma hechifunjo; waka wechicha wahakoṟe modo; kipfa iwa chi wandu wawode wuṟango-pfo; kui kipfa ikyo, ichu alewawumba echiwasaṟiapfo, na ichu alewawika echiwahoṟia pfo.

¹² Nakyo kechiwa kiidi kya mkonufo, Mndumii nyi echikapakapa ndunda tsake wokia mfu fo meda itane kimeda kya Misri nanyo mochisanyio umu-umu, nyo wana wa Israeli.

¹³ Nakyo kechiwa kiidi kya mkonufo, taṟumbeta iya ing'anyi yechikapo, na iwo wawei kufui na iarisika kiidi kya oruka lo Ashuru wechicha; na iwo wawei wawihitse kiidi kya oruka lo Misri; wo nyi weechiindiya Mndumii kiidi kya fumvu liele ipfo Yerusalemu.