YESAYA 26 - Bibilia Kui Mdedie fo Kimochi

Kiimbo kya wuwinzi

¹ Mkonu fulya kiimbo ki kechiimbo kiidi kya oruka lo Yuda; So luwode mṟi fui na pfinya; Nechihaluo okiṟo luwe mhamba fo oṟiho.

² Ṟuhuonyi shichumi shake, Oshari luwode wulohi, luide napfo.

³ Nochiringa ulya mrima foke fukusirie Kiidi kya ofoṟo lushikie, kipfa nyi akusirie kopfo.

⁴ Kusirie Mndumii mkonu yose, Kipfa Mndumii, Ruwa nyi iṟaṟa lya mlungana.

⁵ Kipfa nasotsie wawei huye, Mṟi fulya fuwei kuiriie nafusotsa, Nefusotsa mṟasa wanda, nefuende mṟasa kilulinyi.

⁶ Odende lochifuchuma wanda, Ee da, madende ha wakiwa, Na ndifo tsa walya wahuṟi,

⁷ Okondo lo ulya asumhanyi lui luhoṟotsu; Iyo ui mhoṟotsu nyi ui ihoṟotsa njia ya ulya asumhanyi.

⁸ Ee, kiidi kya mwanduye So lokuweda, hoi Mndumii; Msiha fodu foindukia Rina lyapfo na ngumbuo tsapfo.

⁹ Mrima foko fuikulanga maheri ha kio; Ee, mrima foko kiidi kyako njechikushiha kilawo; kipfa mwaanduye yako yechikaa wuyana, Wandu wai wuyanenyi wekekulosha wukiilohi.

¹⁰ Mndu mbicho ma kasumbo, Echikulosha wusumhanyi-pfo; Kiidi kya oruka lo wuhoṟotsu nechiwuta sha mkika, Ma echiwona wuitoṟi wo Mndumii-pfo.

¹¹ Mndumii owoko lopfo lui luirie, indi wawonyipfo; indi wechiwona wuṟisi-ṟisi wopfo kipfa kya wandu wapfo, nawo wechiowuo; ee, modo fochirumatsa wakituwa wapfo.

¹² Mndumii nochiluteṟia ofoṟo; kipfa nyi iyo da uleluwutia maṟunda hadu hose.

¹³ Hoi Mndumii, Ruwa odu, wasoṟo wengi ngoseṟa yapfo waluitoṟie; indi kui ndarama yapfo iyo kumonyi lochisenda rina lyapfo.

¹⁴ Wo nyi wapfiie; wechikaa na moo-pfo; wamemaa ipfa, wechiṟukapfo, kui kipfa kya ikyo kowachea, kowarumatsa, na idetsa ngumbuo yawo.

¹⁵ Noengeṟa oshari lo Mndumii noengeṟa oshari; iyo noṟumisho, noengeṟa mṟasa yose ya oruka lu.

¹⁶ Mndumii, kiidi kya wukiwa wowo walehenda kopfo; waleterewa shiterewo shifoi mnu kiheri kilya ulewahoṟwo.

¹⁷ Cha mndu mka akapikie kiheri kyake kimandie, awodo nyi fowa na iwawio ling'anyi, nyi wudo luwei so oshangunyi lopfo hoi Mndumii.

¹⁸ Luwekapikie, luwei iwawio, lukawa cha ilyi lulefee otanu; lulewika okiṟo lose wuyanenyi pfo, ma waleoloka wai kunu wuyanapfo.

¹⁹ Wapfu wapfo wechiwada moo, mnying'a yako yechiṟuka; kurenyi, imbenyi, nyo mui kilulinyi, kipfa ṟauṟa yapfo ii cha ṟauṟa ya maṟa, na teri yechiṟutsa wapfiie.

Numa ya wukiwa sia

²⁰ Njonyi wandu wako, ida shiṟihenyi shapfo, ushinge mongo numa yapfo noowe kioweṟe kifui, mṟasa wukiwawo wochiida.

²¹ Kipfa ambuya, Mndumii nechicha awuka handu hake, kundu nakape wandu wa wuyana, kipfa kya wuwicho wowo; teri yechiasama idaike samu, ma yechishikia wandu walya walewoho pfo.