YESAYA 25 - Bibilia Kui Mdedie fo Kimochi

Kiimbo kya msinango ko Ruwa

¹ Hoi Mndumii, iyo nyi ui Ruwa oko; Njechikung'anyisha na iichika rina lyapfo; Kipfa nyi uwutie ṟiho tsing'anyi, Chila tsa mbooko, na wuhendeli wo lohi.

² Kipfa nyi uhaluye mṟi fukawa sohu; Mṟi fuwewode oṟiho fukawa mrapu; Mba ing'anyi ya wahenu ilawe mṟi; Fochiwiko sepfo itane mlungana.

³ Ko ikyo wandu waapfinya wechikuṟumisha. Mṟi fo wandu wa mkambo waoweshie wechikuowuo.

⁴ Kipfa nyi ui oṟiho lo wakiwa, Oṟiho lo ulya ahuṟi kiidi kya wukiwa woke, Handu hedichia kiheri kya masinanu, Ria kiheri kya mu; Kiheri kya mkuma fo wandu waoweshie, Chandu masinanu hekukapa wambaṟehu ha ipalyipalyi.

⁵ Cha mrike handu hahadutsu, nochisotsa mtiṟi fo wahenu; Chandu mrike fui rienyi lya ipuchi, Kiimbo kya iwo waoweshie kechisotso.

⁶ Na kiidi kya fumvu lyi Mndumii menyi Matorito nechisungusia wandu wose wa mkambo mfuho fo shindo shinoru, na fo mvinyo fulai fulonge-longe mnu, mfuho fo shindo shinoru shiichuo mafuda, na fo mvinyo fulai fulonge-longe mnu, fui fukame necha.

⁷ Nao kiidi kya fumvu lyi nechinyamaṟa oshangu lo ichu ambike huye ya wandu wake wose handu heowa, na oṟo iya injiwike huye ya wandu wa mkambo yose.

⁸ Nameṟie opfu mṟasa mlungana; na Mndumii-Ruwa nechiangatsa mchenyeṟe oshangunyi lowo; na sonu ya wandu wake nechiiwuta kiidi kya wuyana wose; kipfa Mndumii adeda isho.

⁹ Kiidi kya mkonu fo wechihamba, “Ambuya ichu nyio Ruwa odu, nyio luwei imbedia nalutarame; Ichu nyio Mndumii luwei imbedia, Lukaese na ichihiyo kya okiṟo loke.”

Ruwa nechikapa Moabu

¹⁰ Kipfa owoko lo Mndumii lochitirima huya fumvu li, na Moabu nechichumo ipfo kundu ai, cha maṟa maumu hakeri ichumo kiidi kya mṟinga na sakenyi.

¹¹ Na iyo nochihoṟotsa mawoko hake makiidi hawi hake, cha ichu ekeekelea kechihoṟuo mawoko hake kundu naekelee mṟingenyi, nao nyi echisotsa oṟikiki loke, hamu na mtambo ya mawoko hake.

¹² Na oṟiho lui mikare naluhongomtsa, na ilulaṟa wanda, kalukumba wanda itane terinyi.