YESAYA 23 - Bibilia Kui Mdedie fo Kimochi

Orumatso lo Tiro na Sidoni

¹ Otambahaluo huye ya Tiro. Fihiṟenyi nyo merikebu tsa Tarshishi, kipfa nyi unyamaṟikie mnu, kuwode mbapfo, kuwode handu heidapfo; wokia oruka lo Kitimu wai waongoye mbonyi.

² Tsienyi nyo mui oruka kiidi kya ipalyipalyi; iyo okekapa mbucha o Sidoni, wekeambada ipalyipalyi walekuichuṟa.

³ Shindo shishidonge, sha Shihori, shilimu sha Nili, shilecha huya mṟinga fufoi, nlo ohawi loke na mooko foke, nao nawei tumo ya wandu wa mkambo.

⁴ Tisiki iyo Sidoni; kipfa ipalyipalyi lyadeda, omombo lo ipalyipalyi lulededa, njileicho mawawio pfo, ma njilefeepfo, njileembeṟa wanakepfo, ma wali wa wana.

⁵ Ilyi mandi mbonyi tsechishika Misri wechisukiyo mnu kipfa kya mbonyi ya Tiro.

⁶ Idenyi mṟasa Tarshishi, nyo muwode oruka kiidi kya ipalyipalyi, fihiṟenyi.

⁷ Ngesa ifu nyi mṟi fonu fo sia, ifu mawookionyi hafo fuwei wokia mbooko, ichu madende hake halemduo nakae haleshe mnu?

⁸ Nyiu aleanduo kya Tiro, ileṟika wandu oṟo ya kiṟumi, iwo wekekapa mbucha wawei wana wa mangi, na wetengetsa shindo nyi wandu wanene wa wuyana?

⁹ Mndumii menyi Matorito nyio aleanduo iki, kundu nanyamaṟe orikiki lo kiṟumi kyose, na isutsa wandu wa wuyana wose piu.

¹⁰ Ida orukenyi lopfo, cha Nili, iyo mana o waka o Tarshishi, kuwodese okowa lokuimapfo.

¹¹ Nahoṟoye owoko loke huya ipalyipalyi, nadedemisha wamangi, Mndumii nawuta iwawaso kiidi kya mbonyi tsa Kaanani, irumatsa mamba hake maikare.

¹² Nao kahamba, “Ulaengeṟe ichihiyo iyo mkeha ulesutso, mana o waka o Sidoni, kyasia, kure nohende mṟasa Kitimu; manyapfo ochikoyapfo siapfo.”

¹³ Ambuya oruka lo Wakalidayo, wandu wo waipfo sepfo; Mwashuru naiṟeheṟie ko mando ha ngeṟenyi na malehe ha nuka; wahoṟotsie nyashi na shisha sha shida, wanyamaṟie mamba hawo ha wuitoṟi kahaluo mrapu.

¹⁴ Kapenyi kelewui, nyo merikebu tsa Tarshishi; kipfa mba yanu iletano wukiwa.

¹⁵ Kyasia kechiwa mkonu fo, Tiro yechihadimo maka makumi mfungade, kiheo kya mkonu ya mangi imu, ishikie imarisika maka makumi mfungade (70) Tiro yechiwa chando kiimbo kilya kya mmeluki kihambie.

¹⁶ “Ira wuda wo kinanda, nochumie mṟinyi, Iyo mmeluki uwehadimikie; Kapa necha, imba shiimbo shifoi, Kundu wandu wakukumbuo se.”

¹⁷ Nakyo kechiwa ifurumia lya maka makumi mfungade (70) Mndumii nechiiṟikiṟa oruka lo Tiro, nao nechiwuya nawone wueri woke, nechimeluka na wamangi wose wa Wuyana kiidi kya oruka lose.

¹⁸ Na mbucha yake na wueri woke wochiwa odambiko ko Mndumii ma kisenyipfo; Indi shilya wechisambuo ipfo mbuchenyi yake shechiwa masaa ha iwo wai sumuhana na Mndumii, walye na iihuda, na iṟaa maṟao ha wuhuru wung'anyi.