YESAYA 22 - Bibilia Kui Mdedie fo Kimochi

Chila ya Ruwa ko Yerusalemu

¹ Otambahaluo huye ya pichi lya shiwonesio. Wulalu nkiki kikuwode iyo, Mṟasa kodoya kai ka mba?

² Iyo uichuo kifahio, Mṟi fo kipfulupfulu, mṟi fuwode sia; Wandu wapfo walewoho walalewoho na oshu, Manya walepfiia shidenyi-pfo.

³ Wanene wapfo wose wadichie handu hamu; Wai wapfunge walawade wuda. Wose walewono wai wapfunge kimu, Wadichie haleshe mnu.

⁴ Kui kipfa ikyo ngahamba, “Haluo kyamu kyapfo nonjiambuye, njiidime ifihiṟa kui mawawio; kulapfuṟukane injiwihiṟia moo; kipfa kya inyamaṟika lya mana oko o waka.”

⁵ Kipfa mkonu fo wukiwa, mkonu fochumochumo, mkonu fo kilafumbi fukeri icha fuwukie ko Mndumii, Mndumii menyi Matoṟito, kiidi kya pichi lya shiwonesio; iwunduo njomombo, na ifihiṟia mafumvu.

⁶ Elamu nawode shaha, hamu na magari ha shida, na wandu wedo frasi; na kiṟi wateseheṟie ngawo.

⁷ Ikyo kikainenga mapichi hapfo masambuṟe haichuo magari ha shida, na iwo wedo frasi wakuteseheṟie iambuya kichumi kinene.

⁸ Kikashika kawuta - ho kipfinyiko kya Yuda, na iyo noleambuya shisha shilya sha shida kiidi kya mba ya ngeṟenyi.

⁹ Nanyo mulewona handu hawundukie kiidi kya mṟi fo Dawidi ke nyi hafoi, nanyo nyi mulesanyia mṟinga fo nduwa ya wanda.

¹⁰ Nanyo nyi muletala mba tsa Yerusalemu, mkawunduo mba kundu muikare omombo.

¹¹ Nanyo mulewika nduwa ya mṟinga kiidi kya njomombo tsiwi, yewika mṟinga fo nduwa ya kacha; kyaindi mulaambuye ulya alewuta isho, ma ikusaṟa kya ulya aleṟunda kuwoka-pfo.

¹² Mkonu fo Mndumii, Mndumii menyi Matorito, kalaha wandu wache wafihiṟe na ikapa kilio, na ioda njui tsawo, na iṟaa nguwo tsa masaṟa.

¹³ Ate, sia na ikesa, na ishinja mbe, na ishinja machondi, na ilya nyama, na inyo mvinyo; lulye, lunyo, kipfa lupfa ngama.

¹⁴ Nao Mndumii menyi Matorito katambaṟuo ishi madunyi hako, nyi kya lohi kya ndio, wuwicho wu wochiwutoho-pfo manya wochimuwukapfo mṟasa mupfe.” Mndumii ahamba, Mndumii menyi Matorito.

Chila ya Ruwa ko Shebna

¹⁵ Mndumii, Mndumii menyi Matorito nahamba adi, “Kyasia hendenyi ko ichu moringa kikuchu kya fesa ai Shebna, ichu moikalya mba umbie,

¹⁶ “Nyi uda ukeri iwuta iya? Na iyo nyui nawu iya? Itane osuma ṟungu iya; Komsumia ṟungu ipfo huye, na handu hekaa kotorongocha iṟaṟa kiidi kya ngaṟahamba.

¹⁷ Ambuya Mndumii nechikukumba na pfinya, macha mndu awode pfinya; ee da nechikulemalema.

¹⁸ Nyi kya lohi nechikulema na ikukumba cha mpiṟa, itane oruka lo kuleshe, napfondo ochipfiia, na magari ha kiṟumi kyapfo napfo hechekaa hai sonu ya mba ya mndumii opfo.

¹⁹ Inyi njechikutikira na ikuwuta handu ui, nao nechikusotsa nowuke oo handu uhoṟoki.

²⁰ “Nakyo kechiwa mkonu fulya njechilaha mṟundi oko Eliakimu, mana o Hilikia;

²¹ na inyi njechimṟika maṟao hapfo, njimbanze na imnenga pfinya na okowa lopfo lo kitsi njimdambikie wuchili wopfo; nechiwa ndeye o wandu wa Yerusalemu na Yuda.

²² Na opfunguo lo mba ya Dawidi nechilumasa kosohu lyake; o nechipfunguo kulawode mopfunga; nao nechipfunga kulawode mopfunguo.

²³ Na inyi njechimiikara nawange; nao nechiwa loṟika lo kiṟumi kya mba ya ndeye.

²⁴ “Nawo wechiala huyake wuitoṟi wose wo mba ya ndeye oke; wa oshari loke na wana wawo, orio kihia kitutu, wokai kihia kya nguṟuche mṟasa kihia kya matanaki shose piu.

²⁵ Kiidi kya mkonufo, Mndumii menyi Matorito nahamba kilya kiwekiikare kechileheṟuka; na kilya kiwepfungie kechidumbuyo na ioloka wanda, na mhanda fulya fuwei huyake fochidumbuyo kuleshe; kipfa Mndumii ahamba ishi.”