YESAYA 21 - Bibilia Kui Mdedie fo Kimochi

Kiwonesio kerumatso lya Babeli

¹ Otambahaluo huye ya oruka lo Ipalyipalyi. Chandu kiwiriwiri kya Negebu (Kimu cha ilyi ohamba oruka lo nuka) kitikiria owinyi, kikeri icha kiwukie kundu kuleo, oruka luoweshie.

² Ngaloṟo mawonesio maumu; mowuta kui mtambo nawuta mtambo, mnyamaṟi nanyamaṟa. Do huye iyo Elamu; lekia iyo Umedi; Inyi ngatoromesha kifuhio kya mkuinadie foke fose.

³ Kipfa kya ikyo njikeri iwawio itane shitsi shako shamanya, njikeri iwawio ili iwicho-wicho cha mndu mka ai kufui nainengyo mkoku; njiwawio mnu, njilaidime imanya ma iicho; njiichuo wuowu wung'anyi njilaidime iwona.

⁴ Ngoo yako ikapa-kapa, wuowu wuinjilisa wukiwa, kimbulyimbulyi kya kiukanyi kikanjidedemisha.

⁵ Waṟeheṟa kando, wawika waringi, wailya, wainyo. Hoṟokenyi nyo wanene, shienyi ngawo mafuda.

⁶ Kipfa nyi Mndumii anjiwia adi, henda nowike mringi; isho awona nahambe.

⁷ Kawona wadoe frasi ichekeṟo wechihenda wawi wawi, na ichekeṟo lya nzoi, na ichekeṟo lya ngamia; naadanyie mnu, napfuṟukane iadanyia.

⁸ Naho kaṟuṟuma cha mwiso. “Hoi Mndumii, inyi njekehoṟoka kitoonyohu kiheri kya mfiri, na kiheri kya kio njekekaa kambenyi lyako lyeringa.”

⁹ Ambuya kukeri icha ichekeṟo lya wandu, wadoe frasi wechihenda wawi wawi. Kahaluo kahamba, “Babeli nooloka, nooloka; na sanamu tsose tsa maruwa hake tsafunjiyo wanda.”

¹⁰ Iyo njilekuowisha, na ikushikia wanda na mbeu yako, isho njileshiicho ko Ruwa menyi Matorito, njilemuinenga mbonyi.

Otambahaluo lo Edomu

¹¹ Otambahaluo huye ya Duma. Mndu ainjifihiṟia wuka Seiri, “Iyo mringi, mbonyi njiki tsa kio? Iyo mringi mbonyi njiki tsa kio?”

¹² Mringi kahamba, “Mfiri fuicha na kio da; mukundi iwesa, wesenyi; njonyise.”

Otambahaluo lo Arabu

¹³ Otambahaluo huye ya Arabuni. Kiidi kya ngeṟa ya Arabuni mochilaa, Nyo muihenda mui mamiingi fo Wadedani.

¹⁴ Endienyi mṟinga iwa waangari Nyo mui wenyi wa oruka lo Tema; Hendenyi iambiliya waidicha na kando kawo.

¹⁵ Kipfa nyi waidicha oshu, Oshu luilusomwo kiṟandenyi, na wuda wuiwuleme, Shida nsa njiwawo.

¹⁶ Kifa Mndumii nanjiwia adi, “Kiidi kya maka fumu, cha maka ya mndu ambike kiṟundiyonyi, kiṟumi kya Kedari kechisaramaya.

¹⁷ Na msuhaṟo fo wekuruo wuda, iwo wai mbahanyi wa Kedari wechiwa waangu;” kipfa Mndumii, Ruwa o Israeli, nadeda idedo lyi.