YESAYA 20 - Bibilia Kui Mdedie fo Kimochi

Yesaya achumia kitaṟe alaṟee shadu

¹ Kiidi kya maka fulya, mnene o shida ulya aleshika Ashdodi, kiheri aledumo nyi Sargoni mangi o Ashuru; nao kakapana na Ashdodi kawinza kafuduo;

² kiheri kyo Mndumii kadeda na Yesaya mwikimbi ai mana o Amozi kahamba, “Ee da! Wulalu, wuta nguwo ya ikunyia uṟee kitsinyi kopfo, na shadu ipfo madendenyi.”

³ Nao kawuta ado kahenda kitaṟe, madende hake halawode shadu. Mndumii kahamba, “Chandu mṟundi oko Yesaya aichumia kitaṟe, alawode shadu, nawe kichano na ṟiho itane maka iṟaṟu huya Misri na huya Kushi;

⁴ Nyi wudo mangi ya Ashuru echiwaduo kitaṟe, wapfungo wa Misri na wandu wa Kushi walesamiṟo, wana ko wameku, walawode shadu, songo tsawo tsiwono, Misri ihutsio sonu.

⁵ Nawo wechiiṟewe, na iwado nyi sonu kipfa kya Kushi, makusirie hawo, na Misri kiṟumi kyawo.

⁶ Na menyi kanyi oruka lo wambaṟa ya ipalyipalyi nechideda kya mkonu fo, ambuya ishi nyi shilya shilekoya wandu walya luwekusiṟie, walya lulewadichia, na lulewadichilia kundu nalukiṟe na mangi o Ashuru; a so lochiidima luda ikia ngesa?”