YESAYA 2 - Bibilia Kui Mdedie fo Kimochi

Ofoṟo lo kiheri kileshe

¹ Ili nyi idedo alewona Yesaya mana o Amozi kiidi kya mbonyi tsa Yuda na Yerusalemu.

² Kechiwa kudi mandi ha mkonu yefurumia, fumvu lya mba ya Mndumii lyechiikaro huya fumvu, nalyo lyechiirio huya shitoṟomoso; Masanga hose hechihenda ho mamiingi kui mamiingi.

³ Na wandu wa masanga wechihendaho na ihamba, “Nchonyi luhende fumvuhu ko Mndumii, kanyi ko Ruwa o Yakobo, nao nechilulosha njia tsake, naso lochiosha mawawaso hake; kipfa kiidi kya Sioni, kochiwuka iwawaso na idedo lya Mndumii liwuke Yerusalemu.”

⁴ Nao nechiwika mwanduye kiidi kya wandu wa mkambo, nechidedia wandu wa njoshari tsifoi, nawo wechitsana njoshu tsawo tsiwe makumbi, na mapfumuhawo hawe mndo, ma isanga lyechiiria oshu huya isanga lingi pfo, ma wechikuloshase shida pfo.

⁵ Iyo mba ya Israeli, nchonyi, luhende kiidi kya saa ya Mndumii.

Orikiki lochiwutoho

⁶ Kipfa iyo nyi udeye wandu wapfo, mba ya Israeli, kipfa kya lohi waichuo mloshie ya wasawi wa ora lo ngamenyi, nawo wekewesa ko walasha cha Wafilisti. Iwadana ng'asa na wana wahenu.

⁷ Ngoseṟa, oruka lowo luichuo fesa, na sahabu, ma kuwode mtsitsioni fo shichoṟe shawo pfo; Oruka lowo luichuo frasi, ma kuwode mtsitsioni fo magari hawo pfo.

⁸ Ngoseṟa oruka lowo luichuo sanamu tsa maruwa ha wongo, wekeindia maṟunda ha mawoko hawo, shindo shishitane kui shimnyo sha mawoko hawo.

⁹ Mndu mfafa nekehongoma na mndu ang'anyi nekekunyiiṟa; ko ikyo ulawahoṟie.

¹⁰ Ida kiidi kya ngaṟahamba ya maho; uowe kiidi kya kiluli, kurise na nyashi ya Mndumii-Ruwa, kaa kuleshe na oshangu lo Mndumii, kuleshe kiṟumi kya mng'ano foke.

¹¹ Meso ha mndu hakuirie hechisotsio wanda, na orikiki lo mndu lochilemetso, na Mndumii o amonyi neching'anyisho mkonu fo.

¹² Kipfa kechiwa mkonu fo Mndumii menyi Matorito, huye ya wandu wose wenyi orikiki na ikushela, na huya wose wakuirie; shose shechiolotso wanda.

¹³ Na huye ya mashidi mecha ha Lebanoni, hai maleshe na iiriyo huye, na iho halee-lee ha Bashani;

¹⁴ na huye ya mafumvu maleshe, hose na shitoṟomoso shikuirie shose;

¹⁵ na orio mnaṟa mleshe na orio omombo lui mfiṟiha.

¹⁶ Na huya merikebu tsose tsa Tarshishi, na orio kindo kihya kichihiṟie.

¹⁷ Ikushela lyose lya wandu, lyechisotso; na orikiki lo orio mndu lochifunjo. Nao Mndumii amonyi nyi echiṟumisho mfiri fulya.

¹⁸ Sanamu tsose tsechideka piu.

¹⁹ Idenyi kiidi kya njopanga tsa ngaṟahamba, kiidi kya mṟeshe ya orukenyi, kipfa kya wuowu wo owuo Mndumii menyi Matorito na wuitoṟi woke, ili echikure nadedemishe mnu wuyana.

²⁰ Mandi ho orio mndu nechiwakumbia sanamu fuko na nzana, na sanamu tsa fesa na sahabu, shindo walekusungusia kundu washiindie.

²¹ Nawo wechiida kiidi kya njopango ngaṟahambenyi, na kiidi kya mruma iya ilepaṟika ngaṟahambenyi, kipfa kya wuowu wo owuo Mndumii menyi Matorito na Wuitoṟi woke, ili echikure nadedemishe mnu wuyana.

²² Mulaidiklie mndu awode mṟufu foke fukeri shiwalenyi sha mbuo yake; moo foke fochikaa mlungana cha otanu pfo, nyiu echikusaṟa kyake ke o nyi kindo?