YESAYA 19 - Bibilia Kui Mdedie fo Kimochi

Ruwa nechikapa oruka lo Misri

¹ Otambahaluo lo Misri. Ambuya Mndumii nado na ipuchi liangu, nashika Misri, na sanamu tsa Misri tsidedema oshangunyi loke, na mrima fo Misri fosalaa.

² Na inyi njechiamtsa Wamisri huye ya Wamisri; nawo wechikapana, orio mndu na manomae, na orio mndu na wamṟasa oke, mṟi, na mṟi, wumangi na wumangi.

³ Na mumuyo fo Misri fochidekadeka kiidi kyake, na Inyi njechifurunja chila tsake, nawo wechiosha sanamu tsawo, na wahanga, na walasha na wasawi na weruwia wuṟoi.

⁴ Na inyi njechidambika Wamisri mawokonyi ha mndu muumu, na mangi mlang'a nyi echiwaitoṟia; Mndumii ahamba, Mndumii menyi Matorito.

⁵ Na mṟinga fo ipalyipalyi fochinyia, na meda fo fochiumia na iwa handu hahadutsu.

⁶ Na shisoka sha meda shechidaa, na mfongo ya Misri yechiwada mṟinga fufoipfo, yechiumia; maṟa na mawale hechinaa.

⁷ Shindo shekedo kufui na Nili, mbarinyi ya Nili, na shose shishiwaaye kufui na Nili, shechiuma na iwutoho na ideka.

⁸ Wadehi wechiluo, na wose wekedeha na shimenya wechikuinadia, na walya weala ndusu tsedeha huya mṟinga wechiuma ndadia.

⁹ Na iwo wawode iṟunda lyesungusia ndusu tsa kitani wechiowuo mnu, na iwo wepfuma shitambaa shiilyi.

¹⁰ Na ngo tsa oruka tsechifunjika-funjika shiteeno - teno, wose wekeṟunda waambiye wueri, wechikuinadia mhienyi yawo.

¹¹ Wanene wa Soani wawa matondo piu; wenyi wuchili waṟango wa Farao, chila yawo yawatondosha; nyi wuda mochiidima iwia Farao, “Inyi nyi mana o mndu mṟango na mana o mangi o kacha?”

¹² Weku wandu wapfo waṟango? Wakuwieng'u wulalu, wawemanya mbonyi tsilya, Mndumii menyi Matorito aweteseheṟie ko Misri.

¹³ Wanene wa Soani wai matondo, wanene wa Nofu wakulemba; na iwo wai maho ha ndumba wa njoshari tsake wadekesha.

¹⁴ Mndumii amonyi nyi awika mumuyo fo wukahari kiidi kya mrima fo Misri, nawo wakadekesha Misri kiidi hya mawuto hake hose, cha mndu mnanzi ekehenda ipfo na ipfo kechidaika.

¹⁵ Manya kochikaapfo iṟunda lyose lyechiwa iṟunda ipfo Misri ma lya mdo ang'u lya mchola, lya iṟamba ang'u imbalepfo.

Wamisri wechiindia Mndumii-Ruwa

¹⁶ Mkonufo Misri yechiwa cha waka; yechidedema na iowuo kipfa kya idihinyitso owoko lo Mndumii menyi Matorito, aludihinyitsa huye yake.

¹⁷ Oruka lo Yuda lochiwa kitewe kya iowuo lya Misri; orio mndu mowio mbonyi tsake nechiowuo, kipfa kya kilya Mndumii menyi Matorito, akuteseheṟie kyake.

¹⁸ Kiidi kya mkonu fo kochiwada mṟi itanu kiidi kya oruka lo Misri iwode mdedie fo Kaananyi, na ilya nyamu ya Mndumii menyi Matoṟito, mṟi fumu fochilaho mṟi fo orumatso.

¹⁹ Mkonu fo kochiwada kitaṟa kedasia kiidi kya oruka lo Misri ko Mndumii, na ngo mṟasenyi koke na Mndumii.

²⁰ Nayo yechiwa kichano na kiṟingishiyo ko Mndumii menyi Matorito kiidi kya oruka lo Misri; kipfa wechifuhiya Mndumii kipfa kya wandu wo wekewawonyia, nao nechiwadikia mowakiṟa echiwa mdedi oke, na nechiwakiṟa.

²¹ Na Mndumii nechimanyika ko Misri na Wamisri wechimanya Mndumii kiidi kya mkonu fo; ee da, wechimṟundia kui shidaso na mwano, nawo wechiwikia Mndumii shiasa na ishiinutsia.

²² Nao Mndumii nyi echikapa Misri, kekapa na ichiṟa; nawo wakawuya ko Mndumii, nechiidikia shiterewo shawo na iwachiṟa.

²³ Kiidi kya mkonu fo kochiwada njia ing'anyi iwukie Misri itane Ashuru; Mwashuru nechishika Misri, na Mmisri nechishika Ashuru, na Wamisri wechiindia hamu na Waashuru.

²⁴ Kiidi kya mkonufo Israeli nyechiwa o kaṟaṟu hamu na Misri na Ashuru wechiwa ona kiidi kya wuyana;

²⁵ Kipfa Mndumii menyi Matorito nalewainenga ona kechihamba, wandu wako Misri na iyo Ashuru wawikio ona, iṟunda lya mawoko hako, na iyo Israeli, kyooṟa kyako.