YESAYA 18 - Bibilia Kui Mdedie fo Kimochi

Ruwa nechikapa Kushi

¹ Ochia lo oruka ndiṟimo ya makungo, Hai kuleshi hai maambatsana na meda ya Kushi;

² Yekeduo wadume wake kui njia ya ipalyipalyi, Na kiidi kya shihia sha maṟa huye ya mṟinga. Hendenyi wadume waangu, ko wandu waleshe, wawiriwiri; Wandu waoweshie wokia kacha na wulalu; Oshari lo wandu waapfinya, wekechuma wandu, Oruka lowo luluhawe na meda ifoi.

³ Lanye wandu mukeri wuyanenyi kose, nanyo wenyi oruka, bendeṟa ikairio huye fumvuhu, ambuyenyi; na wakakapa taṟumbeta, adanyienyi.

⁴ Kipfa Mndumii nyi anjiwia adi, “Inyi njechikutsia sau, njiambuya handu hako hekukaya, cha kiheri kya sa ing'anyi njiili wuilyi wo mnengeṟi fuiwaa mnu, cha ipuchi lya mvuo kiidi kya mu kiheri kya shilimu.”

⁵ Kipfa shilimu shilamewono, shiwaṟo shikaomboka, na shiwaṟo shikawa sabibu tsiwoka iwiṟa, nhondo ekemanya maṟamba na mndo, na iaṟawuo shiṟamba shilai necha.

⁶ Wose handu hamu wechideyo malehe malang'a ha mafumvuhu, na orio kerunduka na mando ha ngeṟenyi; malehe malang'a hechikaa huyawo kiheri kya mbaṟi, na mando hengi hose hechikaa huyawo kiheri kya mbeo.

⁷ Mandiho Mndumii menyi Matoṟito nyi echiendio shiano ni wandu waleshe wakushie mafuda; Wandu waoweshie wokia kacha mṟasa wulalu, Oshari lo wandu waapfinya, wekechuma wandu, Oruka lowo luluhawe na meda ifoi; Iwo wose wechida shiano shawo handu kui Rina lya Mndumii menyi Matoṟito nyi ho fumvunyi lya Sioni.