YESAYA 17 - Bibilia Kui Mdedie fo Kimochi

Ruwa nechikapa Ashuru na Israeli

¹ Otambahaluo huye ya Dameski. “Ambuya Dameski omewuto ulawe mṟi, nochiwa fumvu lilisame.

² Mṟi ya Aroeri injide; yechiwa po lya machondi, nalyo lyechilaa ipfo kulechiwada mowaowesha.

³ Omombo lo Efraimu lochiolotso, na wumangi wo Dameski, na mtsuhaṟo fo Shamu; wechiwa cha wuitori wo wana wa Israeli,” Mndumii menyi Matorito ahamba.

Sa wechitsuhaṟo kiidi kya Israeli

⁴ Nakyo kechiwa kiidi kya mfiri fo, kiṟumi kya Yakobo kechianguo-anguo, na inuo lya mbihu foke nechipoka.

⁵ Ngoseṟa kechiwa cha ichu mosambuo ekewada mamsale ha ngano, na owoko loke lochiweha mahaa; nakyo kechiwa cha mndu adoduo mahaa pichinyi lya Warefai.

⁶ Kyaindi kilya kiletsuhaṟo nyi mosambuo kechiwa kiidi kyake; cha kiheri kilya kekapa msinepfunyi, ndunda tsiwi tsiṟaṟu tsii huye mnu; ndunda tsiina tsitanu kiidi kya iṟamba, maṟamba ha ikidi lya ndunda, Mndumii ahamba, Ruwa o Israeli.

Mtsitsioni foindia sanamu

⁷ Mafiri-ho mndu nechiambuya ulya Momuumba, na meso hake hechiambuya Mwele o Israeli.

⁸ Manya echiambuya rasioni ii iṟunda lya mawokopfo; ma echiambuya shilya shii shiṟunde na shimnyo sha mawokopfo, mbuonyi na sanamu tsa mnengeṟi.

⁹ Kiidi kya mfiri-fo, mṟi yake iwode omombo yechifanana na handu hahade ngeṟenyi, na huya fumvu owerihu, kuledeo mesonyi ha wana wa Israeli; handu ho kukusame.

¹⁰ Kipfa kulehadima Ruwa o Okiṟo lopfo, ma kulekumbuo iṟaṟa lya oṟiho lopfo-pfo; kipfa kya ikyo kowaya madema mecha, kowikapfo msabibu njihenu.

¹¹ Wokia mkonu fulya kulewaya, kulewewika mṟishe, na kiheri kya ngamenyi koalutsa mbeu tsapfo, kyaindi shilimu shechideka mkonu fo wukiwa, na isokionyi fowa yewaha.

Wakituwa wa mkambo ingi wawingo

¹² Ho! Ndiṟimo ya wandu wafoi! Ndiṟimo cha otanu lung'anyi lo ipalyipalyi; Ho! Ndiṟimo ya wandu wa mkambo! Waringona cha ndiṟimo ya mṟinga fufoi,

¹³ Wandu wa mkambo waringona cha ndiṟimo ya mṟinga fufoi; Indi nechiwadedia, nawo wadichie kuleshe mnu. Wechiwingio cha muulu fumvuhu kui otanu, Na cha kiluli kundu kui kiwiriwiri.

¹⁴ Kiheri kya kiukanyi, ambuya, kuwode wuowu; Kulametambaṟuka waipfo wo; Ifo nyi mooko fo walya weludeha, Na ndenga ya walya welusoka masaa hadu.