YESAYA 16 - Bibilia Kui Mdedie fo Kimochi

Moabu yaterewa kitarama ko Yerusalemu

¹ Duonyi machondi, okamba lo ichu aitoṟie oruka wuka Sela nohende kya nuka, mṟasa fumvu lya mana o waka o Sioni.

² Na wana wa waka wa Moabu wechiwa cha shilehe sherunduka, ipfo na ipfo, cha sungu ya shilehe shiowu, shii kiambadionyi kya Arnoni.

³ Ende mbonyi; hamba kidedo; haluo kiṟinje kyapfo kiwe cha mema kiidi kya mfiri; owisha walya wafune; kulasuwie walya wadekie.

⁴ Wandu wako waiwafune wade wakae na iyo; kiidi kya mbonyi tsa Moabu, mwowishe oshangunyi lo ulya monyamaṟa; kipfa ulya mosuhuṟa kui pfinya ameda; moende wukiwa amedeka; wechuma wandu wai wasamiṟe orukenyi.

⁵ Na loṟika lo wuitoṟi lochiwanga kui isaṟia; na nechidamia ho kui wulohi, kiidi kya mba ya Dawidi; kechianduo, kechikunda shilya sha wusumhanyi, ai mwangu ikapanyia wusumhanyi.

⁶ Luleicho mbonyi tsa orikiki lo Moabu, ke nyi wenyi orikiki lung'anyi; mbonyi tsa ikushela lyake; na orikiki loke, na nyashi yake; ikushela lyake chi kindopfo.

⁷ Kipfa kya ikyo Moabu nechifuha, kipfa kya Moabu orio umu nechifuha, kipfa mochisokio nyi fowa kya mkate ya msabibu ya Kir-Hareseti, mochikapo mnu.

⁸ Mapichi ha Heshiboni hanaa, hamu na msabibu fo Sibma; Wasoṟo wa mkambo fo wandu wafunja maṟamba hake masambuṟe; haweshikie mṟasa Yazeri, haleṟahaṟaha mṟasa nuka; maṟamba hake haleolika ha mṟasa maambatsa ipalyipalyi.

⁹ Kyakusia, njifuhia msabibu ya Sibma kui kifuhio kya Yazeri, njechiwarutsa mchenyeṟe yako. Iyo Heshboni na Eleale, kipfa kitohio kya shida kileolokia shilimu sha ndunda tsapfo, na shilimu sha msabibu yapfo.

¹⁰ Sia yamewutoho, na ifuda lilecha mademenyi kipfa halekumbia mnupfo. na wulalu kuwode-se iimba kiidi kya msabibu-pfo, manya ṟu lya sia; mochumachuma kundu nakame mvinyo kuwode-sepfo; nyi ngatirimisha ṟu lya sia lya mokama mvinyo.

¹¹ Kui kipfa kya ikyo mrima foko fui ililia Moabu cha wuda wo ndusu, na ndeu yako ikadosa mtara kipfa kya Kir-Heresi.

¹² Nakyo kechiwa Moabu kawoneka, na ikulisa wukiwa kechifuha kipfa kya handu ha huye, na iida handu haele kundu naterewe, echiidima iwingapfo.

¹³ Ilyo nlyo idedo Mndumii alehamba lilya Moabu lya mbooko.

¹⁴ Indi wulalu Mndumii nahamba adi, kiidi kya maka iṟaṟu, cha maka ya mndu o wueri, kiṟumi kya Moabu kechimino, hamu na mfoeṟa foke fose; mtsuhaṟo foke fochiwa mwaangu mnu, cha chi kindo piu-pfo.