YESAYA 15 - Bibilia Kui Mdedie fo Kimochi

Ruwa nechirumatsa Moabu

¹ Otambahaluo lo Moabu. Kiidi kya kio kimu Ari fo Moabu, funyamaṟikie piu na irumatso; kipfa kiidi kya kio kimu Kiri fo Moabu funyamaṟikie piu na irumatso.

² Waido huye mṟasa Bayiti na Diboni, mṟasa handu ha huye kundu wafuhe; huye ya Nebo na huye ya Medeba Wamoabu waifuha; wawukie ohaa huya mdo yawo yose; orio ngerero tsiode.

³ Waṟee nguwo tsa makunyia kiidi kya njia nene; huya kai lyawo, na shihongonyi shawo orio mndu naifihiṟa naipusuka mchenyeṟe.

⁴ Heshibonyi na Eleale waifuha; ṟu lya ifuha lyawo liichio mṟasa Yekasa; ma wandu wa Moabu wakupfungie shisha waikapa kitohio kipfa kya ikyo; mrima foke fuidedema kiidi kyake.

⁵ Mrima foko fuifuhia Moabu; wanene wake waidichia Soari cha ihache lya maka iṟaṟu; kipfa wakeri ido owarihu lo Luhiti wefuha; kipfa kiidi kya njia ihendie mṟasa Horonaimu waikalahatsa maṟu helehela.

⁶ Kipfa mṟinga fo Nimrimu fui handu hanyamaṟikie, kipfa maṟa hauma, njana tsikanaa, maṟa mawishi hatsitsa.

⁷ Kui kipfa ikyo shindo waleshiwona kilula, na kisa kyawo washiduo mṟasa meda fo Mierebi.

⁸ Kipfa kilio kyo kitengetie mṟasa ya Moabu, ifuha lyawo lishikie Eglaimu, likawehenda mṟasa Beer-Elimu.

⁹ Kipfa mṟinga fo Dimoni fuichuo samu; kipfa njiteseheṟie fowa njihya ya opfu huye ya Dimoni, miiso huye ya wandu wa Moabu wadichie, na huye ya mtsuhaṟo yawo.