YESAYA 14 - Bibilia Kui Mdedie fo Kimochi

Iwuya kuwuka osamiṟonyi

¹ Kipfa Mndumii nechiwuyase isaṟia Yakobo, nechisambuṟa Israeli-se, nao nechiwawikase orukenyi lowo wawenyi; mhenu nechikulunga nawo, nawo wechiwadana na mba ya Yakobo.

Mangi ya Babeli kiidi kya wapfu

² Na iwo wa mkambo wechiwawada wawaende mṟasa handu hawo wawenyi. Na mba ya Israeli wechiwaitoṟia, na iwahaluo waṟundi na shisinga kiidi kya oruka lo Mndumii. Nawo wechidao wai wapfunge nyi walya walewapfunga wo, nawo nyi wechiikolonyia wandu walya walewawonyia.

³ Kake kechiwa mkonu fulya, Mndumii echikuinenga sia na ikuwihiṟia moo numa ya iyo ilya wukiwa na iwona mawina hafoi chandu uletano isinga;

⁴ nahong'u iyo noṟehie madedo ha mfanano harianyi na wuchili wo Mangi o Babeli na ihamba, “Chando aletsitsa ulya mowonyia, Chando mṟi fulya fuletsitsa fulya fwenyi mtolo!

⁵ Mndumii nafunja iṟiinga lya wawicho, ndichi ya wuchili ya ulya aikolonyie;

⁶ Ichu alekapa wandu wa mkambo na nyashi, kui ngapo tsilawode mtsitsioni, Aisongoya wandu wa mkambo kui nyashi, Nalehoṟoyo nalaime mndu.

⁷ Wuyana wose wusie moo na iololia; Wukawoka iimba.

⁸ Ee mashidi hachihiyo kipfa kyapfo, Na mashidi ha Lebanoni, hechihamba, ‘Wokia kiheri kulehutso wanda iyo, Kuwode momanya mashidi alelucheapfo.’

⁹ Ko wapfu, kokangaṟika kipfa kyapfo, Kundu kukuambie ili ochicha. Nechiamtsa wapfie kipfa kyapfo, Ee, wose wang'anyi wuyanenyi; nekeira wamangi wose wa wandu, Wawuke njoloṟikenyi tsawo tsa wuitoṟi.

¹⁰ Iwo wose wechihaluo wakuwie, ‘Ngesa, naawo owa mfafa chaso! Iyo kowewa chaso!

¹¹ Kiṟumi kyapfo kyasotso itane shi, Na maṟu ha shinanda shapfo; Fusa tsitsiale wanda yapfo, Na makuṟu hakakushikia.’

¹² Chandu kuleoloka kuwuka huye, Iyo nyenyeri ya aheṟa, mana o ngamenyi, Chandu kulemanyo, Iyo kuleolotsa wandu wa mkambo!

¹³ Iyo kulehamba mrimenyi, njechido mṟasa ruwehu, Njechiira kidi kyako huye kota nyenyeri tsa Ruwa. Inyi njechidamia huya fumvu lya chila tsa maruwa, Njora tsa mtsitsioni tsa mtsudu.

¹⁴ Njechido huye njiide mapuchi, Njechifanana na ichu ai huye.

¹⁵ Indi nochisotso mṟasa shi; Mṟasa mtsitsioni fo ṟungu.

¹⁶ “Iwo wekuwona wechikutuluya meso, Wechikuambuya mnu, wechihamba, Ngesa nyi ichu alededemisha wuyana, nyi ichu alepongitsa wamangi;

¹⁷ Alehaluo wuyana mrapu, kechipfuluo mṟi yake; Alechipfunguo wapfunge wahende kowo?

¹⁸ Wamangi wa wandu wa mkambo waleṟiko na kiṟumi, Orio umu kiidi kya mba yake amonyi;

¹⁹ Kyaindi iyo numkumbe kuleshe na kipfu kyapfo, Cha njana isuikie mnu; Cha maṟao ha walya walewoho, Walya walewoho ko oshu, Walya walesokia mtsitsioni fo ṟungu; Cha indo lyipfu lyichumochumo na madende.

²⁰ Ochisanzo nao kiṟikonyipfo, Kipfa nonyamaṟie oruka lopfo, kulewaha wandu wapfo; ‘Oshari lo wewuta sha mkika lochisendo mlunganapfo.

²¹ Shinjenyi wana wake. Kipfa kya wuwicho wo ndeawo; Walashike ikure na ikolonyia oruka, Na iichuṟa wuyana wose mṟi yawo.’”

Ruwa nechirumatsa Babeli

²² “Inyi njechikure, njilyimbane nao;” Mndumii menyi Matorito ahamba, “Na kiidi kya Babeli njechikuṟuo rina na mtsuhaṟo fo mana na mchuku,” Mndumii ahamba.

²³ Kake njechihaluo orukalo luwe kanyi ko isasa na nduwa tsa mṟinga; nyi “Njechifeṟehendia kuleshe wanyamaṟi wose Inyi Mndumii menyi Matorito ngahamba.”

Mtsitsioni fo wuneesi

²⁴ Mndumii o Matoṟito nalya nyamu, kechihamba, “Nyi kya lohi na pata chandu njiweteseheṟie, nyi wudo kechiwa; na chandu mbekusirie nyi wudo kechiwa, na kechiwutika;

²⁵ ke njechinyamaṟa Mwashuri-cho njihaluo shiteno teno kiidi kya oruka loko, na huye ya fumvu lyako njimchumechume wanda ya madende hako; nlyondo kipfunga kilya kechiiroho, na ṟio lilya lyechiwuto makosohu hawo.

²⁶ Ikyo nyikyo kiwekiteseheṟe kiiwutio wuyana wose, na ilo nyi owoko lui luhoṟwo huye ya wandu wose wa mkambo.

²⁷ Kipfa Mndumii menyi Matoṟito nateseheṟie, nyiu echiilacha? Na owoko loke luhoṟwo nyiu echiluhaluya numa?”

Ruwa nechirumatsa Wafilisti

²⁸ Otambahaluo lu lulecha maka fulya mangi Ahazi alepfa.

²⁹ Ma kulachihiyo, iyo Ufilisti, na wose, Kipfa ilyio lilya lilekukapa lilefunjika; Kipfa kiidi kya mruma fo njoka, kochichapfo njoka membe, Na oshari loke nyi njoka ya modo yerunduka;

³⁰ Walya wai wakiwa mnu wechilya, na walya wahuṟi wechilaa kipuo; Inyi njechiwaha njana yapfo na njaa, Na mtsuhaṟo fopfo fochiwoho.

³¹ Kapa kelewui, iyo kichumi; fihiṟa iyo mṟi; Iyo Ufilisti, na wose, nosalaa piu; Kipfa mtsu focha fuwuka mtsudu, kuwode waowu kiidi kya machekeṟo hakepfo.

³² Wandu wa oshari lu waendio kiki? Ke Mndumii nawikie otende lo Sioni, na kiidi kyake walya walewonyio kiidi kya wandu wake wechiwona hedichia.