YESAYA 13 - Bibilia Kui Mdedie fo Kimochi

Ruwa nechikapa Babeli

¹ Otambahaluo lo Babeli, mawoneso Yesaya alewona ai mana o Amosi.

² “Kyasia irienyi bendeṟa huye handu kulawode mashidi fumvuhu, irienyi maṟu hanu, wakemienyi kundu waide na kichumi kya wanene.

³ Inyi njimonyi njilewawasa wandu wako wawashimbuo kipfa kyako, ee njilelaha wandu wako walya wawanzi, kipfa kya nyashi yako wandu wako wekekushela.”

⁴ Adanyienyi muicho kifahio kya wandu wafoi, kifahio kya mangi tsa wandu wa mkambo - wakoyana handu hamu, Mndumii menyi Matoṟito ateseheṟa wandu kipfa kya shida;

⁵ wandu wawukie oruka lo kuleshe wokia ora lo mtsitsioni fo ngina; ee Mndumii na shisha sha nyashi yake kundu narumatse oruka.

⁶ Fahiyenyi na wuowu, kipfa mkonu fo Mndumii fui hafui - fuicha, cha orumatso luwukie ko Mndumii-Ruwa.

⁷ Kui kipfa kya ikyo mawoko hose hechiṟengeṟa, na ngoo ya orio mndu yechisalaa.

⁸ Nawo wechidedema, na wechiwawio cha mndu mka amlemo, ai hafui na iinengo mkoku, wechitukuyana meso; shamu shawo shechiwa shamu sha modo.

⁹ Ambuya mkonu fo Mndumii fuicha, mkonu fui mbawo, fo nyashi yake ing'anyi, kundu inyamaṟe oruka lu na wanyamaṟi, wose walawone wechikaapfo.

¹⁰ Kipfa nyenyeri tsose tsa ruwehu na shiende saa shechiwuta ngeela yashopfo; mnengeṟi fochihaluka mema kiheri fodo, na meri fochiwaapfo.

¹¹ Na inyi njechisesa wuyana kipfa kya wuwicho wowo, na wunyamaṟi kipfa kya wukika wowo, Njechiwika mtsitsioni fo sia na wusuṟi wo wenyi orikiki; njechiombotsa wanda wose wekushela na walang'a.

¹² Wandu wechituṟika kota sahabu njicha na kota sahabu ya Ofiri.

¹³ Ko ikyo inyi njechidedemesha ruwehu, na wuyana wochipongika wuuto handu kowo, kipfa kya nyashi ya Mndumii menyi Matoṟito, na kipfa kya mkonu fo nyashi yake ing'anyi.

¹⁴ “Naho kechiwa cha sumbuda yaowesho nyi wandu wake; nawo wechidicha, orio mndu nahende orukenyi loke amonyi.

¹⁵ Orio mndu echiwono nyi echiwoho na oshu.

¹⁶ Wana watutu wechipoṟipotso mesonyi hawo, mba tsawo tsewado wupfungo, na waka wawo wawutio kinyala.

¹⁷ “Ambuya njechiamtsa Wamedi huye yawo, walakewona fesa nyi kindo ma wekechihiṟo nyi sahabu pfo.

¹⁸ Wuda tsawo tsechiolotsa wanake; wechisaṟia wufee wosepfo; riso lyawo lyechisaṟia wanangupfo.

¹⁹ Na Babeli, kiṟumi kya mangi, wucha wo orikiki lo Wakalidayo, lochifanana na Sodoma na Gomora oo handu Ruwa alewakombetsa.

²⁰ Kuwode mokaapfo ma nta pfo, ma mndu echikaapfo kishari na kisharipfo. Mwarabu echihorotsapfo ihema lyake pfo, welisa mapo hawo kuwode ihalaṟahopfo.

²¹ Indi ipfo nyi kochikaapfo mando ha ngeṟenyi malang'a; mba tsaho tsechiichuo makudukudu, nyaha na waṟumu mpfo wechitemia.

²² Shisii shechipooma kiidi kya njomombo tsake, na mapaara mbenyi tsa wuseṟeṟi na kiheri kyake kii hafui; mkonu yake yechiengeṟopfo.”