YESAYA 11 - Bibilia Kui Mdedie fo Kimochi

Wumangi wo ofoṟo

¹ Nahong'u kochikapa njana kiidi kya itsinde lya Yese, na iṟamba lyechiwuka kiidi kya mri yake lyechiṟaa ndunda.

² Na mumuyo fo Mndumii fochikaa huyake, mumuyo fo wuṟango na imanya, mumuyo fo chile na wuidimi, mumuyo fo wulaanyi na iindia Ruwa;

³ na sia yake yechiwa kiidi kya iindiya Mndumii; manya echianduo kechiosha shilya meso hake haiwonapfo, na echiwawasa kechiosha shilya aicho kui madu hakepfo;

⁴ indi kui wukiilohi nechianduya wakiwa, nechiwawasa wekunyiiṟa wa wuyana kui wuele; nechikapa wuyana kui ndichi ya dumbu lyake, na kui mṟufu fo dumbu lyake nechiwaha wawicho.

⁵ Wukiilohi wochiwa okowa lopfunga kitsi kyake, na wuhendeli okowa lokupfungia.

⁶ Kisii kechikaa hamu na kidahina kya ichondi, na rumu lyechilaa hamu na kidahina kya mburu; kihache na mwiso hamu na kinoru shechikaa handu hamu, na mana mtutu nechiwasongoya.

⁷ Mbe na ngaṟe tselya handu hamu; wana washo wechilaa handu hamu; na mwiso fochilya maṟa cha mbe.

⁸ Mana aionga nechitema handu kui mruma fo njoka, na mana aledumbuyo ionga nechiwika owoko loke mrumenyi fo njoka ya wuṟo.

⁹ Wechinyamaṟa ma iwuta kindo kiwicho kiidi kya fumvu lyako liele pfo; kipfa wuyana wochiichuṟo nyi imanya Mndumii, chandu mṟinga fuichuṟa ipalyipalyi.

Wai osamiṟonyi wechiwuya

¹⁰ Na kechiwa mkonufo, itsinde lya Yese lyehoṟoka iwa kichano kui shishari sha wandu, nyio mbaṟi tsa wandu wakeri imshiha; na handu hake hesia moo kochiwada kiṟumi.

¹¹ Na kechiwa mkonufo, Mndumii nechihoṟuo owoko loke lya kawi, kundu nakuwadie wandu wake waletsuhaa, kuwuka Ashuru, na kuwuka Misri, na kuwuka Patrosi, na kuwuka Kushi, na kuwuka Elamu, na kuwuka Shinari, na kuwuka Hamathi, na kuwuka hahadutsu kiidi kya ipalyipalyi.

¹² Nao nechiira bendeṟa ya wandu wa mkambo huye, nechisanza wandu wa Israeli wai wakumbe, nechisanyia wandu wa Yuda wawerahanyikie, kuwuka njora tsiina tsa wuyana.

¹³ Na wunyenyi wo Efraimu wochiwuka, na walya wesuiṟa Yuda wechikumbo kuleshe; Efraimu echilanga Yudapfo na Yuda echisuiṟa Efraimu-pfo.

¹⁴ Nawo wechisoka, wechirundukia kombe lya Wafilisti ora lo kiukanyi; nawo kimu wechiduo wapfungo wana wa ora lo ngamenyi; wechihoṟotsa owoko huye ya Edomu na Moabu; na wana wa Amonyi wechiwaindia.

¹⁵ Na Mndumii nechirumatsa piu olimi lo ipalyipalyi lya Misri; otanu loke lokerumatsa lochikutakuta owoko loke huya meda, nao nechifukapa fuwe shimeda mfungade, na iambatsa wandu waṟee shadu shihadutsu.

¹⁶ Kochiwada njia nnene ko mtsuhaṟo fo wandu wake wechitsuhaa, wawukie Ashuru, chandu kiwei ipfo ko Israeli, kiidi kya mkonu fulya walewuka orukenyi lo Misri.