YESAYA 10 - Bibilia Kui Mdedie fo Kimochi

¹ Ochia lowo wewika mawawaso halai lohi, na waṟehi weṟehia madedo ha wukahari;

² idetsa ulya ahuṟi nalawone kilya kyake kisumhanyi, isoka wakiwa wusumhanyi wowo, kundu wakusu wawe wapfungo, na wangoeda walepfiio nyi wandeawo wawe kando kawo kalase.

³ Nanyo mochiwuta kiki mkonu focheo, na kiheri kya orumatso, kechicha kiwuka kuleshe mnu? Alewo mochidichiawu muwone ngaya? Na kiṟumi kyanu mochikida hanga?

⁴ Wechihongoma wanda ya wapfungo tupu, wechioloka wanda ya iwo wai wawahe. Hamu na isho shose nyashi yake ilehalukia aleshepfo, indi owoko loke lui luhoṟwo itane wulalu.

Wuwawaso ko mangi ya Ashuru

⁵ Ochia lo Ashuru, ndichi ya nyashi yako, ichu iṟiinga lii owokonyi loke nyi nyashi yako!

⁶ Njechimduma kiidi kya wandu wenyi wuminyi, na inyi njechimnenga mawawaso huya wandu wa nyashi yako, naduo wapfungo nawachumechume cha odoko lo njienyi.

⁷ Indi chi wudo akeri iambuyopfo, ma chi wudo mrima foke fuikusaṟapfo; kipfa kiidi kya mrima foke nakusaṟie, inyamaṟa na irahanyitsa wandu wa mkambo ifoi ma chi waangupfo.

⁸ Kipfa nahamba, “Ale, wanene wako wose chi wamangi?

⁹ Ale! Kalno chi cha Karkemishi? Hamathi chi cha Arpadi? Samaria chi cha Dameski?

¹⁰ Chandu owoko loko luleshikia mangi tsa sanamu, sanamu tsawo tsii tsepacha tsiwei njicha kota sanamu tsa Yerusalemu na tsa Samaria;

¹¹ ngesa njechiwutia Yerusalemu na sanamu tsake, chandu ndewutia Samaria na sanamu tsake?”

¹² Kyasia, kechiwa Mndumii kameinutsia iṟunda lyake lyose huya fumvu lya Sioni na huya Yerusalemu, njechikapa ndunda tsa orikiki tsa mrima fo mangi o Ashuru na ikushela lya meso hake.

¹³ Kipfa nahambie, “Kui pfinya tsa mawoko hako njiwutie kindo ki, na kui wuṟango woko, kipfa inyi njii mṟango, na inyi njilewuta mṟasa ya wandu, ngawada shisa shawo, ngaolotsa wose wedamia huya shidi sha wuitoṟi chando mbahanyi ekewuta.

¹⁴ Na owoko loko luwutie masaa ha wandu wa mkambo cha ili luiwuta sungunyi tsa shilehe na cha wandu wekesanyia mapoṟe haledeo, nyi wudo inyi njilesanyia wuyana wose, manya kuwode alekutakuta ikungopfo, ma itambaṟuo dumbu ma injifihiṟa.”

¹⁵ Ngesa, soka likuṟumishe ko ichu aliwode? Ale, msemeno nafo fukuichike ko ichu mofukuruo? Kiwechiwa ke ndichi yechumia iwededemisha weiira, ang'u ndichi iwechiira ichu alai ikidi.

¹⁶ Ko ikyo Mndumii, Mndumii menyi Matorito, nechimudikia ipooka lya wandu wanoru; nechidika isaramaya lya walya wenyi, kiṟumi cha isaramatsia modonyi.

¹⁷ Na ngeela ya Israeli yechiwa modo, na Mwele oke nechiwa olewo lo modo; nafo fochirumatsa mbeche na msha yake kui mkonu fumu.

¹⁸ Nao nechirumatsa wuitoṟi wo ngeṟa yake na wo dema lyake li licha, wokia mrima na nyama ya mbihu, nechiwa cha ulya mopfa ili akuo.

¹⁹ Na mashidi ha ngeṟa yake hechitsuhaa hechiwa maangu, na mana mtutu nechiidima iitala.

Waangu wechiwuya

²⁰ Kake, “Kechiwa mkonu-fo mtsuhaṟo fo Israeli na iwo walekia wa mba ya Yakobo, wechikusiria se icho alewakapapfo, kyaindi wechikusiria Mndumii, Mwele o Israeli kya lohi.

²¹ Mtsuhaṟo fo nyi fo Yakobo, wechiwuuya Ruwa ai Menyi pfinya.

²² Kipfa wandu wapfo, iyo Israeli, ma wakafo cha msanga fo mbai ya ipalyipalyi, nyi mtsuhaṟo tupu fochiwuya; orumatso nyi lui luteseheṟe luisoka cha meda kui wulohi.

²³ Kipfa Mndumii, Mndumii menyi Matorito, nechiinutsia orumatso ateseheṟie kiidi kya oruka loose.

Mndumii-Ruwa nechikapa Ashuru

²⁴ Ko ikyo Mndumii, Mndumii menyi Matorito nahamba adi, “Lanye wandu wako mokekaa kiidi kya Sioni, mulaowuo Ashuru, ma chandu akukapa na ndichi na iiria iṟiinga lyake huye yapfo, kui mbaṟi ya ki-Misri.

²⁵ Kipfa kuiho kioweṟe kitutu tupu nyashi yechimanda na nyashi yako yechihaluka iwamarise.

²⁶ Na Mndumii menyi Matorito nechiamtsa olio huye yake, chandu alekapa Midiani kufui na iṟaṟa lya Orebu; na ndichi yake yechikaa huya ipalyipalyi nao nechiira kui mbaṟi ya ki-Misri.”

Mkituwa naafukia

²⁷ “Kake kiidi kya mkonufo mhanda foke fochiwuka kosohu kopfo, na ngowa tsa ikidi nzingonyi kopfo, na ngowa tso tsechinyamaṟo, kipfa kya ishio mafuda.”

²⁸ Kashika Ayathi, kaida kiidi kya Migroni; kawika mhanda foke ipfo Mikmashi;

²⁹ wakaambada; wahenda ilaa Geba; Rama fuidedema; Gibea fo Sauli fodicha.

³⁰ Fahiya mnu iyo mana mshiki o Galimu, adanyia iyo Laisha; ochia lopfo, mkiwa Anatoti.

³¹ Madmena nyi mdichi; wenyi wa Gebimu wamekuwumbia wadiche;

³² mkonufu fo inu nechihoṟoka ipfo Nobu; naipayapaya owoko loke huya fumvu lya Mana o waka o Sioni, fumvu lya Yerusalemu.

³³ Ambuya Mndumii, Mndumii menyi Matoṟito, nechimanya maṟamba kui pfinya iṟihishie; iwo wai waleshe kui mbumba wechimanyo; na iwo walekuiria wechiombotso wanda;

³⁴ nao nechidumbuo shingeṟa sha ngeṟenyi na menya; na Lebanoni lochioloka kui owoko loke ichu awode pfinya.