YESAYA 1 - Bibilia Kui Mdedie fo Kimochi

¹ Aiha mawonesio ha Yesaya, mana o Amozi, alehawona kiidi kya mbonyi tsa Yuda na Yerusalemu, mandi ha maheri ha Uzia na Yotham na Ahazi na Hezekia, wamangi wa Yuda.

Ruwa Adedia wandu wake

² Adanyienyi, nyo ngina, deha kudu, iyo oruka, kipfa Mndumii amededa; Njiletoṟisha wana na iwadosa, nawo wanjileha,

³ Mmbe iichi menyi oyo, Na nzoi iichi tengo lya menyi yo, Kiṟihishie Israeli aichipfo, wandu wako wekekusaṟapfo.

⁴ Ochia lowo, mkambo fuwode wunyamaṟi, wandu wekeduo mhanda fo wukika, oshari lo wewuta mawicho, wana wekenyamaṟa; waleda Mndumii, wamina ichu ai Mwele o Israeli, walekanyi nao na iwuya numa.

⁵ Nkili mukundi ikapo mṟasa wulalu, mkaengeṟa itahacha? Mdo fose fuluo, mrima fose fuleuma.

⁶ Wokia owayo lo odende itane ododo kuwode hecha ma kumupfo; sile nyi shifaṟe, ngoru tsepichuka na matiinga hawuta ofia; shilashipfunge, ma ioṟowio nguo, manya ishio mafuda.

⁷ Oruka lonu nyi wukiwa; mṟi yanu injirumatse nyi modo; oruka lonu, wahenu waluliiye oshangunyi lo meso hanu; nalo nyi wukiwa, ke luirumatse nyi wahenu, cha irumatse lya Sodoma.

⁸ Mana mshiki Sioni naledeo cha tengo kiidi kya mdemi fo msabibu, na kitaṟa demenyi lya matungucha, cha mṟi fui mtengetie.

⁹ Kokoya Mndumii menyi Matoṟito alaleludeeya mtsuhaṟo mwaangu, luwechiwa cha Sodoma na ifanana na Gomora.

¹⁰ Adanyienyi idedo lya Mndumii nyo wachili wa Sodoma; dehenyi madu muicho Oloho lo Ruwa odu nyo wandu wawicho cha wandu wa Gomora.

¹¹ Mfoeṟa fu fo mwano yanu mokeende fuwode kiira kiki? Mndumii nahamba. Inyi njiichuo mafuda ha masuwa manoru, na mafuda ha shuma shinoru; inyi njekechihiṟo nyi samu ya mmbe, ma machondi ma oṟopfo.

¹² Ili mandi mocha iwono oshangunyi loko, njiindia, nyiu awekundi idedo lyi oshangunyi lonu ichuma osa loko?

¹³ Mulanjiendie mwano iichuo wukika; uvumba nyi shinjisuiṟie, meri mhya na sabato, ilaha shisanzio; njechiidima mawuto ha ha wunyamaṟi na shisanzio sha wuindi pfo.

¹⁴ Mfuho yanu ya meri mhya chando shii shiwawase, mrima foko fushisuo, shifananyi na mhanda mlemeri njilechiidima ishiduo; fonjiwinyisha.

¹⁵ Nanyo mkahoṟuo mawoko hanu, njechishinga meso hako njilechimuambuya; yee, mukaterewa shiterewo shifoi njechiichopfo; kipfa mawoko hanu haichuo samu.

¹⁶ Kusanjenyi, kuilishenyi; kuatuonyi wuwicho wo mawuto hanu, wukae kuleshe nanyo; lehanenyi na mawicho;

¹⁷ Kuloshenyi iwuta mecha; dumbuonyi mwanduye ya sungusihu; taramenyi wafafa; inengienyi wangoeda kilya kisumhanyi; kapanyienyi wakusu.

¹⁸ “Kyasia nchonyi lukape sumu, Mndumii ahamba. Wunyamaṟi wonu wukafana kimande, wochiila cha makuṟeṟa ha mtsudu; wukawa kimande cha bendeṟa wochiila cha sufi.

¹⁹ Kokoya moidikia mukaindia, mochilya mecha ha oruka;

²⁰ indi kokoya moleha na inyamaṟa, mochirumatso nyi oshu; kipfa dumbu lya Mndumii lyadeda isho.”

Mṟi fuichuo wunyamaṟi

²¹ Mṟifu fuwei mhendeli, fulewa fuda fumeluki! Ichu aweichuo mwanduye fo lohi, lohi iweichuo koke, indi ate wulalu nyi mbaahi!

²² Fesa yapfo yawa mbosha, mvinyo fopfo fosanzo na mṟinga.

²³ Wanene wapfo nyi watahachi, na mbuya tsa mbafu; orio mndu nakundi itsutsumo, wekeosha itao, wechiinenga ngoeda kilya kyake kisumhanyipfo, wekeicho kieṟeṟo kya mkusu pfo.

²⁴ Koikyo, Mndumii nahamba, Mndumii menyi Matoṟito o Israeli, “Njechilimbana na iwo wechikapana na inyi, njechiduo kiṟache kya wakituwa wako;

²⁵ na inyi njechikuindutsia owoko loko, njechisalaṟa wukika wonu wose, njechiwuta mbosha tsanu tsose.

²⁶ Na inyi njechikuwihiṟia wachili wahya chando wawei ili mboko, na walaanyi wapfo cha oo mawookionyi; Nlyodi Yerusalemu ochilaho, ‘Mṟi fo wukiilohi,’ nochilaho, ‘Mṟi mhendeli.’”

²⁷ Sioni yechikiṟo na mwanduye, na walya wecha kui wukiilohi wechikiṟo.

²⁸ Indi inyamaṟika lyawo wadeko na iwo wenyi wunyamaṟi kochicha kiheri kimu, na iwo walaowoe Mndumii wechirumatso.

²⁹ Kipfa wechidedema kya shindo wawekusirie sha maai, nanyo mochisonu kipfa kya shaahu mulesambuṟa mushiindie.

³⁰ Kipfa mochifanana na ikidi maṟa halyo haiuma, cha kyahu kilawode mṟinga.

³¹ Mndu ai ngohoda nechifanana na maṟa maumu, mawuto hawo hechiwa cha sese tsa modo, wechisaramaya handu hamu na mawuto hawo, manya kulechiwonekapfo mndu echiwakiṟa.