YEREMIA 9 - Bibilia Kui Mdedie fo Kimochi

¹ Kima mdo foko fuwechiwa ṟungu lya mṟinga, na meso hako hakawa soka ya mchenyeṟe, kundu njiidime ifihiṟa mfiri na kio, kipfa kya walya walewoho, wai wandu wako.

² Kima mbewode handu hekaa orukenyi lo msanga, kichangalenyi kya wandu wa kyaṟo njiidime ida wandu wako; na ikure kowo. Kipfa wo nyi waṟuhui wose piu, kisanzio kya wandu waminyi.

³ Wekelema olimi lowo cha wuda, kundu wahambe wongo, nawo wawode pfinya kiidi kya oruka indi chi kiidi kya wuhendeli-pfo; kipfa wo waengeṟa wuwicho kiidi kya wuwicho, ma wanjiichi inyi-pfo.” Mndumii ahamba.

⁴ “Kuṟisenyi orio mndu na wamṟasa oke, manya mulakusirie mana-o-mayo ose, kipfa orio mndu nechiseya sha wongo, na mndu o mṟasa nechihenda ipfo na ipfo, na ihamba wongo na iiria wongo.

⁵ Nawo nyi wechilemba orio mndu na wamṟasa, ma wechihamba lohipfo, waichiwiṟie olimi lowo ihamba wongo; wakakupootsa wawute mawicho.

⁶ Wakawumbia mbaka huya mbaka, na wongo huya wongo. Walakunde injimanya inyi. ‘Nyi inyi Mndumii-Ruwa ngahamba.’”

⁷ Kyasia Mndumii menyi matorito nahamba, “Njechisalaṟa wandu wa iwahesha! Kipfa njilamewuta njidi njechiwika kuda na wandu wa wawode wuwicho?

⁸ Njolimi tsawo tsi cha mfi ya wuṟoi; waichuo wulembi, mndu nededa necha na wamṟasa oke, kyaindi kiidi kyake naichuo wunyenyi.

⁹ ‘Ngesa njilawuwuye isho?’ Mndumii ahamba. ‘Ngesa njilatae kiṟache kiidi, kya mkambo fo wandu wa mbaṟi ii?’”

Kiheri kyefihiṟa na ikapa kilio

¹⁰ “Njechifihiṟa huya mafumvu, njechisokio nyi fowa kipfa kya kundu kolisa patenyi; Kipfa kulawode moida-ho kipfa kusaramaye. Ma kuichio ṟu lya mbe pfo. Ndehe tsa ruwehu na mando ha ngeṟenyi, shose shadicha shikadeka.

¹¹ Na inyi njihaluo Yerusalemu mrapu, kuwe kanyi ko mapara; njechihaluo mṟi ya Yuda iwenjisame, kulechilao nyi mndu.

¹² “Nyiu awode wuṟango, naidime imanya ishi? Nyiu awode idedo Mndumii awembiiye namuongoye? Kitewe oruka-lu lunyamaṟike ludi cha nuka ya msanga ma kulawode mndu moidapfo?”

¹³ Nao Mndumii kahamba: “Nyi kipfa kya imina mawawaso hako njilewainenga ma walaidikie ṟu lyako ma ihenda sumuhana nalyo.

¹⁴ Indi wakanjisuiṟa wakaosha mahio hawo na idichia muidikie fo Baali, chandu wafee wawo wawaloshie.”

¹⁵ Koikyo Mndumii menyi matorito, Ruwa o Israeli, nahamba, “Ambuya njechiihutsa wanduwa shindo shewawa na njiwarutse mṟinga fo wuṟoi.

¹⁶ Njechiwarahanyitsa kiidi kya wandu wa mkambo wakeri kundu ma wandeawo walaweichi, njiwedika oshu luwaoshe mtano ngawarumatsa.”

Wandu wa Yerusalemu wafihiṟia ndarama

¹⁷ Mndumii menyi matorito nahamba, “Kusaṟe na ilaha waka wekapa kilio wache; duma waka walaanyi wache.

¹⁸ Wakambiṟe owinyi wechifuha, kundu mchenyeṟe yadu ifo, na mbawa tsa meso hadu tsishingo nyi mchenyeṟe.

¹⁹ Kipfa ṟu lya kilio liichio liwuka Sioni. Losaramaya nakamu! Luwodo nyi sonu tsing'anyi! Kipfa luleda oruka lodu! Kipfa walenyamaṟa handu hadu hekaa!”

²⁰ Adanyienyi nyo waka, idedo lya Mndumii! Na iicho kui kudu idedo lya dumbu lyake, loshenyi wana wanu wa kika ikuinadia, na wamṟasa wanu shiimbo sheṟika.

²¹ “Opfu loida matiṟishenyi hadu, loida kiidi kya mba tsadu; Waarisia wawa wadu kiidi kya njia njilandari, wanake wadu njosehu tsa mṟi.

²² Mnying'a ya wandu yakuala orio handu ifananyi na kyala kya mademenyi, cha mahaa ha mbeke haledeo mdemenyi, halalesambuyo, kulawode mosanyia, “Mndumii menyi matorito anjiwia njihambe!”

²³ Kyasia Mndumii nahamba, “Mndu mṟango nalakushelie wuṟango woke, manya ulya awode pfinya nalakushele kipfa kya pfinya tsake, manya msuṟi nalakushelie wusuṟi woke,

²⁴ Indi ulya mokushela nakushele kipfa nanjiichi inyi ke. Nyi Mndumii njekewuta mecha, njiwode wulohi na wusumhanyi, njekewuta shindo sha lohi na wusumuhanyi wuyanenyi. Wandu wa mbaṟi yo nyi wo wekenjichihiṟa.

²⁵ “Ambuya mkonu ikeri icha, Mndumii ahamba, njechihoṟuo wose walya wadine kimbihu tupu:

²⁶ Wamisri, Wayuda, Waedomu wana wa Amoni, Wamoabu na wose wekekaa nuka ya msanga wekeoda kilodi. Kipfa wandu wa wose na Waisraeli walawadine mrima, kikawa nyi odino lo mbihu tupu.”