YEREMIA 8 - Bibilia Kui Mdedie fo Kimochi

¹ “Mandi ho mochiṟuo mafuo ha wamangi wa Yuda na mafuo ha wanene wawo, mafuo ha wakohanyi na ha waikimbi, na ha wandu wa Yerusalemu hawuto ipfo maṟungunyi hawo,” nyi Mndumii ahamba,

² “Nawo wechihaolaola osehu lo mnengeṟi na Meri na nyenyeri tsose tsa nginehu, isho waweshikundi na ishiṟundia na iwadana nasho, na ishiwalia na ishiindia; wai, mafuo-ho hechisanyio handu hamu-pfo ma iriko-sepfo; hechiwa kyala kya oruka.

³ Ipfa lyechisambuṟo kota ikaa na moo, na mtsuhaṟo fulya fose kiidi kya wandu nyi fui mbicho, kulya wai watsuhaṟe ndewafuna orio handu. Nyi wudo Mndumii menyi matorito ahamba.”

Wunyamaṟi na ngapo

⁴ “Kake nochiwawia, Mndumii nahamba adi, ‘Ngesa wandu wechioloka, walechihoṟoka?’ Ngesa mndu nechihaluka nahende alechiwuya-se?

⁵ Nyi wuda kyawa wandu wa Yerusalemu wahaluka wakawuya numa, walatsitse ihaluka kudo? Wakewada mbonyi tsa wulembi walakunde iwuya.

⁶ Njileadanyia ngaicho, wakadeda sha mkika, kuwewode mndu ma umu aledumbuya kya wunyamaṟi-pfo, ma kahamba nkiki ngawuta. Orio umu nawuya mkaenyi yake amonyi cha frasi ikeri shidenyi.

⁷ Malehe hose hakerunduka cha mbeta, mbeṟo, makuru haichi kiheri kiwaṟi isama, kyaindi wandu wako waichi mawawaso ha Mndumii-pfo.

⁸ “Mohamba muda, so nyi luwode wuṟango, na wuwawaso wo Mndumii wui naso? Kyaindi ambuya kilya keṟehia wongo kya mṟehi kya haluka wongo.

⁹ Walaanyi awalya waṟeenze, waeṟewe na imanyika wuowu wowo, wada idedo lya Mndumii, nyi wuṟango wuha wawode?

¹⁰ Kyasia njechiinenga wandu wengi waka wawo na madema hawo, njechiinenga walya wawaitoṟia, kipfa orio umu owo wokia mtutu itane mku nyi waichuo lango; wokia mwikimbi itane mkohanyi ni wandu wewuta wulembi;

¹¹ Kipfa nyi walechiṟa matiinga ha wandu wako huyehuye, wechihamba kuwode ofoṟo, nalo lulaipfo.

¹² Ngesa na waleṟeenze lilya walewuta sha mkika? Ote waleṟeenze-pfo, ma walewado nyi sonu-pfo; kyasiang'u wechioloka kiidi kya weoloka; kiheri kecheo wechiolotso wanda. Mndumii ahamba.

¹³ “Njechiwarumatsa piu, Mndumii ahamba kuwode ndunda tsa msabibu mashidinyi ha msabibupfo, ma mkuyu kiidi kya mkuyu pfo, maṟa hechinaa, na shindo shilya njilewainenga shechiwadekia.

¹⁴ Wandu wawesa “Nkili lotsia sau? Kusanzenyi luhende kiidi kya mṟi iwode njomombo, luhende ipfia pfo! Kipfa Mndumii-Ruwa nateṟie ilurumatsa, kalurutsa mṟinga fowawa kundu lunyo. Kipfa kya idekio Mndumii.

¹⁵ Luwelangie ofoṟo, indi lulewona kicha kyosepfo, nyi luweiwedia kiheri kechiṟo, ate nyi isukio nyi moo.

¹⁶ Wuka Dani kuichio ndiṟimo ya frasi, oruka lose lodedema kipfa kya ṟu lyo lyahamba shida kipfa wacha walya werumatsa oruka na orio kindo kiipfo, wandu wa mṟifo na wose waipfo. (Mndumii-Ruwa)

¹⁷ Kipfa ambuya njechidika njoka, njoka membe kiidi kyanu, tsilechiwa ilembo-lembo nyi wuhanga natso tsechimuimada. Mndumii ahamba.”

Fowa ya Yeremia

¹⁸ “Nyiku njechiende sia njilawode ikuinadia? Mrima foko foangalala na iichuo wukiwa.

¹⁹ Aikyo kilio kya wandu wako, kyaichuo orukenyi lui kuleshe mnu, ngesa Mndumii ai kiidi kya Sioni? Mangi yake ii kiidi kyake? “Nyi kitewe kya iki wanjipfulutsa nyashi na ofano lowo walepacha, na iwuta sha wukika sha wahenu?

²⁰ “Shilimu shameida, kiheri kyanu kyasia, ma kudo so lulekiapfo!

²¹ Kipfa kya mawawio ha wandu wako njilewalilia inyi, njiṟee nguwo njiiwu ngasaangia.

²² Alewo kuwode mdi fokushia kiidi kya Gileadi? Kuwode wandu wenyi wuṟango waichi mdi yechiṟa? Kiinengie wandu wako walawade oru? Nki ili mandi walehela wadi?”