YEREMIA 7 - Bibilia Kui Mdedie fo Kimochi

Yeremia aonguo mbonyi hekalunyi

¹ Idedo li nlyo lilechea Yeremia liwukie ko Mndumii lechihamba,

² “Kuhoṟotse ipfo kichuminyi kya hekalu lya Ruwa noongoye-pfo kikeri kiile, ‘Nyo Wayuda mose mokuidia kichuminyi-ki muterewe Mndumii.’

³ Keadanyienyi-wo idedo lya Mndumii-Ruwa. Mndumii-Ruwa menyi matorito ai Ruwa o Israeli, nyi ahambie adi, ‘Mukuitike ichumia mchumie isumhanyi na iwuta mawuto mecha, na inyi njide handu-ho mukae-pfo.’

⁴ Mulakusirie mhambo ya wongo ili walehamba, ‘Hekalu lya Mndumii, hekalu lya Mndumii, Ee hekalu lya Mndumii.’”

⁵ “Kipfa kokoya mokuitika ichumia mchumie fusumhanyi na iwuta mawuto mecha, mochimanyisha chile lohi ipfo wandunyi handu mndu aanduyana na ungi;

⁶ manya mulatuure ma mndu mhenu ma mana mngweda ma mka mkusu, mulapusuye handu-ho samu ilai na mti, mulaoshane na maruwa ha wongo hai ochia lonu.

⁷ Na inyi njimude handu-ho, mkulaye orukalu njileludambikia wandeanu wokia mbooko itane mlungana.

⁸ “Kyaindi nanyo mokusiria na madedo ha wulembi tupu halawode ma mbucha.

⁹ Ngesa mochiiwa na iṟuhuya, na iwaha na ilya nyamu tsa wongo, iatsia Baali opfamo lo wuindi ioshana na maruwa ha kihenu mulahaichi.

¹⁰ Numa mocha ikuhoṟotsa oshangunyi loko mbai insende kui irina lyako mukahamba “Lui waowishe. Kundu muidime iwuta mawicho halya hose.

¹¹ Ngesa mbai ilesendio rina lyako, ikawa opanga lo wasoki ipfo mesonyi hanu, ikawa ido lohi, na inyi njiwonyi, nyi wudo Mndumii ahamba.

¹² Kekuhendienyi-ngu kulya Shilo na kundu koko nyi hondu njiwemanyishie rina lyako maheri ha kacha, ambuyenyi-ho chandu njilehawutia kimaduma kya wumbafu wo wandu wako Israeli.

¹³ Nahong'u kidedo kya Mndumii nyi kikeri kile, na wulalu, kipfa mowuta mawuto halya ha mawicho hose, mulawemeicho handu njiwetsindie imdedia mnu mulaweidikia handu njiwei imlaha.

¹⁴ Mbai ikeri isendo ko rina lyako handu mukusirie, nyi ho handu njilemudambikia nyo na wandeanu njihende ihawutia chandu njilewutia Shilo.

¹⁵ Njimuwuta kisanzionyi kyako chandu ndefuna koko luwa lya Efraimu lyose wawei wana wa mayanu.”

Wandu wawuṟa wuindi

¹⁶ “Indi iyo ulaterewie wandu-wo ma ulafuhie kyawo kifuhio, ma ulanjiterewe kipfa kyawo kipfa njechikuadanyiapfo.

¹⁷ Ngesa owonyi iki wekewuta mṟinyi ya Yudaya na ipfo mtandarenyi ya Yerusalemu.

¹⁸ Wana wesana ngu na wandeawo waatsa modo, indi waka weriha-riha mso fo koṟia Mangi mka o nginehu mkate waletsie maruwa ha kihenu mshimbika wechinjiwichuṟa.

¹⁹ Kyaindi wanjiwichuṟa wo wawenyi na iṟenze chi kyamu kya oshangunyi lonu.

²⁰ Nkyo Mndumii-Ruwa ahambie adi, “Nkya lohi nyashi yako na wulang'a woko njechikupusuya handu-ho, shipusukie wandu na shiuma na mashidi ha mademenyi na shilimu sha oruka, nasho shechikoṟo shiake shilekiwase irumisho.”

²¹ Nao Mndumii-Ruwa menyi Matorito ai Ruwa o Israeli ahambie adi, “Sanzenyi shidaso shanu shekoṟa hamu na sheshinja mukulie nyama tupu.

²² Kipfa wandeanu mandi halya njilewaashuo Misri, njilewawasia kya shidaso shekoṟa na sheshinja manyalepfo.

²³ Kyaindi kilya njilewawasia kyo kikeri kiile, ‘Hendelienyi mawawaso hako; mukawuta mudo na inyi njiwe Ruwa onu, nanyo muwe wandu wako, muchumie njia iya njechimbawasia tupu, kundu muwonyio ona.’

²⁴ Indi wo waleichowo ma walemanya kundu kowopfo, indi wakawechumia weindia mtambo ya wumbafu wo mahio hawo mawicho walenjikumba mhongo chi oshangunyipfo.

²⁵ Na inyi, wokia mkonu wandeanu walesama Misri, shika mkonu fo inu, njiwekeri imudumia waṟundi wako, nyiwo waikimbi, njilalemo.

²⁶ Indi wo walenjiicho pfo ma indehia kudu-ote! Indi wawei ikuumiṟa mrima wakawewichuo kota wandeawo.

²⁷ “Na iyo nowaongoye madedo hose ma kudo wechikuicho pfo, kowalaha wekuhaluo pfo.

²⁸ Hondo ochiwawia, ‘Nyo nyi wandu walaidikie mawawaso ha Mndumii-Ruwa, onu ma iwada chile, wuhendeli wulemudeka, e wulemsaramaya dumbunyi lyawo.’”

Mawicho pichinyi lya Hinomu

²⁹ “Odenyi njui tsanu nyo wandu wa oruka lo Yerusalemu, mutsikumbe; kapenyi kilio kya wukiwa shitoṟomosonyi sha mafumvu, kipfa Mndumii amesesa oshari lu, lui luteṟiye nyashi yake kalukumbalia nja.

³⁰ “Kipfa wana wa Yuda wawuta mawicho oshangunyi loko,” Mndumii ahamba, “Wakaṟunda shindo sha ngafu kiidi kya mba yako wakaweifanyitsa.

³¹ Wakawika handu hakuiriye ko ‘Tofethi,’ kui pichi lya mana o Hinomu, kundu wakoṟe wana wawo wa kisoṟo na wa kika kui modo kindo njilalekiwawasa, ma injiida mrimenyi foko pfo.”

³² Kyasia ambuyenyi mkonu ikeri icha Mndumii ahamba, “Mkonu yo kulechilaho-se Tofethi, ma ‘Pichi lya mana o Hinomu,’ indi lyechilaho nyi ‘Pichi lya Mashinjionyi,’ kipfa wechiṟika wandu kiidi kya Tofethi, kulechiwono-se handu heṟika.

³³ Na mnying'a ya wandu-wa yechiwa kando ka shilehe na mando ha ngeṟenyi, kulechiwono mndu mohafuna.

³⁴ Nkyo kitewe kiidi kya mṟi ya Yuda na njia njinene tsa Yerusalemu kulechiichio ṟu lya menyi wali ma moaliko. Kipfa oruka lochiwa mrapu.”