YEREMIA 6 - Bibilia Kui Mdedie fo Kimochi

Yerusalemu injitengetie nyi wakituwa

¹ Dichenyi nyo wana wa Benyameni kundu mukie; wukenyi kiidi kya Yerusalemu, Kapenyi iranda kiidi kya Tekoa. Wikenyi kichano ipfo Beth-hakeremu; ambuya kuwode mawicho hang'anyi hakeri iimehiya hache ora lo mtsudu.

² Mana o waka o Siyoni ai mcha mrendekeli, kyaindi njechimrumatsa.

³ Walisi na mapo hawo ha machondi wechimchea; wechihoṟotsa mahema hawo kufui nawo njora tsose; indi wechilisa orio umu handu hake.

⁴ Oloṟenyi shida huye yake; kurenyi kudo kiheri kya mfiri. Ochia lodu, mfiri fo kelya, shiṟinje sha kiukanyi shaengeṟa ilea.

⁵ Kurenyi kudo kiheri kya kio; kundu lunyamaṟe mamba hake.

⁶ Kipfa Mndumii menyi matorito nahamba adi, “Manyenyi Mashidi muwike omombo. Lutengete Yerusalemu. Mṟi fu nyi mṟi fukeri inyamaṟo. Nyi mbaka tupu tsiichio pfo.

⁷ Chandu nduwa ya mṟinga yekewuta mṟinga, nyi wudo ekewuta wuwicho woke; wuwicho na wuneesi woichuo kiidi kyake, ndaṟe na shifaṟe shii oshangunyi loko.

⁸ Nanga iyo Yerusalemu ohoṟwo, mrima foko fulawone fochilekana na iyo; inyi njilawone njechikurumatsa uwe mṟi fulechikao nyi mndu.”

Wandu wa Israeli walakundi iicho

⁹ Mndumii Menyi matorito nahamba adi: “Wechisanyia mtsuhaṟo fo Israeli cha ili mndu aisanyia msabibu; wihiṟa owoko lopfo mkunjenyi, cha mohaa msabibu.

¹⁰ Njidede nau na nyiu echiidima injiicho. Ambuya madu hawo hamapfu, ma wechiidima iadanyia-pfo; ambuya idedo lya Mndumii lyawa kitaluo kowo; walachihiyo kyalo.

¹¹ Kyaindi njiichuo nyashi ya Mndumii, ngalehela na itirisia; letsienyi huye ya wana wai njienyi na kiidi kya wanake, wakuwumbie handu hamu; kipfa mii na mka oke wechidao handu hamu, mndu mku na ulya ashitsie maka yake.

¹² Mmba tsawo tsechiwa tsa wandu wengi; madema na waka handu hamu shechiwa sha wandu wengi; kipfa njechihoṟotsa owoko loko huye ya wenyi orukalu, Mndumii ahamba.

¹³ Kyamba, wokia ulya ai mtutu itane ulya ang'anyi kiidi kyawo orio umu nyi aichuo lango; na wokia mwikimbi mṟasa Mkohanyi, orio umu nekewuta mbonyi tsa wulembi.

¹⁴ Wo nyi walechiṟa shifaṟe sha wandu wako huye tupu, wechihamba, “Ofoṟo! Ofoṟo!” Makulawode ofoṟo.

¹⁵ Ale walesokiyo nyi fowa lilya walewuta mawicho? Ote walesokio nyi fowa ma waleṟeenze pfo wai; kyasia wechioloka kiidi kya iwo weoloka; kiheri njechiwachea wechiolotso wanda, Mndumii ahamba.

Israeli aleha njia ya Ruwa

¹⁶ Mndumii nahamba adi, “Hoṟokenyi kiidi kya njia ing'anyi muwone, muwese mbonyi tsa okondo loko lo kacha, “Yeku njia iya njicha muhende kiidi kya njia-yo, nanyo mochiwona sia kiidi kya mrima yanu. Kyaindi walehamba ke loleha ihenda kiidi kya njia yo.

¹⁷ Inyi njilewika waringi huye yanu wechihamba, “Adanyienyi ṟu lya iranda,” indi wo wakahamba, “Lukaundi iicho-pfo.”

¹⁸ Kui kipfa kya ikyo adanyienyi, nyo wandu wa mkambo, mumanye nyo mukuwumbie, nkiki kekaa kihoye kiidi kyawo.

¹⁹ Adanyia iyo Oruka; uambuye, njechiende mawicho huye ya wandu wa, ee da ndunda tsa mahiyo hawo, kipfa walaleicho madedo hako; na kya ngoseṟa mbonyi tsa wuwawaso woko wakaleha.

²⁰ Nkya iki njiendio mpfamiṟo fuwukie Sheba, na msanzo fofo fuwukie oruka lo kuleshe? Mwano yanu yemaya modonyi yaidikiopfo, Ma shidaso shanu shinjichihiriye-pfo.

²¹ Koikyo Mndumii nahamba adi, “Ambuya njechiwa tewe oshangunyi lo wandu-wa, wana na wandeawo wechikapa mtulia handu hamu; mndu o mṟasa na mbuya yake wechideka.”

Ipufukio wuka ora lo mtsudu

²² Mndumii nahamba adi, “Ambuya, wandu waicha wawuka kiidi kya oruka lo mtsudu, na mamiingi fo mkambo fo wandu fochiamtso, fuwukie mtsitsionyi fo masanga.

²³ Wewada uda na pfumu wai waneesi na pata, wawode isaṟiapfo; maṟu hawo hekeṟuṟuma cha ipalyipalyi, orio umu nadoye huya frasi yake; wai cha wandu wa shida wakuṟeheṟie, icha kopfo iyo mana o Siyoni!

²⁴ Luleicho mbonyi tsake na mawoko hadu hakaṟengeṟa; wukiwa wukalukoya, mawawio cha ha mndu mka ai kufui itaramo.

²⁵ Mulakure muhende mademenyi, manya mulachumie ipfo mtandarenyi; kipfa oshu lo mkituwa lui ipfo; wuowu wui njora tsose.

²⁶ Nyo wandu wako, ṟaenyi nguwo tsa makunyia na idamia kiidi kya mafu na ikapa kilio, cha kilio kya mana kimumu kilio kiwicho mnu, kipfa ichu aleduo wapfungo wa shida naicha huye yadu faṟa.

²⁷ Yeremia, ambuya ngakuwika uwe mnaṟa, na omombo kiidi kya wandu wako, uidime imanya njia tsawo na itsihesha.

²⁸ Nyi wandu wadeko waeṟie, wekeṟahaṟaha ipfo na ipfo wechideda na iiria wandu madedo ha wongo; nyi aṟeṟa na menya, wandu wawuta wukika wose kuchu kulawodeho mcha.

²⁹ Nganya iṟufuṟa na pfinya; kuwode kindo kiwa itsana pfo, kipfa nyi sese tupu tsa modo; motsana fesa nasalaṟa wulya; kipfa wawicho walawuto wahende kuleshe.

³⁰ Wandu nyi wechiwalaha mbosha tsa fesa, kipfa Mndumii nawaleha.